Lɔga Abhanyisiyɛa :Yesusi Zuga Ku 4,000 Amissɛyɔ
8
1 Na hunaa tɛlda ungge muchugi na tewa ushaye, koo zuga bo mɛra muktiyaa sɛgɛn. Na ahiya ammɛa garu na Yesus eliu zuga kɔbhbhɛa nɔng na sɛɛsɛ, 2 “Anye towonydakkany :zugu ke ngaya unga kassaniyɛo ko yɔk kari mɛa teyɛ sizzi na chɔɔ ahiya ammɛa ninggɛ dhulde. 3 Na mɛa hunde kitton hozzo na kago oriya gɛ, ale bhirsonɛ gɔrɔ ke ngaya gena bɔɔ honynyɛ rɛnaye.”4 Na zuga kɔbhbhɛa nɔng yaktɛsɛ na seyɛsɛ, “Na mɛa ngakoruya ku laayte, amissɛte kàbhanyisiɛ ngazuktaye ale kòhonyɛ ori?”
5 Na nɔng Yesus ghinu na sɛɛsɛ, “Lɔmmo tilɛnde ku isɔng?”
Na yɔk yaktɛsɛ na seyɛsɛ, “Kɔlɔmmo gee ku issabbay.”
6 Na nɔng yogɛsɛ zugaa mɛra lɔgɔ na kɛtɛlda bay. Na ibha tilɛnaa ku issabbay na tuhu Tumu. Na ngɛru na aynɛ zuga kɔbhbhɛa nɔng na kayɛ zugo. Na yɔk aytɛ na ngɛrtɛsɛ. 7 Yɔk zuga kɔbhbhɛa nɔng dha bere lɔmmɛ urguse chichi gee muchugi. Na ibha :Yesusi na tuhu Tumu na aynɛ zuga kɔbhbhɛa nɔng lɔgɔ na kaytɛ na kɛngɛrtɛsɛ zugo. 8 Na koo ngɛrtɛsɛ na zugo ussɛ na chaya. Na zuga kɔbhbhɛa nɔng mukta urutaa churinyana tilɛnaa ammɛa :zugu na dhi gɛlachin issabbay. 9 Yɔk zuga bere ɛlla ngonu kumulɔng hunde kòtoyiye a 4,000. Na nɔng hunaa ittonna zugo na tewa ushaye, 10 irrɔgɔ ko zuga kɔbhbhɛa nɔng gonggul na ago baye kèe Dalmanuta.
11 Na zuga kɔbhbhɛa damiya Bhɛrɛsi hoya na shigiyo lɔk gena na ɛkkɛnyandɛ ko Yesus. Na illobo na ghini na kɔdhɔlɛsɛ lɔkte barari gena na kataktɛ hunde barartin ajjɛ :Tumuye! 12 Na nɔng ɛsɛdhu lɔga ngazukta na yagɛsɛ hini na seu, “Ngangaye ngatenyda hinnɛ bhɛa senno kartɛ lɔkte barari kɛ ɔng? Ga shigitɔ! Chɔɔ lɔkte barar hinnɛ :yɔkku na kargite anye ngakɔdhɔlɛsɛnno dhul.” 13 Na nɔng dhɔyu yɔk na irrɔgu gonggul na wagu yirisiyɔ tandɔ.
Lɔga Bhoguma Herediosi Ko Ga Zuga Kɔbhbhɛa Damiya Bhɛrɛsi
14 Yɔk zuga kɔbhbhɛa Yesus dha bere amissɛa ammɛa dhinyɛsɛnɛ :sabbichinnu na gonggulɔ toye lɔmmɛ tila dhɔnɛ sɔng. 15 Na ibbayu :Yesusi na yogɛsɛ lɔgɔ na sɛɛsɛ, “Tɛldi kɔk! Na kɛngɛ rɛhi bhɛa bhogumaa zuga kɔbhbhɛa damiya Bhɛrɛsi ko bhɛa bhoguma Herediosi.”
16 Na yɔk zuga kɔbhbhɛa nɔng mɛzzi kɛngɔ na se, “Nɔng mɛa bhee senɛ ngangaye, a ngaya tila ngakɔ̀lɔmɛoye.”
17 Na nɔng Yesus tagu lɔga mɛzziyɛa :yɔkku kɛngɔ na ghinu na sɛɛsɛ, “Mɛzzeo na senno, ‘Mɛa a ngaya tila ngakɔ̀lɔmɛoye’ kɛ ɔng? Ngangaye ko mɛa toye bɔɔ lɔgɔ ngani tunggɛsɛo na tagato? Bɔɔ sabbi ngani annung dhandali? 18 Yɔk kawarɛ a ngagiya lɔmmoye, na bho ngaorrɛoyo? Nyabha a ngagiya lɔmmoye, na bho ngashigɛoyo? Na lɔgɔ bɔɔ ngani ngakadhdhanoo? 19 Na huna bɔɔ kibhbhani tilɛna ku hayna na kɛngɛrɛsɛni zuga ku 5,000, hana churinyana bɔɔ mugɛsɛno gɛlachinde ku isɔng?”
Na yɔk yaktɛsɛ na seyɛsɛ, “Bɔɔ kumugɛsɛno gɛlachin 12.”
20 “Na hunaa kibhbhani tilɛnaa ku issabbay na kɛngɛrɛsɛni zuga ku 4,000, hana churinyana wa mugɛsɛno gɛlachinde ku isɔng?”
Na yɔk yaktɛsɛ na seyɛsɛ, “Wa kumugɛsɛno gɛlachin issabbay.”
21 Na nɔng ghinu yɔk na sɛɛsɛ, “Na mɛa lɔgɔ ngani tunggɛsɛo?”
Lɔga Ibbaysiyɛa :Yesusi Hira Kawarɛ Chaga Betesaydhagiye
22 Na Yesus ko zuga kɔbhbhɛa nɔng hoya na daga Betesaydha. Na zug gena dhiganda hirre kawarɛ chagi na tɔllɔsɛsɛ Yesus na katadhɛ siyɔ na kibbaysiyɔ. 23 Na nɔng ibhu hiri siyɔ na dhiganu ɔr dheyyɔ. Na tuhɛsɛ kawara hiriguny mɔdha na kumu sɛnɛ na ghinu na sɛɛsɛ, “Mɛa ori ɔng?”
24 Na hiri gɔnyu ba na seu, “Kori zugo hunde woɛ na messɛ riwo riwo huna kɛnunyde.”
25 Na Yesus kumu kawara hiriguny sɛgɛn na kalda hiri kawarɛ oyɛ na bau na aru bho ko aha kumulɔng shɛɛ. 26 Na koo ittonu na yogɛsɛ lɔgɔ na sɛɛsɛ, “Mɛa ok doraa nunu hung na ɔr toye bhokkonnɔ ngakɔ.b”
Lɔga Dhugunnonɛa :Betirosi Bhɛa Yesus Anɛa Kirisos
27 Na Yesus ko zuga kɔbhbhɛa nɔng banda na ago oriya ɛlla Kesariyaa Bhilibhisi dheyyɔ. Na hunaa ngani woyɛa gɔrɔye, nɔng Yesus ghinu yɔk na sɛɛsɛ, “Ngangaye, zugo sennɛ kani nɛng?
28 Na yɔk yaktɛsɛ na seyɛsɛ, “Gena sennɛ ani Yohanisa Churro Zugo, gen sennɛ ani Eliyas, gen sennɛ ani zuga bere yogɛsɛnɛa zugo lɔga yokkono :Tumu kona.”
29 Na nɔng ghinu na sɛɛsɛ, “Na igge senno kani nɛng?”
Na yagɛsɛ :Betirosi na sɛɛsɛ, “Inye ani Kirisos.”c
30 Na Yesus ibbayu yɔk na yogɛsɛ lɔgɔ na hunde a hir inongge zug gena ngayogɛsɛnɛ.
Lɔga Dhugunnonɛa :Yesusi Lɔga Ale Rɛsɛa Na Bansanɛa
31 Na Yesus tɔgɔdhay mɛzzi na madhɛsɛ yɔk lɔga ale chɔllanɛnɛa :Hiriyɔ Hoynɛ goore na marɛa :zuga Ayhudhi bibiyo ko gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse na ale ujjukkanɛa na nissɛa na rɛsɛa na ihɛa ungo sizzi igingeyɔ na bansanɛa. 32 Na nɔng dhugunɛsɛ yɔk ngalɔkta hologun dib dib. Na nɔng Betiros yagu Yesus dheyyɔ na wologu ke ngaya dhugunnonɛ lɔgɔ ngangaye.
33 Na nɔng Yesus budhɛ na gɔnyu zuga kɔbhbhɛa nɔng na wologu Betiros na sɛɛsɛ, “Alala Moldoy! Isogo! Inye ɛsɛdhi lɔga zugony na ga Tumu ngaɛsɛdhiyo.”
34 Na koo eleo zugaa muknyɛsɛnɛa nɔng ko zuga kɔbhbhɛa nɔng na hoya gɔra nɛnɛ na yogɛsɛ lɔgɔ na sɛɛsɛ, “Inde hin bhɛa senno keteɛ hira kɔbhbhanyi anye dhereye, any kɔdhɔ lɔga sabbaa nɛnɛ na kɛtɛ kɛya kìlagɛad na kɔɔbhany anye kali kali. 35 Na nɔng inde nganga ngamesso na hin lɔga sabbaa nɛnɛ na se kibbaysi rɛye, ale ujjuk rɛ. Nɔng inde ujjuk rɛ ke ngaya kɔbhbhɛany anye ko kamannaa challaye, ale jɔana basseya iho dhul. 36 Na ngangaye, hiri hunde kɔtɔlɔ ngaahaya ɛl bay ngayaye kumulɔng na basseya iho dhul katamar na ngajɔana, anda hologunde nɛnde a inong? 37 Oo chɔɔ ahite anda ibhbhana na chachchanɛ basseya iho dhul ihe? Ninggɛ. 38 Nɔng inde amɛ :liya bhɛa ngatenyda ku lollo messɛ lɔga bo gɛrsa, na marrany anye ko lɔga ganyuye, ko nɔng Hiri Hoynɛ kolea ale lɔmmanɛa dirama Babaa nɛnɛ na dhɛanɛa ko zuga kullɛna ekko :nɛa, ale amɛ :liya na mar ngadamita marɛ :nɛaye.”