Lɔga Madhɛa :Yesusi Zugo Damiya Onynɛnɛa :Zuga Ayhudhi
7
1 Na koo zuga kɔbhbhɛa damiya Bhɛrɛsi ko zuga madhdhɛa zugo Damiya Tumu bere kàjjɛa Muse dha bɔɔ honynyo Yerusalemɔ hoya na muknyɛsɛ Yesus. 2 Na argi zuga kɔbhbhɛa Yesus gena hunde damiya zuga kɔbhbhɛa damiya Bhɛrɛsi sɛnɔ ngaonynyɛo na aminɛ ga bo lɔmmɛa ridhingge. 3 Yɔk zuga kɔbhbhɛa damiya Bhɛrɛsi ko zuga Ayhudhi kumulɔng tii dha bere a zuga bhɛkkɛa damiya nɛ ajjɛa :kokonginyaa gɛ. Na hunde sɛnɔ damiya kokonginyaa gɛ ngani kotonydooye, amissɛ ngaammɛo dhul. 4 Na chɔɔ hunde wokkonɛ gawugiye na sɛnɔ ngadamita ngani kotonydooye, amissɛ ngaammɛo dhul. Na bhɛkkɛ daminyaa gɛ gena kònyɛa baganya ko junynya ko kɛdhɛma ko alleyiya ɛlɛa na aminɛnɛa.5 Na zuga kɔbhbhɛa damiya Bhɛrɛsi ko zuga madhdhɛa zugo Damiya Tumu bere kàjjɛa Muse ghini Yesus na seyɛsɛ, “Ngangaye, zuga kɔbhbhinyɛa, yɔk daminyaa bere kokonginyaa ga ngabhɛkkɛo na sɛnɔ onynyɛo na aminɛ ga bo lɔmmɛa ridhing kɛ ɔng?
6 Na nɔng yagɛsɛ na sɛɛsɛ, “Ngabutokta tabhbho zugo nigiteye, yɔk lɔga gu bere dhugunnono :Isayasi dha bere a dhere chi. Nɔng annaa bere senno,
“‘Ngazukta eterrisananyɛ tugichinne sɔng,
na taɛ lɔga ganyu na hinisi dhere ngaibhbhaganyɛo.
7 Na chɔɔ lɔga eterrisanɛanyɛa :yɔkku bhee ku hologun ninggɛ,
ke ngaya dhɔyɛ lɔga ganyu na zugo madhɛsɛnɛ ga sabbiya gɛye.’ 8 Na mɛa ko igge anno ngagiya dhɔtto damiya bere ajjungu :Tumu na mautto kera kɔbhbhɛa :zugu na bhɛkkoye.”
9 Na tɔrɛ sɛgɛn na sɛɛsɛ, “Nɔng igge anno zuga lɔmmo ganggua nu challa dhɔyɛo lɔga ajjungu :Tumu na senno mautɛ daminyaa gu na bhɛktɛ, 10 ke ngaya gayɛo lɔga bere yokkono :Muse sennɛa, ‘Chogonu ko junu tɛngɛrtɔ,’ na ‘Inde dhɔm chɔgɔnɛ oo jɔnɛye nɔng maya katti na rɛsɔye.’ 11 Nɔng igge anno ngagiya madhɛsɛno zugo lɔgɔ na senɛsɛno, ‘Hunde hir kona kataganyɛ chɔgɔnɛ oo jɔnɛ aha na kesɛɛsɛ, “Ahaa taa kɛanɛinyi kumulɔng, mɛa ngani ngakajjinyo na te ga kajjɛi Tumu, ke ngaya bere kibhiigɛsɛn lɔgɔye,”’ 12 igge nɔng kalda kanyɛo bhɛa ibhbhanɛa aha gena na ɛanɛa chɔgɔnɛ oo jɔnɛ. 13 Na hunde messo ngangaye, tiranyɛo lɔga Tumu na mautto daminyaa gu na ɔtɔgiseo na madhɛsɛno chɔɔ tenyiye ale ngani chillanɛye. Na chɔɔ messo lɔga bo mɛra hɛtta ko ngagiya mauyɛo daminyaa guye.”
14 Na koo eleo ngazuktonu bu mɛrte sɛgɛn na kohoya bhɛa nɛnɛ na sɛɛsɛ, “Ga shiktonyuyɔ! Na lɔkte koyokkogungge chirara shɛɛ na tunggɛsɛyɔ! 15 Nɔng ahite am :hiriyɔ na ɛddɛ hiri na lɔ ridhing, ninggɛ. Yɔk lɔkte ɛddɛɛ hiri na lɔ ridhingge a lɔga gɛrsa ku kuhu bhonsanɛa tuga nɛnɛ na messo. 16 Na mɛa inde lɔ nyabhite sɛɛ kishiktɔ.
17 Na nɔng hunaa kennɛna ko zugo na dhɔtta yɔk ngonu na kɔa na tunnukko doriye, yɔk zuga kɔbhbhɛa nɔng ghini lɔgaa ɛlɛhɛnɛsɛna zugo bhɛa ku hologun. 18 Na nɔng sɛɛsɛ, “Ngangaye ko igge ngalɔkta bhɛa ku hologun ngani tunggɛsɛo na tagato? Nɔng igge gao chi hunde ahaa amma :hiriyɔ bhee hɛyɛ na ɛddɛɛ hiri na lɔmɛ ridhing ninggɛye. 19 Yɔk ngaahaya am :hiriyɔye hinisɔ ngahɛyo. Hɛ kɛngɔ toye hung na koo bhonsanɛ rɛhɔ.” Nɔng Yesus bere dhugunnono ngalɔkta na kàtaktɛ bhɛa ahaa kàmma kumulɔng ridhing ngaanɛayo.
20 Na koo tɔrɛ sɛgɛn na sɛɛsɛ, “Yɔk lɔkte gɛrɛ ku kuhu bhonsanɛ tuga hiriguny na messe, a gee ɛddɛɛ nɔng na lɔmmɛ ridhingge.” 21 Yɔk lɔga bhonsanɛa hinisa hiriguny gena, a lɔga gɛrsa ku kuhu ɛsɛdhdha hinisɔ ko lollumoa messɛa :zugu ko ɔgɔrchamo ko zugo nisa 22 ko lollumoa assanɛa :hiriyɔ tɛriya hiriguny oo :tɛriyɔ hira lɔmma tɛri, ko aha chirkan ko kuhuyamo ko bhɛa tabhɛsɛna zugo lɔgɔ ko liya ninggɛndina messɛa lollu lollu ko hini kɔchinɛna chɔlɔssɛa ahaa zugony ko zugo kedhdha ko rɛ dhɔnga ko dallemo.” 23 Ngalɔkta bu gɛrɛ ku kuhuye kumulɔng a gee bhonsanɛ hinisa hiriguny na ɛddɛɛ na anɛ hira lɔmma ridhingge.”
Lɔga Yɛbhaa :Tɛriya Bere Hudhukkinyana Sirobhonikagiye
24 Na Yesus bana na dhɔyu ngonu na ogo Tirosɔ jaa.a Na koo tunnugu dori kona na tɛu ngonu. Na tamaru bhɛa senno zugo ngakataktɛ nɔng hunde i ngadorionuye. Na ko hunde katamar nganga, nɔng bhee ullugunyɛ lɔgɔ na ihɛ ngonu dari dirr ngani ngaɔanao. 25 Na hunaa ngani anna ngangaye, nɔng tɛrite sedhdheya nɛnɛ tɔgɛsɛn :mɛnɛngiyɔ shigu sabhana Yesusi na ko ke tiri na tɔgɔdhɛsɛ kɔmma jagara gɛnyɛ. 26 Nɔng ngatɛritonu a tɛriya ku Giriki dha bere hudhukkinyana Sirobhonikagiye. Na koo tɔllɔhɛsɛ Yesus na kobhoniseo mɛnɛngiya tɔgɛsɛna sedhdheya nɛnɛ.
27 Na nɔng Yesus sɛɛsɛ, “A challi. Ga sabbɔ kàynɛ erro amissɛ na kussɛ ko bhee chassɛ. Hunde kìbhbhana amissɛa errony sabbɔ na kàjjɛ rɔsiye, a gɛrsi.”
28 Na ko nɔng tɛri yagɛsɛ na sɛɛsɛ, “A challi Komoru, inye yogi shɛɛ chi. Yɔk rɔsi chɔɔ ɛl bay bhɛa aminɛnɛa :errou dheyyɔ na ammɛ urutaa errony ngɔanɛa.”
29 Na Yesus sɛɛsɛ tɛri, “Ngaya yakkagɛany ngangaye, a challi. Na mɛa bana ok bhɛa nunu. Nɔng mɛnɛngiyaa tɔgɛsɛna sedhdheya nunu wa bhonaa.”
30 Na tɛri hunaa wokko chɔɔ doriye, aru sedhdheya nɛnɛ hunde dhaa ɔdda :mɛnɛngiyɔ na bau na ungu hayagiye bayte.
Lɔga Ibbaysiyɛa :Yesusi Hira Kadhdhakka Ibhinɛna Na Bho Ngashikkoo
31 Na Yesus bana na dhɔyu Tiros na bhɛlu baa Sidona, na koo dhau baye kèe Ori Tɔmmɔn na shidhɛ yirisiya Gelila. 32 Na ngonu zug gena hoyɛy hirre bho ngashikko kadhdhakka ibhinɛ na shɛɛ ngamɛzziyo. Na ayɛsɛ nɔng, na tɔllɔsɛsɛ na katadhɛ siyɔ na kibbaysiyɔ. 33 Na Yesus ibha ngahirronu bhɛaa ɛlɛa :zugu na dhiganu ko rɛna bhokkonnɔ bhichang. Na utugɛsɛ hallaga gɛnyɛ nyabhaa ngahirronu. Na tuhɛsɛ hallagi dhɔnɛ mɔdha na kumu kaya ngahirronu. 34 Na dhɔngu kawarɛ tumɔ na yagɛsɛ hini na sɛɛsɛ hiri, “Ebhbhata!” (“Ebhbhata” a bhɛa kènɛa, “Oyɛ!”). 35 Na hiri hunaa ngani kèsenɛsɛna ngangaye, nyabha oyɛ ke tiri na kadhdhakka ngaktɛ na mɛzziu shɛɛ hung.
36 Na Yesus aynɛ zugo lɔgɔ na ngalɔkta zug gena ngayogɛsɛnɛ. Na chɔɔ ko hunde kɔtɔrɛ kɛngi mɛri na ngayokkɛ, yɔk ngani ngashikkɛo na ago na kalda yoktɛsɛ zugo bhoy na tɛhɛtɛy ko ba. 37 Na zugo iwachiyɛ goore dhogoy na se, “Ngalɔkta me :nɛaye kumulɔng a challi. Chɔɔ dhaa ibbaysi zuga ku dunggɛn na shikkɛ bho na ga kadhdhakka ibhinɛna mɛzziɛyɔ.”