9
1 Na koo Yesus madhɛsɛ zugo lɔgɔ na sɛɛsɛ, “Ga shigitɔ! Mɛa bhɛa ngazukta chillɛ ngayaye, ga ale shaw ngarɛssɛayo na ɛlla ko bhee orɛ kolea lɔmɛa :Tumu zugo barartina nɛnɛ, ɛllɛ.”Lɔga Bhɔdhinɛnɛa :Ɛa Yesusi
2 Na Yesus hunaa saniwa ungo illɛy na tewa ushaye, ibha Betiros ko Yohanis ko Yaykob na dhi kari na irrɔgɔ kutula bo rammaya kona na tɛldi ngonu. Na yɔk dha bere ɛl bhichang. Na hunaa ngani ɛlla ngonuye, ɛa Yesusi bhɔnyɛsɛ yɔk kawarre. 3 Na ruminyaa gɛnyɛ bhɔttɛ na te hɔl hurr na jarta chɔɔ ruminyaa bo hɔla churrɛa :zugu bay ngaya goore. 4 Na argi Muse ko Eliyas hunde dhullanɛ dɛk na mɛzzɛɛ ko Yesuse.
5 Na Betiros sɛɛsɛ Yesus, “Hira Madhdhiye, nɔng ngaya kɛlɛo ngayaye, a challi. Na mɛa ga karakto gahachinde ku sizzi na kona ke nunu, kona ke Eliyas kona ke Muse. 6 Nɔng dha bere Betiros bhee yokkonɛ lɔgɔ ngangaye, a ngaya lɔkte se koyogoy ninggɛ na yɔk dɛɛsɛ na ɛngɛrsɛ bho gooreye.
7 Na idho ko na chɛbu yɔk dhis. Na idhogiye toye shigi lɔkte sennɛ, “Erite nan kibhɛsɛn hiniye a nganda. Shigi nɔng!”
8 Na yɔk hunaa ngani budhinɛna na gunynyɛa baye, argi Yesus sɔng hunde ɛl ko yɔk kari na zugaa gina dhaa garayɛye. 9 Na hunaa ngani shidhinyana kutulɔye, yogɛsɛ :Yesusi lɔgɔ na sɛɛsɛ, “Ngalɔkta wa orroye hir kona ngayogɛsɛno ko bhee Hiri Hoynɛ ale bansanɛ rɛsɛyɔ.” 10 Na lɔgaa yogɛsɛna :Yesusi tɔlɔmɔ hinisichinne. Na mɛzzi kɛngɔ na lami bhɛa senno kataktɛ ngalɔkta sennɛ, “bhɛa ale bansanɛa rɛsɛyɔye” hologun.
11 Na yɔk ghini nɔng na seyɛsɛ, “Ngangaye yɔk zuga madhdhɛa zugo Damiya Tumu bere kàjjɛa Muse sennɛ, ‘Hunde Kirisos ba ngani kugooye, maya sabbɔ jimmana :Eliyasi’ kɛ ɔng?”
12 Na nɔng Yesus yagɛsɛ na sɛɛsɛ, “A dhere chi. Nɔng Eliyas maya jimmana sabbɔ na kun na me lɔgɔ kumulɔng shɛɛ na ɛl damiya bɔɔ sabbune. Na lɔga Tumu bere kɔ̀gɔdhdhɛsɛna dadab sennɛa, ‘Hiri Hoynɛ maya ale chɔllanɛ lɔga bo mɛra na marrɛ :zugu,’ dha bere kɔ̀gɔdhdhɛsɛn kɛ ɔng? 13 Nɔng anye mɛa ga kòyogogungɔ! Eliyas nɔng annaa bere kowa na tiranydɛa :zugu gɛrrɛng gɛrrɛng damite hinɛ :yɔkkuye kumulɔng, na lɔga gɛnyɛ urruknyɛsɛa ngadamita bere kɔ̀gɔdhdhɛsɛn dadabte.”
Lɔga Obhoniseonɛa :Yesusi Mɛnɛngi Bhɛa Eriyny
14 Na yɔk hunaa honynyo na dokkɛa bhɛaa dhɔynɛnɛa zuga kɔbhbhɛa Yesus ku genaye, argi hunde muknyɛsɛnɛ :zuga bo mɛra na ɛkkɛnyannɛ ko zuga madhdhɛa zugo Damiya Tumu bere kàjjɛa Museye. 15 Na zugo kumulɔng hunaa ngani orrɛa Yesuse, iwachiyɛ goore na ngeya gɔrre nɛnde na kisattɔ.
16 Na nɔng ghinu yɔk na sɛɛsɛ, “Lɔkte ɛkkɛnyannɛnɛo ko yɔkte, a lɔk giyong?”
17 Na hir kona yogɛsɛ Yesus lɔgɔ zukke kɛrghɛnɔ na sɛɛsɛ, “Hira madhdhiy, anye kɔlɔmi erite nanu bɔɔ tɔgɛsɛn :mɛnɛngiyɔ na kadhdhakka a ibhinɛ. Na wa kuguyɛyɛu bhɛa nunu. 18 Na kalde sennanaye dhagɛ ba dhus dhus na dhohu tugɔ se ‘Nyɛ nyɛ nyɛ!’ na rim nigiya na rɛ dhɔrɔgɔsana kak kak. Na wa kighini zuga kɔbhbhinyɛa inye na kobhonisiyo mɛnɛngi. Na yɔk ngani ngaɔanɛayo.”
19 Na yagɛsɛ :Yesusi na sɛɛsɛ, “Ngatenyda Tumu ngayɛbhbhooye, ngangaye anye ale kàbhak kari dirr chɔɔ ore? Na lɔga gu ale kinyimi chɔɔ ore? Ga ayaganyu eri se!”
20 Na hoyɛy eri na ayɛsɛ nɔng. Na mɛnɛngi hunaa orro Yesuse, dharaya eri na dhagɛ ba ke tiri na eri dadakkɛ na dhohu tugɔ se, “Nyɛ nyɛ nyɛ!”
21 Na Yesus ghinu eri chɔgɔnɛ na sɛɛsɛ, “Eri unga messonɛa nganga mɛa te isɔng?”
Na nɔng chɔgɔnɛ yagɛsɛ na sɛɛsɛ, “Bere messono erimo. 22 Na kali kali dharachchana na ujjugɛsɛn go ko ma na kindɔ. Na mɛa hunde kako ɔande, ga any kòtowonydakkiny :aggeu na ɛyaiyɔ.”
23 Na sɛɛsɛ :Yesusi, “‘Hunde kako ɔande’ seni kɛ ɔng? Nɔng hirre yɛbhbhany anyeye lɔkte dhandal bhɛa nɛnɛye kumulɔng ɔana :Tumu.”
24 Na eri chɔgɔnɛ yogo lɔgɔ goore ke tiri na seu, “Kɛyɛbhiyɔ! Na nɔng ɛany na ko hini ngakadhaginɛno.”
25 Na Yesus hunaa orro zuga bo mɛra hunde ngessanɛ gɔra nɛnɛye, wologu mɛnɛngi na sɛɛsɛ, “Ngamɛnɛngita dhiy eri nyabha na ibhi chɔɔ kadhdhakkaye, kesennaginy bhona bhɛa ngaerita na ok dhul na sɛgɛn ngawogɛsɛni!”
26 Na mɛnɛngi aru wuy goore na dhagɛ eri ba gɛrrɛng gɛrrɛng na bhona. Na eri dhɔyiyaa ko bhee zugo ga mɛra senɛ, “Dhaa ere!” 27 Na nɔng Yesus ibhu eri siyɔ na dhɔnga na bana na chilu tunɔ.
28 Na Yesus ko zuga kɔbhbhɛa nɔng hunaa hɛa na tunnukkɛa doriye, ghini :zuga kɔbhbhɛa nɔng bhichang na seyɛsɛ, “Ngangaye, mɛnɛngiyaa gina bhee agge ngakobhoniseonɛoyoye a ore?”
29 Na nɔng yagɛsɛ na sɛɛsɛ, “Mɛnɛngite ku ngangaye bhonsana hunde zugo chibbɛ rɛhi hunynɛn na allinɛ ko Tumuye sɔng.”a
30 Na yɔk dhɔyɔ ngonu na banda na ago na dha gɔra baa Gelila. Nɔng Yesus bere marra bhɛa senno zug gena ngakataktɛ bhee ɛlɛ yɔkkuye, 31 ke ngaya bere madhɛsɛn zuga kɔbhbhɛa nɔng sɔng lɔgɔye. Nɔng bere madhɛsɛna na senɛsɛna, “Hiri Hoynɛ ale kìbhbhana na kàjjɛ zugo, na nissɛ na sani igingeyɔ ungo sizzi na bansanayɔ.” 32 Yɔk dha bere ngalɔkta yogɛsɛn :Yesusiye ngani katagato. Na tɛngɛrɛ bhɛa senno kighindɛ ngalɔkta bhɛa ku hologun.
Lɔga Ɛkkɛnyannɛnɛa Zuga Kɔbhbhɛa Yesus Na Kataktɛ Inde Bu Bhɛa Nɛye
33 Na koo hoya chɔɔ Kibirom. Na hunaa tunnukkɛa dori konaye, nɔng Yesus ghinu zuga kɔbhbhɛa nɔng na sɛɛsɛ, “Wa gɔrɔ gɔrɔ ɛkkɛnyannɛnɛo lɔk giyong?” 34 Na yɔk dhittɛ rib ke ngaya dhaa gɔrɔ gɔrɔ ɛkkɛnyannɛnɛ hunde bhɛa nɛ bu :noyye.
35 Na nɔng hunaa ihono bayte, eleo zuga kɔbhbhɛa nɔng ku 12 na sɛɛsɛ, “Inde hin bhɛa senno keteɛ hira bo bhɛa zugonyde, maya lachchana rɛ goore na kay zugo kumulɔng.”
36 Na ibha erite chinyi kona na ojju kɛrghɛna nɛ. Na dhɔnga na bou na sɛɛsɛ yɔk, 37 “Inde lammana ngaerroya chichiye kona sara ganyuye, ngangaye lammanany anye. Na inde lammananyde, ngangaye lammana chɔɔ hira bere ekkononyi.”
Zukte Lɔga Ga Ngamarrɛoye Kumulɔng Agga Tɔrriyɛa Agge
38 Na Yohanis sɛɛsɛ Yesus, “Hira Madhdhiy, agge wa karto hir kona hunde obhoniseono mɛnɛnga barartina sara gunyuye, na kataganydɛo ke ngaya hira kɔbhbhinyi inye hunde nayoye ngaanɛoye.” 39 Na sɛɛsɛ :Yesusi, “Ngakanyɛo! Nɔng hirre me lɔga bo dhandala barartina sara ganyuye, ke tiri ngawokkogonyo na kedhdhonyo, 40 ke ngaya zukte lɔga ga ngamarrɛoye kumulɔng, anɛ ga tɔrriyɛa aggeye. 41 Ga shigitɔ! Zukte ajjungɛ ma gee chichi sara ganyu ke ngaya anɛo zuga kɔbhbhanyu anyeye kumulɔng, ale dhɛynɛyɔ.
Lɔga Ibbayɛa :Yesusi Zuga Kɔbhbhɛa Nɔng
42 “Inde ibhbhana ngaerroya chichi yɛbhbhanyɛ anyeye kona na tis na keme lɔga gɛrsaye, nɔng hunde kìbhta golua bo dhidhinga na kɛ̀chɛbtɛsɛ ngo na kùjjuktɛsɛ yirisi, anda a challi. 43-44 Na hunde siyɔ tisseny na me lɔga gɛrsaye, kedhdha na ujjuga. Ko bhee lɔmɛ sɛnɔ kari na kɔɛ goa iho dhul ngadhiynɛnao lɔmma kuruyoa ngarɛssɛayo, hunde tɔlɔ dhɔnɛ na ok bhɛa basseya iho dhul, anda a challi. 45-46 Na hunde jagari tisseny na me lɔga gɛrsaye, kedhdha na ujjuga. Ko bhee lɔmɛ jagarɛ kari na kɔɛ goa iho dhul ngadhiynɛnao lɔmma kuruyoa ngarɛssɛayo, hunde ngɔl na ok bhɛa basseya iho dhul, anda a challi. 47-48 Na ko nɔng kawari hunde tisseny na me lɔga gɛrsaye, tukuso na ujjuga. Ko bhee lɔmɛ kawarɛ kari na kùjjukkagɛiny goa iho dhul ngadhiynɛnao lɔmma kuruyoa ngarɛssɛayo, hunde tɔlɔ dhɔnɛ na ok bhɛa lɔmɛa :Tumu zugo, anda a challi. 49 Yɔk zugo kumulɔng ale kìllob gogiye goore huna shɔyya kànyanganisiyɛa aha. 50 Nɔng shɔy a choy. Na nɔng hunde choyna nɛnɛ kagar, anda bhɛa senno keteɛ choy sɛgɛn iyikkano ɛnɛng? Na mɛa ko igge tɛhɛyɛ ko shɔy na bhaga ba shɛɛ na shiktɛ kɛngɔ.”