Mawu tun he bo na gu okun na ɛgbɛtɔye
6
1 Xena ɛgbɛtɔye jɛ susu ji le nyixɔ la ji, bo ji nyɔnuviye nɔ, 2 jiŋukunsintɔye kpɔn tun ɛgbɛtɔye we vikpɛ nyɔnuvi laye bo nyɔhwyan, ye bo can le ye mɛ, bo ɖe. 3 Mi wɛ Xwetɔ Mawu lɔ tun: «Ko ɔn jo Gbigbɔ tɛye do ni a nɔ ɛgbɛtɔ mɛ gbɔɔn do yi nɔ o. Gbaza kpoŋu jan wɛ ɛgbɛtɔ nyi. Bɛ sɔn fifi, ɛgbɛtɔ ɔn nɔ ɛgbɛ hugan oxwe kantɔn nɔ o.» 4 Le hwe mɛ la nu, ɛmɛ jwasuye le nyixɔ la ji, ye bo mɔ le gbɔɔn do jɛ hwexenu na jiŋukunsintɔye va ɖo oxo kpodo ɛgbɛtɔ vikpɛ nyɔnuviye, bo ji ovi le ye wu. Ye wɛ nyi ahwanfuntɔ ɖaxo, kpo kanlinsu hwe mɛ la nu tɔn ye.5 Xwetɔ Mawu kpɔn tun ɛgbɛtɔye we onu nyanyla wiwa bo va hugan onyi le nyixɔ la ji. Le hwe zɛtɛye nu, onu nyanyla wiwa jan wɛ nɔ le ayixa mɛ na ye. 6 Mi wɛ, e vɛ na Xwetɔ Mawu tun e ɖo ɛgbɛtɔ do nyixɔ la ji, e bo se vivɛ taŋu sɔn oji etɔn mɛ. 7 E bo lɔ tun mɔ: «Ko na gu okun na ɛgbɛtɔ na ko wasi le nyixɔ la ji, gbɔɔn do jɛ kanlinye ji, onu le ɛgbɛ viviye, kpodo oxɛye can. E vɛ na-a taŋu tun ko ɖo ye.» 8 Vɔ, Xwetɔ Mawu ɖe dɔmɛnywɛ sɔ xlɛ Nɔwe.
Mawu tun he bo na hwlɛn Nɔwe gan
9 Nɔwe we gbexo xɛn: Nɔwe nyi ɛmɛ jijwɛ, ye ko nɔ kpɔn oxo ɖe nɔ lɔ do e wu, le ɛgbɛtɔ hwemɛnutɔn ye mɛ. E zɔn gbɔn Mawu we omɔ ji. 10 E ji ŋusunglo atɔn: Sɛmu, Camu, kpo Jafɛti.
11 Mawu kpɔn tun nyixɔ la ji bo gɔ kpodo onu nyanyla wiwa kɛɖɛ, danu wiwa bo hugan onyi. 12 Mawu kpɔn nyixɔ la ji, bo kpɔn nyanyla wiwa kɛɖɛ, ɖo, ɛgbɛtɔ zɛtɛye bo lo zan ɛgbɛ gbigble nɔ. 13 Mawu lɔ na Nɔwe tun mɔ: «Ko sɔ ogbeta a do gu okun na ɛgbɛtɔ zɛtɛye le nyixɔ la ji. Yee wɛ dɔn onu gbigble wiwa do gɔ nyixɔ la ji. Ko na crɔn ye kpo nyixɔ la kpo. 14 Ta ɖaka ɖaxo ɖokpo, kpodo otin adodwe. O ba ta ɖaka la ɖi sanŋu ha, a bo ma-ɛ sonu-sonu, a bo si awɔn do dɔmɛ kpodo goto kpo ni-i. 15 Lena o na wasi-i ɖo xɛn: gigagamɛ etɔn na nyi sandi ɖokpo ota atun, kpolimɛ etɔn ba nyi abɔ oko atun, tega etɔn ba nyi abɔ fɔtɔn. 16 O na tu ota na ɖaka la, a bo jo tɛnxo vɔvɔ ɖe do ɖaka la kpodo ota tutu la gblamɛ, tɛnxo vɔvɔ la ba yi abɔ mamɛ ɖopko. O na ɖo ohɔn do akpa ɖokpo na ɖaka la, a bo ma ɖaka la do donu atɔn sɔn odo do yi jigbe. 17 Mɔ, ko na na na otɔ ɖaxo ɖe na gɔ le nyixɔ la ji, a do vɔ okun na onu le ɛgbɛ zɛtɛye. Onu ɖekpekpe xeni gbɛ le nyixɔ la ji, na crɔn. 18 Vɔ, ko na wasi okancica tɛye kpo we. O na ɖyɛ ɖaka la mɛ, myɔ kpodo, vikpɛ ŋusunglo tɔweye, kpodo siwe, kpodo vwesiye. 19 Le onu xeni le ɛgbɛ hamɛ-hamɛ zɛtɛye mɛ, o na sɔ ye owe-owe, osu kpodo osi, a do ɖyɛ ɖaka la mɛ, myɔ kpo ye kpo ba do gan. 20 Le oxɛ hamɛ-hamɛye, kanlin hamɛ-hamɛye kpodo onu le ɛgbɛ viviye mɛ, osu kpo osi kpo na va kɔn we, a bo do gan. 21 Va yi kan onu na ye nɔ gbɛ ɖu do ɖi we ji, a bo xuxu ye ɖo, mi wɛ na nyi onuɖuɖu na myɔ kpo ye kpo.» 22 Onu xena Nɔwe wasi mɛ, e bo wasi onu laye pɛpɛpɛ, ɖi lena Mawu dɔn-ɛ ɖo ha.