ABLAXAMU
(Titɔ 12:1-25:18)
Mawu yɔ Ablamu tun ni boo lɛ le oto etɔn mɛ
12
1 Xwetɔ Mawu lɔ na Ablamu tun mɔ: «Tɔn le xwedo tɔwe mɛ, le didawe we oxwegbe, le oto tɔwe mɛ, a bo sɔn yi oto xena ko na sɔ xlɛ we mɛ. 2 Ko na sɔ we do wasi otogun ɖaxo ɖe, ko bo na do na we. Ko na na na nyikɔ tɔwe na nyi nyikɔ ɖaxo, ko bo na do na ɛmɛ gbokpweye gbɔn ji we. 3 Ko na do na ɛmɛ xeye ni na do na we ye, ko bo na do onu ɛmɛ xeye ni na kɔn acɔn do wu we ye. Gbɔn myɔ ji we, hwɛndo xeni gbɔn nyixɔ la ji zɛtɛye na kpɔn dona.» 4 Ablamu bo tɔn ɖi lena Xwetɔ Mawu lɔ ni-i ɖo ha, Lɔtu xeni nyi dayiyɔvi etɔn bo kplɔ-ɛ do. Oxwe kanɖegban atun wɛ Ablamu ɖo le hwexenu na e lɛ le Alanu we toxo mɛ. 5 E sɔn bo kplɔ osyɛ Salayi kpodo dayiyɔvi etɔn Lɔtu. Ye bɛ dɔkunnu yetɔnye seŋu, bo kplɔ ɛmɛxixɔ xeye na ye ɖo le Alanu we toxo la mɛ ye. Ye bo sɔn yi Kana we oto mɛ.Ablamu nɔ Kana we oto mɛ, e mɛ godo e bo va sɔn yi Ejiputi we oto mɛ
Ye va yi jɛ Kana we oto mɛ, 6 bo gbɔn oto la mɛ va yi nɔ gbɔɔn bo va yi jɛ yɔhwetin ɖaxo ɖe kɔn le Mɔle le Sicɛmu we toxo mɛ. Le hwemɛ la nu, Kanatɔye le Kana we oto la mɛ.
7 Xwetɔ Mawu ze do ŋumɛ na Ablamu, bo lɔ ni-i tun mɔ: «Ko na sɔ oto xe sɔ na jijimɛvi tɔweye.» Ablamu bo wasi ovɔsinsan we agba na Xwetɔ Mawu do ofi xena e ze ni-i le la. 8 E mɛ godo, e lɛ le blɛ, bo va yi ci kansin xe mɛ na okpóye le, le hwezɛdo na Betɛli. E bo wasi avɔva etɔn do Betɛli kpo Ayi we dodomɛ. Betɛli we toxo la, le hweyixɔ na avɔva la, Ayi we toxo bo le hwezɛdo ni-i. E bo wasi ovɔsinsan we agba na Xwetɔ Mawu, bo xo ɛɖɛ, bo yɔ Xwetɔ Mawu we nyikɔ. 9 E mɛ godo, Ablamu jɛ omɔ bo kpan ŋukɔn Nɛgɛvu we kansinmɛ danhɔn, e kpɔn ofi ɖe, e ba jɛ oxwe do blɛ.
10 Xovɛ ɖe va tɔn le Kana we oto la mɛ. Xena xovɛ la syɛnxu nɔ, Ablamu sɔn yi Ejiputi we oto mɛ, a do nɔ blɛ viɖe. 11 Le hwexenu na e ka ɖyɛ Ejiputi we oto la mɛ nɔ, e lɔ na osyɛ tun mɔ: «Ɖo oto-o! Ko nyɔ-ɛ tun myɔ bo nyi nyɔnu xeni nyɔhwyan bo nyɔ kpinkpɔn. 12 Na Ejiputitɔye kpɔn we, ye na lɔ tun siye bɛ myɔ bo nyi, ye ba hu-u, a bo jo we do ɛgbɛ. 13 Mi wɛ dɔn, ko ɖe kuku na we, lɔ na ye tun nɔvye bɛ myɔ bo nyi. E mɛ, do myɔ wu, ye ba waɖaŋu kpe ŋukunsin do wu ye. Mɔsinha ke, do myɔ wu we, ko ba gan.» 14 Xena Ablamu va Ejiputi, Ejiputitɔye kpɔn tun osyɛ bo nyɔhwyan taŋu. 15 Falawɔn we xɔsudanwatɔ ɖaxoye kpɔn-ɛ, bo va yi lɔ lena e nyɔhwyan ɖo na Falawɔn la. Ye bo kplɔ nyɔnu la va xɔlu we oxwegbe. 16 Do nyɔnu la wu, Falawɔn wasi dɔnmɛnywɛ na Ablamu. E bo ni-i gbɔgbwɛye, lɛngbɔye, nyibuye, odansɔvi nyɔnusiye kpo ŋusungloye, osɔkɛtɛ osiye kpo osuye, kpodo osɔkpotɔnɔye kpo. 17 Vɔ, do Salayi Ablamu syɛ la wu, Xwetɔ Mawu xo Falawɔn kpodo xwedo etɔnye kpo, kpodo adɔn nyanylaye. 18 Falawɔn la yɔ Ablamu bo lɔ ni-i tun mɔ: «Ɛlɛ dɔn o do wasi mɔsinha kpo-o? Ɛlɛ dɔn o ɔn do lɔ na-a tun he siye bɛ? 19 Ɛlɛ dɔn o do lɔ tun he nɔvye bɛ? E mɛ la wɛ dɔn, ko do sɔ-ɛ sɔ ɖo nyɔnu. Fifi, siwe mɛ, kplɔ-ɛ, a bo sɔn!»
20 Falawɔn bo ɖe ogbe na odansɔvi etɔnye tun ye boo va yi ɖo-e, emyɔ, osyɛ kpodo onu etɔn zɛtɛye kpo, na ye a bo tɔn le Ejiputi we oto la mɛ.