Nɔwe ɖyɛ ɖaka ɖaxo la mɛ
7
1 Xwetɔ Mawu lɔ na Nɔwe tun mɔ: «Ɖyɛ ɖaka ɖaxo la mɛ, myɔ kpodo xwedo tɔwe zɛtɛye seŋu, ɖo, ko kpɔn tun myɔ ɖokpo wɛ nyi ɛmɛ jijwɛ le ŋumɛ na-a le jijimɛ xeye mɛ. 2 O na sɔ kanlin osu kpodo osi donu acowe, le kanlin zɛtɛye xeni nyi osu na ye do mɛ; o ba mɔ sɔ kanlin owe le kanlin xeye ni ɔn nyi osu na ye do ye mɛ, osu kpodo osi, 3 le oxɛye can mɛ, o na sɔ osu kpodo osi donu acowe, jijimɛvi yetɔn ba do nɔ ɛgbɛ le nyixɔ la ji. 4 Ɖo, e drɔn onyihinhɔn acowe, mɔ ko bo na wasi na oju a ja na onyihinhɔn kanɖe, ozan kanɖe, ko bo na vɔ okun na onu le ɛgbɛ ɖekpekpe xena ko wasi le nyixɔ la ji.» 5 Nɔwe bo wasi onu zɛtɛye xe we ogbe na Xwetɔ Mawu ɖe ni-i.6 Oxwe sandi ɛdɛn wɛ Nɔwe ɖo na otɔ ɖaxo ɖe do gɔ le nyixɔ la ji. 7 E bo ɖyɛ ɖaka ɖaxo la mɛ kpodo vikpɛ ŋusunglo etɔnye, kpodo osyɛ, kpodo visyɛye, ye ko mɔ do ku otɔ ku nɔ. 8 Le kanlin xeye ni nyi osu na ye do ye kpodo xeye ni ɔn nyi osu na ye do ye mɛ, oxɛye kpodo kanlin ɖekpekpe xeni nɔ dɔn adɔ gbɔn nyixɔ mɛ ye, 9 owe-owe yetɔnye ɖyɛ ɖaka ɖaxo la mɛ le aha na Nɔwe, osu kpo osi kpo, ɖi lena Mawu ɖe ogbe etɔn na Nɔwe ɖo ha.
10 Onyihinhɔn acowe godo, otɔ gigɔ ɖaxo la bɛ, ɛsin bo lo yi nyixɔ la ji nɔ seŋu.
11 Le oxwe xe mɛ na Nɔwe ɖo oxwe sandi ɛdɛn le, we osun owegɔ la, we azan fɔtɔn ŋukun owegɔ gbe, ɛsin tɔn kpo hɔnhlɔn kpo sɔn ɛsinjɔtyɔn zɛtɛye xeni le nyixɔ gɔ ye, mi wɛ jiŋukunsin we ɛsinmɔye hun. 12 Oju bo jɛ jija ji kɔn do nyixɔ la ji gbɔɔn na onyihinhɔn kanɖe, ozan kanɖe. 13 Gbegbe mɛ la wɛ Nɔwe ɖyɛ ɖaka ɖaxo la mɛ kpodo vikpɛ ŋusunglo etɔnye, Sɛmu, Camu kpodo Jafɛti kpo. Nɔwe syɛ kpodo visyɛ atɔn laye can bo ɖyɛ e mɛ, 14 kpodo kanlin hɔntuntɔn kpodo oxwegbetɔn hamɛ-hamɛye, onu le ɛgbɛ vivi hamɛ-hamɛye, oxɛ hamɛ-hamɛye, onu ɖekpekpe xeni nɔ gbɛ zɔn. 15 Onu le ɛgbɛ ɖekpekpe we osu kpodo osi va Nɔwe kɔn le ɖaka ɖaxo la mɛ. 16 Ye mɛ hamɛ-hamɛye bo ɖyɛ e mɛ, osu ɖokpo osi ɖokpo, ɖi lena Mawu ɖe ogbe etɔn na Nɔwe ɖo ha. E mɛ godo Xwetɔ Mawu bo tu ohɔn do Nɔwe.
Otɔ ɖaxo ɖe gɔ le nyixɔ ji
17 Ɛsin xeni sɔn jiŋukunsin nɔ kpodo xeni sɔn nyixɔ gɔ nɔ la, bo jɛ e ji nɔ gbɔɔn na onyihinhɔn kanɖe. Ɛsin bo su gbɔɔn bo kɔ ɖaka ɖaxo la do yi oji. 18 Ɛsin la bo su taŋu gbɔɔn ɖaka ɖaxo la bo xo yi aɖusi amyɔ nɔ le ɛsin ŋukɔn. 19 Otɔ la bo mɔ gɔ do e ji nɔ gbɔɔn okpó xeye ni yi oji zɛtɛye le ohwe we agɔye bo bu. 20 Ɛsin la bu okpóye bo gbɔn ye wu na abɔ acowe adaɖe ha. 21 Onu le ɛgbɛ ɖekpekpe xeni le nyixɔ la ji wɛ ku. Oxɛye wɛ, kanlin hɔntuntɔn kpodo oxwegbetɔnye wɛ, onu ɖekpekpe xeni gbɛ hwan le nyixɔ la ji nɔ wɛ, ɛgbɛtɔ zɛtɛye seŋu, wɛ ku. 22 Le nyixɔ xuxu la ji, onu xena gbigbɔ gbɛ le ŋɔtinu na, zɛtɛye wɛ viva. 23 Mi wɛ Mawu vɔ okun na onu le ɛgbɛ ɖekpekpe xeni le nyixɔ la ji, sɔn ɛgbɛtɔ ji gbɔɔn do jɛ kanlinye, onu le ɛgbɛ viviye, kpodo oxɛye ji. E vɔ okun na ye seŋu, Nɔwe kpodo ɛmɛ etɔnye kpodo kanlin xeye ni le e kɔn le ɖaka ɖaxo la mɛ ye, jan wɛ gan. 24 Otɔ bo gɔ le nyixɔ la ji na onyihinhɔn sandi ɖokpo ota atun.