Ɛgbɛtɔye tɔ sanŋu xeni kɔ yi oji gbigbá ji le Babɛli
11
1 Le saa xixo, ogbe ɖokpo gee wɛ ye nɔ do le ɛgbɛ la mɛ seŋu a bo zan oxogbe ɖokpo ŋumyɔye. 2 Xena ɛgbɛtɔye lɛ le hwezɛdoa, ye va yi ci sinsahun mɛ le Cinɛya, bo jɛ oxwe do blɛ. 3 Ye bo lɔ na yenɔniɔye tun mɔ: «Mi va! Mí a gbo ɛkpɛnye, a bo mɛ ye le ozo mɛ!» Ɛkpɛn laye wɛ ye do gbá oxɔ, bo sɔ awɔn bo do wle ɛkpɛn laye ɖo ote. 4 Ye bo mɔ lɔ ke tun mɔ: «Mi va! Mí a ɖo toxo ɖokpo a bo gbá sanŋu xeni na kɔ yi oji ɖe, ota etɔn ba tɔ jiŋukunsin. E mɛ, nyikɔ míatɔn ba yi oji, mí ko mɔ gbakpe gbɔn nyixɔ la ji nɔ.»5 Xwetɔ Mawu bo jɛ ote va, a do kpɔn toxo la kpodo sanŋu xeni kɔ yi oji na ɛgbɛtɔye gbá nɔ la. 6 Xwetɔ Mawu bo lɔ tun mɔ: «Kpɔn! Ye nyi otogun ɖokpo gee, ye ɛmɛ zɛtɛye bo do ogbe ɖokpo gee nɔ, onu xena ye ɖo bo ka dosin nɔ la we bibɛmɛ mɛ mí lo kpɔn nɔ! Fifi, tito ti ɔn glo wiwasi na ye nɔ o. 7 Mi va! Mí a jɛ ote, a bo hlu ogbe yetɔn, ye ko mɔ se yenɔniɔye we ogbe nɔ o.» 8 Sɔn blɛ la wɛ Xwetɔ Mawu kankan ye le do nyixɔ la ji seŋu, ye bo jo toxo la ɖiɖo do. 9 Mi wɛ dɔn ye do ɖo nyikɔ na blɛ la tun Babɛli, ɖo, blɛ la wɛ Mawu hlu ɛmɛ zɛtɛye ni le nyixɔ la ji we ogbe do e wu le, sɔn blɛ la ke bɛ e kankan ye do nyixɔ la ji seŋu le.
Sɛmu we jijimɛviye
10 Sɛmu we jijimɛviye xɛn: otɔ ɖaxo la gɔ we oxwe owe godo, Sɛmu ji Apakicadi. Hwemɛnu e bo lo ɖo oxwe sandi ɖokpo nɔ. 11 Xena Sɛmu ji Apakicadi vɔ, e mɔ nɔ ɛgbɛ na oxwe sandi atun, e bo ji vikpɛ ŋusungloye kpodo nyɔnusiye. 12 Apakicadi ɖo oxwe ogban atun, bo ji Cɛla. 13 Xena Apakicadi ji Cɛla vɔ, e mɔ nɔ ɛgbɛ na oxwe sandi ɛnɛ ŋukun atɔn, e bo ji vikpɛ ŋusungloye kpodo nyɔnusiye.
14 Cɛla ɖo oxwe ogban, bo ji Ebɛ. 15 Xena Cɛla ji Ebɛ vɔ, e mɔ nɔ ɛgbɛ na oxwe sandi ɛnɛ ŋukun atɔn, e bo ji vikpɛ ŋusungloye kpodo nyɔnusiye.
16 Ebɛ ɖo oxwe ogban ŋukun ɛnɛ, bo ji Pelɛgi. 17 Xena Ebɛ ji Pelɛgi vɔ, e mɔ nɔ ɛgbɛ na oxwe sandi ɛnɛ ota atɔn, e bo ji vikpɛ ŋusungloye kpodo nyɔnusiye.
18 Pelɛgi ɖo oxwe ogban, bo ji Hlewu. 19 Xena Pelɛgi ji Hlewu vɔ, e mɔ nɔ ɛgbɛ na oxwe sandi owe ŋukun ɛcɛnɛ, e bo ji vikpɛ ŋusungloye kpodo nyɔnusiye.
20 Hlewu ɖo oxwe ogban ŋukun owe, bo ji Selugu. 21 Xena Hlewu ji Selugu vɔ, e mɔ nɔ ɛgbɛ na oxwe sandi owe ŋukun acowe, e bo ji vikpɛ ŋusungloye kpodo nyɔnusiye.
22 Selugu ɖo oxwe ogban, bo ji Nawɔ. 23 Xena Selugu ji Nawɔ vɔ, e mɔ nɔ ɛgbɛ na oxwe sandi owe, e bo ji vikpɛ ŋusungloye kpodo nyɔnusiye.
24 Nawɔ ɖo oxwe oko atun ŋukun ɛnɛ, bo ji Tela. 25 Xena Nawɔ ji Tela vɔ, e mɔ nɔ ɛgbɛ na oxwe sandi ɖokpo ota ɖokpo ŋukun ɛcɛnɛ, e bo ji vikpɛ ŋusungloye kpodo nyɔnusiye.
26 Tela ɖo oxwe kanɖegban, bo ji Ablamu, Nawɔ kpodo Halanu.
Tela we jijimɛviye
27 Tela we jijimɛviye xɛn: Tela ji Ablamu, Nawɔ kpodo Halanu. Halanu bo ji Lɔtu. 28 Halanu ku le toxo xe mɛ na ye ji-i le, le hwexenu na otɔ Tela mɔ gbɛ le ɛgbɛ. Toxo la wɛ nyi Ulu, bo le Calude we oto mɛ. 29 Ablamu kpodo Nawɔ ɖe nyɔnu. Ablamu syɛ nɔ nyi Salayi, Nawɔ syɛ bo nɔ nyi Milika xeni nyi Halanu vyɛ. Halanu wɛ nyi otɔ na Milika kpodo Yisika. 30 Salayi bo nyi ajikponɔ, e ko ɖo ovi ti.
31 Tela kplɔ ovyɛ Ablamu kpodo dagboyɔvi etɔn Lɔtu xena Halanu ji la, kpodo visyɛ Salayi xeni nyi ovyɛ Ablamu syɛ. Ye bo tɔn do okpɔ, bo lɛ le Ulu la, le Calude we oto la mɛ, a do sɔn yi Kana. Ye bo zɔn omɔ gbɔɔn bo yi Halanu we toxo mɛ, bo jɛ oxwe do blɛ. 32 Oxwe sandi owe ŋukun atun wɛ Tela nɔ ɛgbɛ na, bo ku le Alanu.