Otɔ la va xu le nyixɔ la ji
8
1 Mawu ɔn wɔn Nɔwe kpodo oxwe kanlin, ogbe kanlin xeye ni le ɖaka la mɛ kpo-e ye. E bo na na jɛhɔn ɖe nyi gbɔn ɛgbɛ la mɛ, ɛsin la bo jɛ ɖiɖe drɔn ji. 2 Ɛsinjɔtyɔn xeye ni le nyixɔ gɔ laye kpodo jiŋukunsin we ɛsinmɔ laye bo tu. Oju ni ja nɔ la can bo ɖo ote. 3 Ɛsin laye jɛ xuxu ji viɖe-viɖe le nyixɔ la ji. Otɔ la gɔ we onyihinhɔn sandi ɖokpo ota atun godo, ɛsin la yi odo. 4 Mi wɛ le onyihinhɔn fɔtɔn ŋukun owegɔ gbe, na osunzan acowegɔ la, ɖaka la ŋutɔ va yi gli do okpóye ji le Alala we kansin mɛ. 5 Mɔsinha wɛ otɔ la xu nɔ gbɔɔn do yi osunzan owogɔ mɛ. Le osun owogɔ la we azan tantyan gbe, okpóye we ota ze.6 Onyihinhɔn kanɖe godo, Nɔwe hun flɛsɛ xena e ɖo na ɖaka la, 7 e bo ɖe cankpoli tɔn, e bo yi nɔ bo gbɔn nɔ, gbɔɔn do yi hwexenu na ɛsin va xu le nyixɔ la ji. 8 Nɔwe mɔ ɖe hɔnnɛ ɖokpo tɔn, ni a do kpɔn tun ɛsin la jɛ odo jaa. 9 Vɔ, hɔnnɛ la ɔn kpɔn ofi ti na e na jɛ do, ɖo, ɛsin mɔ gbɛ le nyixɔ la zɛtɛye ji. Mi wɛ e mɔ trɔ va Nɔwe kɔn, e bo drɛn alɔ, bo wle-e do ɖaka la mɛ. 10 E nɔ ote na onyihinhɔn acowe, e bo mɔ ɖe hɔnnɛ la tɔn-ɛ ke. 11 Hɔnnɛ la trɔ va le hwedo, kpo olivutinma yɔyɔ ɖokpo le ɛbɛ nu. Nɔwe bo nyɔ-ɛ tun ɛsin la bo ɖe drɔn le nyixɔ la ji. 12 E bo mɔ nɔ ote na onyihinhɔn acowe ke, bo mɔ sɔ hɔnnɛ la ɖodan, vɔ, xena e sɔn, e ɔn mɔ lɛkɔ va e kɔn.
13 Le oxwe xe mɛ na Nɔwe ɖo oxwe sandi ɛdɛn ŋukun ɖokpo le, we azan tantyan la gbe, le osun tantyan la mɛ, Nɔwe fo ota na ɖaka la, e na kpɔn kpoŋu, e kpɔn tun nyixɔ la ji bo xu. 14 Onyihinhɔn oko atun ŋukun owegɔ gbe, le osunzan owegɔ la mɛ, nyixɔ la ji xu sesese.
15 Mi wɛ Mawu lɔ na Nɔwe tun mɔ: 16 «Tɔn le ɖaka la mɛ, myɔ kpodo siwe, vikpɛ ŋusunglo tɔweye, kpo vwesiye. 17 O ba ɖe kanlin hamɛ-hamɛ zɛtɛye ni le ɖaka la mɛ kpo we ye can tɔn, oxɛ laye, oxwegbe kpo hɔntun we kanlin laye, onu ɖekpekpe xeni nɔ gbɛ hwan laye. Ye ni gbakpe gbɔn nyixɔ la ji, a bo ji, a bo gba okun.» 18 Nɔwe kpodo vikpɛ etɔn ŋusungloye, kpodo osyɛ kpodo visyɛye, tɔn le ɖaka la mɛ. 19 Mi wɛ kanlin hamɛ-hamɛ laye, oxɛ laye, oxwegbe kpo hɔntun we kanlin laye, onu le ɛgbɛ vivi laye can tɔn le ɖaka la mɛ, ɖe kplɔ ɖe do.
20 E mɛ godo, Nɔwe wasi ovɔsinsan we agba ɖe na Xwetɔ Mawu. E bo sɔ kanlinye le kanlin xeye ni ɔn nyi osu na ye do ye mɛ, bo sɔ oxɛye le oxɛ xeye ni ɔn osu na ye do ye mɛ, bo do wasi ovɔsinsan fifyɔ le agba la ji. 21 Xwetɔ Mawu se ovɔsinsan la we owan, e bo jɛŋu ni-i, mi wɛ e lɔ le eɖe mɛ tun mɔ: «Bɛ sɔn egbe, ko ɔn mɔ do onu nyixɔ nɔ do ɛgbɛtɔ wu. Oxojɔxo wɛ, bɛ sɔn ovyu gbɔɔn wɛ ɛgbɛtɔye o nɔ ɖo susu nyanylaye, vɔ ko ɔn mɔ vɔ okun na ɛgbɛtɔye nɔ gbeɖe ɖi lena ko wasi-i ɖo xe ha.
22 Na nyixɔ la gbɛ le,
Ɛjinukun dido, kpodo ɛjinukun ɖiɖe,
Zozo kpodo vivɔ
Ofyo kpodo oju hwenu
Ozan kpodo oklo
Ɔn na ɖo ote gbeɖe.»