Lɔga Kennɛnɛa :Tɛriyɔ Ko :Hiriyɔ
10
1 Na koo Yesus bana na dhɔyu ngonu na ogo baa Yudha ko baa iho Yordanosɔ tandɔ. Na zuga bo mɛra hoya na muknyɛsɛ nɔng sɛgɛn. Na nɔng madhu damiya taa nɛnɛ.2 Na zuga kɔbhbhɛa damiya Bhɛrɛsi gena hoya na illobo nɔng na ghini na seyɛsɛ, “Ngangaye hiri bhɛa dhɔyɛa tɛri na kennɛnɛa bere Damiya Tumu ajjiy :Muse kìgombɛsɛ oo ngani?”
3 Na ko nɔng ghinu na sɛɛsɛ, “Nɔng Muse hunde bere ajjung lɔgɔye, bere sennagung ɛnɛng?”
4 Na yɔk yaktɛsɛ na seyɛsɛ, “Nɔng Muse bere igomoa na sewa, ‘Hiri hunde se kegendɛ ko tɛriye, maya kɔdhdhɛsɛn lɔga kennɛnɛa dadabɔ na chuktɔ.’”
5 Na sɛɛsɛ :Yesusi, “Nɔng Muse bhee bere kɔdhdhagɛung ngalɔkta kerɔye, a ngaya sabbi annɛung dhandaliye. 6 Nɔng bere sabbɔ bɛrgua bere kèghendonɛa aha kumulɔng, Tumu annaa bere ‘ghendono zugo na kona ojjo ke may, kona ojjo ke ngahi.’ 7 ‘Na nganda a bhee bere keghendonɛ yɔk na hira maya dhɔyɛ jɔnɛ ko chɔgɔnɛ na arrabhbhanɛnɛ ko tɛriya nɛnɛ,a 8 na rammane anɛ rɛa dhɔnɛnaye.’ Na yɔk kalda wurtɔ te rɛye dhɔnɛ na ramman ngani ngayo. 9 Na zuga bere arrabhbhana :Tumu, hiriyɔ ngakedhdhi.”
10 Na yɔk hunaa wokkɛa dorigiyeye, yɔk zuga kɔbhbhɛa nɔng imimishiyo ngalɔkta sɛgɛn na ghiniyɛ. 11 Na yagɛsɛ :Yesusi na sɛɛsɛ, “Hirre kennɛ ko tɛriya nɛnɛ na gam konaye, bhɛa tɛriya nɛnɛ bɔɔ dhɔtta ngangaye ngani me lollumo. 12 Na ko nɔng tɛrite kennɛ ko hira nɛnɛ na gam :konnɔye, ngangaye ngani me lollumo.
Lɔga Tuhɛa :Yesusi Erro
13 Na kali kona zugo hoyɛy erro na ayɛsɛ Yesus na katadhɛ siyɔ na kutusɔ. Na yɔk zuga kɔbhbhɛa Yesus wologo zugo na erro ngahonynyɛ. 14 Na nɔng Yesus hunaa orro ngalɔktaye dɛbu na sɛɛsɛ, “Erro any kohoya bhɛa nanu, ngakanyɛo ke ngaya zukte lɔ :Tumuye heo ko ngaerroya rɛye. 15 Ga shigitɔ! Inde hin bhɛa senno kɔtɔlɔmɛ :Tumuye, maya hɛt ko eri. Nɔng hunde ko eri ngani kɛtɛhɛyɛtoye, bhee ale lɔmɛ :Tumu ninggɛ dhul.” 16 Na koo ibha erro na bou na tadhɛ siyɔ na tuhu.
Lɔga Hira Aha Mɛra
17 Na Yesus hunaa ngani senno kɔgɔdhay wochinde, hir kona ngea gɔra nɛnɛ na tɔgɔdhɛsɛ kɔmma na sɛɛsɛ, “Ngahirra chal madhdhiyte, ngangaye bhɛa keni kɔ̀jɔyay basseya iho dhul maya kemesi ɔng?”
18 Na nɔng Yesus yagɛsɛ na sɛɛsɛ, “Sennagany ‘hira challa’ kɛ ɔng? Nɔng inde chalde a Tumu dhɔnɛnɛ sɔng. Kona ninggɛ. 19 Yɔk lɔga ɛlla Damiya Tumu bere kàjjɛa Muse inye gayɔ. Yɔk ngalɔktonu sennɛ, ‘Hiri ngakɔdhi, lollumo ngamesi, ngaogornɛni, lɔga ku butomo zugo ngamagɛsɛni, ahaa zugony ngatabhbhani, chogonu ko junu tɛngɛrtɔ.’”
20 Na sɛɛsɛ :hiriyɔ, “Hira madhdhiy, yɔk ngalɔkta bere kɛbhɛkkani kingi erimo.”
21 Na Yesus gɔnyu hiri na teyelu na sɛɛsɛ, “A challi. Nɔng ahite dhɔnɛ ihhoginy gele ngani ihe. Na mɛa ok na dhuma ahaa lɔmi kumulɔng na tallɛy na ngɛrɛsɛ bhoyoga, na inye ale kɛdhdhɛttanniny :Tumu ahaa bo dhandala tumɔ. Na hunde mesu nganga na te ushaye, wo na kɔbhany anye.”
22 Na hiri hunaa shikko ngalɔktaye, dhiya hini na munyuɛsɛ gɔrɔ gɔrɔ na ogo ke ngaya dha bere lɔmɛ ahaa bo mɛraye.
23 Na Yesus budhɛ na gɔnyu zuga kɔbhbhɛa nɔng na sɛɛsɛ, “Yee ngangaye dhaa zuga aha mɛra bhɛa senno kɔtɔlɔmɛ ꞉Tumu dhandal goore dha!”
24 Na yɔk zuga kɔbhbhɛa nɔng iwachi ngalɔkta yokkono :nɛaye. Na nɔng Yesus tɔrɛ sɛgɛn na sɛɛsɛ, “Yee erro, dhaa bhɛa zugo senno kɔtɔlɔmɛ ꞉Tumu a dhandali goore ni go! 25 Nɔng chɔɔ hira aha mɛra bhɛa kènno kɔtɔlɔmɛ :Tumu, hunde galisey kudhul hologuna marsiny, anda a bhaseni.”
26 Na yɔk kalda iwachiyɛ goore na mɛzzi kɛngɔ na se, “Ay! Na hunde a ngangaye, dha ale ba :nonni?”
27 Na nɔng Yesus gɔnyu yɔk na sɛɛsɛ, “Ngalɔkta ku ngangaye bhee ɔanɛ :hiriyɔ ninggɛ. Na nɔng bhɛa Tumu nganga ngayo. Nɔng ɔana lɔgɔ kumulɔng.”
28 Na sɛɛsɛ :Betirosi, “Ay! Na kèe agge annaa bere kɔdhɔtto ahaa gayo kumulɔng na kɔ̀ɔbhtinyɔ!”
29 Na nɔng yagɛsɛ na sɛɛsɛ, “Ga shigitɔ! Zukte bere dhɔttɛ doriyoa gɛ oo gɔynggɛ oo ngɔnigɛ oo choginggɛ oo jugɛ oo erro oo gunyaa gɛ ke bhɛa kɔbhbhɛanyɛa anye na madhɛsɛnɛa zugo kamannaa nanu challaye, 30 yɔk ngabɛrgunyaya mɛa toyneye, ale kɛ̀dhdhɛttan na lɔga gɛ jorronɛ ga bɔɔ sabbune jagarɛ kɛngi zugo hayna, na ale lɔmmɛ doriyo, gochonginya, ngɔnigɛ, jugɛ, erro ko gunya na marrɛ :zugu na chɔllanɛyɔ. Na yɔk bɛrgunyaye wurtune ale andanɛye, ale kàjjɛ basseya iho dhul. 31 Na zukte bu mɛr ku sabbaye, ale a wuru, na gee ku wuruye ale a gee ku sabbaye.”
Lɔga Dhugunnonɛa :Yesusi Lɔga Ale Rɛsɛa Na Bansanɛa
32 Na Yesus ko zuga kɔbhbhɛa nɔng dha bere huna hɛa Yerusalemɔ na ngani woyɛa gɔrɔ, nɔng Yesus jim sabbɔ sabbɔ. Na yɔk zuga kɔbhbhɛa nɔng ku 12 iwachiyɛ. Na gaa kɔbhbhanɛa ngagiya wurtɔ, yɔk tɛngɛrɛ bho. Na nɔng kɛnga gaa ku 12 zukke toye sɛgɛn na yagu dheyyɔ na dhugunɛsɛ lɔga ale dokkono :nɛa. 33 Na sɛɛsɛ, “Ga shigitɔ! Agge mɛa kɛ̀hɛ Yerusalemɔ, na Hiri Hoynɛ kɔ̀gɔdhdhɛsɛn gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse na ujjukkanɛ na kertɔ. Na hɛyɛ na ajjɛ zuga bhorinyaa anaa. 34 Na yɔk bhɔsɔrrɛ na tuhɛsɛnɛ mɔdha na dhakkɛ na nissɛyɔ. Na nɔng ale sani ungo sizzi igingeyɔ na bansanayɔ.”
Lɔga Ghinɛa :Yaykobi Ko :Yohanisi Yesus
35 Na koo erroa Zɛbɛdosi Yaykob ko Yohanis hoya gɔra Yesusi na seyɛsɛ, “Hira madhdhiy! Agge lɔkte kenno kìghindenyde kumulɔng kenno messogiytɔ.”
36 Na nɔng ghinu yɔk na sɛɛsɛ, “Senno kèmessogung ɔng?”
37 Na yɔk yaktɛsɛ na seyɛsɛ, “Kenno igommogiy na kolea ale lɔmɛi diram na allinɛnɛi zugo, ojjiy bhɛa nunu kangitɛn ko sɛtɛn.”
38 Na nɔng Yesus sɛɛsɛ, “Ngalɔkta ghinnonyoye imaggoyɔ. Ngangaye ahaye ale kamayi kombiyɔyeb, ko igge ale matto na ɔanoyɔ? Oo churaye ale kùchurrɛany anyeye, ko igge ale shurnɛno na ɔanoyɔ?”
39 Na yɔk seyɛsɛ, “Ee, kɔanoyɔ!”
Na sɛɛsɛ :Yesusi, “Nɔng igge ahaye ale kamayi :anynyo kombiyɔye, ko igge ale mattoyɔ. Na churaye ale kùchurrɛany anyeye, ko igge ale kùchurronggɔ. 40 Na nɔng inde oy zugo sɛtɛna nanu ko kangitɛna nanuye, anye ngakaniyo. Nɔng sɛtɛn ko kangitɛna nanu a hana bere kòjjɛsɛna zuga bere sennana :Tumu sabbɔ kɔk.”
41 Na zuga kɔbhbhɛa Yesus ku tɔmmɔn hunaa shikkɛa ngalɔktaye, dɛbɛ na wologo Yaykob ko Yohanis. 42 Na Yesus mugɛsɛ yɔk bhee dhɔnɛ na sɛɛsɛ, “Nɔng igge gao chi hunde komortɛna bhorinya anaa allinɛnɛ zuga gɛ na adhɛsɛnɛ lɔgɔ damite hinɛye na kɛtɛngɛrɛ ke ngaya anɛ zuga lɔmmɛa buynde. 43 Na nɔng igge maya nganga ngamessoo. Na bhɛa nu hunde lɔ inde hin buynde, maya lachchana rɛ na kay lalugɛ kumulɔng. 44 Na ko nɔng inde hin bhɛa senno keteɛ hira bo bhɛa zugonyde, maya lachchana rɛ goore na a gaymaya zugony kumulɔng, 45 ke ngaya Hiri Hoynɛ bere kunɛ na katagayɛ zugo na keteɛ yekkuya rɛsɛa zuga bo mɛraye. Nɔng bhee bere kunɛ na katagaytɛ :zugu ngayo.
Lɔga Ibbaysiyɛa :Yesusi Hira Kawarɛ Chaga Kèe Bartemi
46 Na koo Yesus ko zuga kɔbhbhɛa nɔng hoya na daga Yariko. Na yɔk ko zuga bo mɛra hunaa dhɔttɛa Yariko na hɛaye, dakta hirre kawarɛ chagi kèe Bartemi hunde i bay ganggu dheyyɔ na ogolnɛye. (Nɔng Bartemi dha bere a liya Temiy). 47 Na nɔng hunaa shikko bhɛa ngahirronu dho ngonuye anɛa Yesusa bere chillana Naziretɔye, ɛga lɔgɔ dirr na bhololu na seu, “Ashaya Dawiy Yesuse, chirbhiseonyɔ!”
48 Na zugo ga mɛra wologo na kidhiyɛyɔ. Na nɔng kalda tɔrɛ sɛgɛn na bhololu goore na seu, “Ashaya Dawiyye, chirbhiseonyɔ!”
49 Na Yesus daga ba na sɛɛsɛ zugo, “Ga eliyoyɔ!”
Na yɔk eli na seyɛsɛ, “Te may! Bana tunɔ! Eleiny :Yesusi.” 50 Na nɔng ujjugu ruma nɛnɛ bhone na bana kɛhɛy na ko gɔra Yesusi.
51 Na ghinu :Yesusi na sɛɛsɛ, “Seni kèmessiny ɛnɛng?”
Na nɔng hiri yagɛsɛ na sɛɛsɛ, “Hira Madhdhiye, keni kàr bho.”
52 Na nɔng Yesus sɛɛsɛ, “Yee, ogo ni! Wa bau ke ngaya yɛbhbhɛanyde.” Na hiri aru bho ke tiri na kɔbhu Yesus gɔrre kɔɛye.