Mawu wasi okancica kpodo Nɔwe
9
1 Mi wɛ Mawu do na Nɔwe kpodo vikpɛ etɔn ŋusungloye, bo lɔ na ye tun mɔ: «Mi ji, a bo gba okun, a bo gɔ nyixɔ la ji seŋu. 2 Kanlin ɖekpekpe xeni le nyixɔ la ji, kpodo oxɛ ɖekpekpe, kpodo onu ɖekpekpe xeni nɔ gbɛ hwan le nyixɔ ji, kpodo ɛxumɛhwe zɛtɛye, na nɔ vɔ mi, a bo titɔ le ŋukɔn na mi. Ko sɔ ye sɔ do alɔ mɛ na mi. 3 Onu le ɛgbɛ ɖekpekpe xeni nɔ gbɛ hwan, na nyi onuɖuɖu na mi. Ko sɔ zɛtɛye sɔ na mi ɖi lena ko o sɔ omaye sɔ na mi ɖo ha. 4 Vɔ, mi ɔn ɖu kanlin ɖe kpodo ɛhun etɔn nɔ o. Ɛhun la mɛ wɛ ɛgbɛ etɔn le. 5 Mi ɖo na kan do e ji tun, ko na byɔ ohlɔn miatɔn, kanlin wɛ alo ɛgbɛtɔ wɛ kɔn ɛhun miatɔn ɖo onyi, ko na byɔ-ɛ ohlɔn miatɔn. Ko na byɔ ɛgbɛtɔ we ohlɔn do ɛgbɛtɔ si.6 Na ɛmɛ ɖe kɔn ɛgbɛtɔ we ɛhun ɖo onyi,
Ɛmɛ ke wɛ na kɔn ɛhun etɔn ɖo onyi.
Ɖo, Mawu wasi ɛgbɛtɔ do ninɔmɛ etɔn ji.
7 Vɔ miye, mi ji, a bo gba okun, mi gbakpe gbɔn nyixɔ la ji, a bo ji do e ji le nyixɔ la ji.»
8 Mawu bo mɔ lɔ na Nɔwe kpodo vikpɛ etɔn ŋusungloye kpo tun mɔ: 9 «Mɔ xɛn ka wasi okancica kpo miye kpodo jijimɛvi miatɔn xeye ni na va jɔ kplɔ mi do ye nɔ, 10 kpodo onu le ɛgbɛ zɛtɛye ni le kpo mi ye, oxɛye, kanlin oxwegbetɔn kpodo hɔntuntɔn zɛtɛye, kpodo onu le ɛgbɛ zɛtɛye xeni tɔn sɔn ɖaka ɖaxo la mɛ ye. Kanlin zɛtɛye seŋu xeni gbɛ le nyixɔ la ji, wɛ okancica la kan. 11 Ko na wasi okancica tɛye kpo mi: otɔ ɖaxo la ɔn mɔ hu onu le ɛgbɛ le nyixɔ la ji nɔ, otɔ ɖaxo ti ɔn mɔ gɔ nɔ bo crɔn nyixɔ la seŋu nɔ kpɔn o.» 12 Mawu bo lɔ tun mɔ: «Mi kpɔn okancica la we josi xeni na nɔ onyi le mɔ kpodo miye kpo, kpodo onu le ɛgbɛ ɖekpekpe xeye ni le kpo mi, kpodo jijimɛvi zɛtɛye xeni na va nɔ onyi, we dodomɛ xɛn: 13 ko sɔ anyiɖohwɛɖo tɛye sɔ ɖo sunwɔ mɛ, e na nyi okancica we josi le mɔ kpodo ɛgbɛ la we dodomɛ. 14 Na ko kpli sunwɔye le jigbe, anyiɖohwɛɖo bo ze le sunwɔ mɛ, 15 ko na flin okancica tɛye xeni le mɔ kpodo miye, kpodo onu le ɛgbɛ zɛtɛye mɛ. Otɔ ɖaxo ɖe ko mɔ gɔ nɔ, a bo do crɔn onu le ɛgbɛ ɖekpekpe nɔ. 16 Anyiɖohwɛɖo la na nɔ sunwɔ mɛ, ko bo na kpɔn-ɛ, e mɛ, ko na flin okancica mavɔmavɔ xeni le mɔ Mawu kpodo onu le ɛgbɛ zɛtɛye mɛ, onu le ɛgbɛ ɖekpekpe xeni gbɛ le nyixɔ la ji.» 17 Mawu bo mɔ lɔ na Nɔwe tun mɔ: «Okancica xena ko sɔ ɖo onyi le mɔ kpodo onu le ɛgbɛ ɖekpekpe xeni le nyixɔ la ji we dodomɛ la we josi, mɛ.»
Nɔwe we jijimɛviye
18 Nɔwe vikpɛ ŋusunglo xeye ni tɔn le ɖaka ɖaxo la mɛ ye xɛn: Sɛmu, Camu kpodo Jafɛti. Camu bo ji ovi ŋusunglo ɖe bo ɖo nyikɔ ni-i tun Kana. 19 Nɔwe vikpɛ ŋusunglo atɔn mɛ laye wɛ va gba okun bo gɔ nyixɔ la ji seŋu.
20 Nɔwe wɛ nyi oglelɛtɔ tantyan xeni do vɛntin. 21 E bo nu vɛn, bo mu, bo jɛ govɛ le avɔva etɔn mɛ. 22 Camu xeni ji Kana, kpɔn otɔ le ɛsɛgbeji, bo va yi lɔ na nɔvyɛ owe laye le gaji. 23 Sɛmu kpodo Jafɛti, sɔ awu ɖaxo ɖe, bo hɛn otomɛ-otomɛ ni-i do okɔgbe, bo zɔn gɔgwɛ gbɔɔn bo va yi hwla ɛmɛ mɛ na yetɔ. Xena e nyi tun okɔ wɛ ye ɖo akpa-akpa, ye ɔn kpɔn ɛmɛ mɛ na yetɔ la. 24 Xena ahan va hɔn na Nɔwe, e se onu xena ovi kpotwi etɔn Camu wa kpo-e. 25 E bo lɔ tun mɔ:
«Nudo wɛ na jɛ Kana ji!
Ɛmɛxixɔye we ɛmɛxixɔ wɛ e na nyi
Na nɔvyɛye!»
26 E bo mɔ lɔ tun mɔ:
«Ɛkpɛ na Xwetɔ Mawu, Mawu Sɛmutɔn,
Kana ni nyi ɛmɛxixɔ na Sɛmu,
27 Mawu ni na na onu na jɛ onu ji na Jafɛti,
E ba nɔ nɔ Sɛmu we avɔvaye mɛ,
Kana ba nyi ɛmɛxixɔ na Jafɛti!»