Lɔga Zuga Yogɛsɛnɛa Zugo Lɔga Yokkono :Tumu Marɛa :Zuga Baa Nɛ
6
1 Na koo Yesus bana na dhi ko zuga kɔbhbhɛa nɔng kari na ogo Naziretɔ ɔra bere chillanɛa :nɛa. 2 Na hunaa tewa Kala Ayawsunyde nɔng koo tɔgɔdhay madha na madhu zugo doraa madhinɛnɛa zuga Ayhudhi lɔga Tumu. Na zuga bere shikkɛa lɔga gɛnyɛ ga bo mɛra iwachiyɛ na ghindɛ kɛngɔ na se, “Ngangaye, ngahirra dha ngalɔkta kunɛ ori? Na ngabho gaana kàjjɛ nɔngge dha aynde kunɛnɛng? Na ngalɔkta bu dhandal barar kìwachiye dha me ɛnɛng? 3 Ngangaye, nganda ngayo naniya ghendo doriyo ku eriya Ngamariyami, gochonginyaa gɛnyɛ kèleo Yaykob, Yosa, Yihudha ko Simon? Na ngɔnigɛ kàbhakka ko agge kari?” Na tamara na ta lɔga gɛnyɛ.4 Na yagɛsɛ :Yesusi na sɛɛsɛ, “Nɔng hira yogɛsɛna zugo lɔga yokkono :Tumu ɛngɛrsɛ :zugu ba kumulɔng. Na yɔk gee ngaɛngɛrsɛoye a zuga baa nɛnɛ ko bhɛnɛna gɛnyɛ ko zuga doraa nɛnɛ sɔng.” 5 Nɔng Yesus bere tadhɛa zuga ilagassɛa gee muchugi sɛnɔ sɔng na ibbayseoyɔ. Yɔk lɔkte bu dhandal barar gena bhɛa senno kemesɛ ngonu bere ngaɔanao ke ngaya zugo nɔng ngayɛbhɛoye. 6 Na bere iwachinɛna goore ke ngaya zuga baa nɛnɛ nɔng ngayɛbhɛoye.
Lɔga Egɛa :Yesusi Zuga Bere Bɛrrana Ku 12
Nɔng Yesus bere woo ori toye ngonu na madhɛsɛna zugo lɔga Tumu. 7-8 Na koo eleo zuga bere bɛrrana ku 12 na aynɛ buyna obhoniseonɛa mɛnɛnga na kedhdhu ramman ramman na aynɛ lɔgɔ na egu na sɛɛsɛ, “Hunde hɛo bhokkonnɔye, amissɛ ko kammay ko birinya kɔbɔrtɔgichinne ngalɔgɔnno. Na tɔgɔmbɛ bhirɛchinne sɔng. 9 Na yɔk chaha malugutɔ. Na ruminya, malugu gee lɔmmo rɛhichinneye sɔng. Gena ngalɔgɔnno. 10 Na hunde ayto ɔr konnɔ na lamaung :konnɔye, tɛldi doraa hiraa lamanungu sɔng ko bhee bhonsanɛo ngonu na hɛyɛo ɔr konnɔ. 11 Na hunde ayto na zugo ngani ngalamanungɛo oo lɔga gu ngani ngashikkɛoye, dhɔyɔ na tibartɛsɛ teriya lɔmmo jagarre ngonu na aynde ibbayɛo yɔk bhɛa ale Tumu kedhdhɛa lɔga gɛye.”
12 Na yɔk koo banda na ago na madhtɛsɛ zugo bhɛa maya ujjugɛa lɔga gɛ gɛrsa. 13 Na obhonisiyo mɛnɛnga bo mɛra bhɛa zugony. Na uhudhu zuga ilagassɛa ga bo mɛra malɔ na ibbaysiyo.
Lɔga Dha Bere Kègedhdhanɛa Yohanis Sabba
14 Na komoru Heredios koo shigu sabhana :Yesusi ke ngaya bere toynɛnɛ gooreye. Na ko yɔk zuga dha bere shikkɛa ngasabhanda, gena sea, “Nɔng mɛa ngahirronu a Yohanisa Churro Zugo. Na dha bɔɔ bana rɛsɛyɔ na aynde mesɛ ngalɔkta bu barar dhandalde.”
15 Na yɔk gena se, “A Eliyas!”
Na yɔk gen se, “A hira yogɛsɛna zugo lɔga yokkono :Tumu huna zuga bere sabbune yogɛsɛnɛa zugo lɔga yokkono :Tumu.”
16 Na Heredios hunaa shikko ngalɔktaye ko nɔng seu, “Kèe Yohanisa bere kegedhdhani sabba dha bɔɔ bana rɛsɛyɔ chi!”
17 Nɔng dha bere sabbɔ Heredios yogɛsɛn bholi lɔgɔ na kibhigi Yohanis na kaytɛ doraa chibinuny ke ngaya wologɛ :Yohanisi ke bhɛa dha bere Heredios kɔyɛa tɛriya gɔynɛ Bhilibhosi kèe Ngaherodhaye. 18 Nɔng dha bere kèsenɛsɛn, “Tɛriya goonu ngakɔɛ ke ngaya Damiya Tumu bere ajjiy :Muse anɛ kullɛye.” 19 Na hunaa tewa ngangaye, nɔng Ngaherodha dha bere lɔmɛsɛn Yohanis lɔgɔ hinisɔ. Na chɔɔ dha bere hinɛsɛn rɛsɛ na ɛsɛdh bhɛa senno koyogɛsɛ zugo lɔgɔ na kɔgɔdhɔtɔ na ngani ngaɔanao, 20 ke ngaya dha bere Heredios ɛngɛrɛ Yohanis na dhɔngɛ na bhɛgɛ shɛɛ na zug gena ngakɔdhdhɛye. Na nɔng dha bere gayɔ hunde Yohanis a hira kɛnginyana ridhing ningginɛnaye. Na hunde chirar lɔga yokkono :Yohanisiye, chɔɔ ko hunde karaktɛ ko hini na kuchurɛ,b nɔng dha bere chirar hinisa bo hɔla hung.
21 Na Ngaherodha koo tɛu na kali kona lɛmbɛ ko kala senno kinɛ Yohanis. Nɔng ngakoleonu dha bere a kala kàgadhdhanɛa unga dha bere hudhukkinyanɛa :Herediosi. Na dha bere Heredios eleono gulsachina gɛnyɛ bibiyo ko gulsachina allinɛnɛa bholisa gɛnyɛ ko zuga bibiyo kàggaa Gelilagiye na abhanyisiyɔ. 22 Na sedhdheya Ngaherodha dha bere hunde tunnukkono na gɔmbe, ɛddɛysi Heredios ko zuga dha bere kèleono kumulɔng na hinisi a hɔli.
Na hunaa anna ngangaye, nɔng komoru Heredios dha bere senɛsɛn ngasedhdheytonu, “Ahite hiniye ghinnony hung, kajjinydɔ.” 23 Na chɔɔ bhiigɛsɛn lɔgɔ na senɛsɛn, “Ahite ghinnonyde chɔɔ ko hunde kete baa kallinɛnɛi :anynyo, kɛngɛrraginy tan kona na kajjinydɔ.”
24 Na hunaa anna ngangaye, nɔng ngasedhdheytonu dha bere bhono bhɔ na kɔ na senɛsɛn jɔnɛ, “Na mɛa kìghin ɔng?”
Na nɔng jɔnɛ senɛsɛn, “Sɛɛsɛ, ‘Kihini sabbaa Yohanisa Churro Zugo.’”
25 Na sedhdhey wokkono chɔɔ bhɛaa komoruyny ke tiri na senɛsɛn, “Keni any sabbaa Yohanisa Churro Zugo kɛdhɛmɔ mɛarrɛ.”
26 Na nɔng komoru dha bere hunde shik ngalɔktaye, munyu goore dhogoy. Na chɔɔ ko hunde kumunyu nganga, nɔng dha bere bhɛa senno kamalɛ lɔgaa bhiigɛsɛna sedhdhey bhɛa ɛlɛa kɔmɔnaa eleono, ngahinno. 27 Na ibhbhana bholisiya nɛnɛ nisso zugo kona na ek ke tiri na kegedhdha Yohanis sabba na kuguyɛytɔ. Na bholisi dha bere kɔ doraa chibinuny na kedhdhana Yohanis sabba. 28 Na kunɛ kɛdhɛmɔ na ajjɛ sedhdhey na nɔng kɔɛ na ajjɛ jɔnɛ. 29 Na zuga kɔbhbhɛa Yohanis dha bere shikkɛ ngalɔkta garsɛ :Yohanisiye na hony na ibhbhanɛ na hɛyɛ na ojjɛ bhogoya kòjjɛa zugo.
Lɔga Abhanyisiyɛa :Yesusi Zuga Ku 5,000 Amissɛyɔ
30 Na koo zuga ku 12 bɔɔ ekko :Yesusi wakta na muknyɛsɛ nɔng na kɔbhtɛsɛ lɔga dha bɔɔ messɛa ko ga dha bɔɔ madhinɛnɛa kumulɔng. 31 Na nɔng sɛɛsɛ yɔk, “Banda kàgo bhokkonnɔ bhee zugo ninggɛ na ayawso bhe chinyi.” Nɔng bhee bere senɛ ngangaye, a ngaya zuga bo mɛra bere boyɛsɛnɛ nɔng dirr na chɔɔ bhee ammɛ ko zuga gɛnyɛ amissɛ ningginɛnɛye.
32 Na banda na ago gonggulɔ bhokkonnɔ bhee zugo ninggɛ. 33 Na hunaa hɛyɛaye, yɔk zuga bo mɛra dhartɛsɛ na taga hunde a yɔkte. Na ngeya ori toye kumulɔng jagarre na jɛmmɛ sabbɔ chɔɔ bhɛaa senno kaytɛ Yesuso. 34 Na Yesus hunaa bhonsana gonggulɔ na orro zuga bo mɛraye, towonydɛsɛ :zugu ke ngaya hɛt ko mɛdɛrniya hira iwoo ningginɛnaye. Na koo madhɛsɛ lɔga bo mɛra.
35 Na hunaa bho senno kete kɔrrɔye, zuga kɔbhbhɛa nɔng hoya na seyɛsɛ Yesus, “Ngaya a dus. Bho wa barra. 36 Na mɛa yogɛsɛ zugo na kago ngaoriya ɛl jaa ko ngagunyaya ɛl dheyyɔ dheyyɔye na katalda ahaye ammɛ.”
37 Na nɔng sɛɛsɛ, “Ahaa ammɛa ayɛ :iggeu hung!”
Na yɔk seyɛsɛ, “Ngazukta a mɛri. Na chɔɔ hunde kìbhta birinyaa kàgadhiyɛa hira messo zinggo taginya issey na kàtalday amissɛc na kɛ̀ngɛrtɛsɛ chinyi chinyi kumulɔng, ngahɛtinɛnɛo. Na ngangaye seni kàyto na kàtaldao amissɛ ngadinarinyaa ku 200ded na kayɛo na kusigitɔ dha?”
38 Na nɔng ghinu na sɛɛsɛ, “Lɔmmo tilɛnde ku isɔng? Ga ago gɔnyigitɔ!”
Na ago na gɔnyigi na wakta na seyɛsɛ, “Kɔlɔmmo tilɛnde ku hayna ko urguse ku ramman.”
39 Na Yesus yogɛsɛ zuga kɔbhbhɛa nɔng lɔgɔ na koyoktɛsɛ zugo na kɛtɛlda bay lanjoyte bu mɔrɔdhɔgi dha bere i ngonu na kɛtɛldi kimsinyokke kimsinyokke. 40 Na zugo kendiyaa kimsinyokke na kimsinyoga gena tɛldɛ zukte ku 100, gena tɛldɛ gee ku 50. 41 Na Yesus ibha tilɛnaa gina ku hayna ko urgusaa ku ramman na dhɔngu kawarɛ tumɔ na tuhu Tumu. Na ibha na ngɛru na aynɛ zuga kɔbhbhɛa nɔng na kɛngɛrtɛsɛ zugo. Na ibha urgusaa ku ramman na ngɛrɛsɛ zugo bhoy. 42 Na zugo ussɛ kumulɔng na chaya. 43 Na zuga kɔbhbhɛa nɔng mukta urutaa churinyana tilɛnaa ammɛa :zugu ko urguse na dhi gɛlachin tɔmmɔn ko ramman dhik dhik. 44 Yɔk zuga bere ammɛa ngatilaya ga maya hunde kòtoyiye, a 5,000.
Lɔga Woyɛa :Yesusi Yirisiyɔ Tundɔ Jagariyɔ
45 Na Yesus hunaa ngani yaginɛna ko zugoye, yogɛsɛ zuga kɔbhbhɛa nɔng lɔgɔ ke tiri na kirrɔgɔ gonggul na kɛjɛmɛ sabbɔ na kerre Betesaydhagiye. 46 Na hunaa yagɛsɛa zugo na tewa ushaye, irrɔgu dhum kona tundɔ na kalliyɛ ko Tumu.
47 Na hunaa bho barraye yɔk zuga kɔbhbhɛa nɔng dha bere hɛ gonggulɔ na dokkɛ yirisi kɛrghɛn na nɔng Yesus dhɔynɛ yirisiyɔ bhɔ bhichang. 48 Na koo dharɛsɛ hunde maginɛ ko kalmaa kuliyɛa gonggul ke ngaya ɛbbɛgɛ :ngɔye. Na hunaa bho tewa gidhanggayte nɔng tɔa yirisiyɔ tundɔ na ko gɔrre nɛye. Nɔng dha bere hin bhɛa senno kadhaɛ yɔk bhɔ. 49 Na yɔk hunaa orrɛa nɔng hunde woono yirisiyɔ tundɔye, yɔk se kako a rimboya hira rɛsa na ara wuy, 50 ke ngaya orɛ na dɛɛsɛ na ɛngɛrsɛ bho gooreye.
Na nɔng urrukkanu na sɛɛsɛ, “Kani anye, anye! Tɛldi hung! Bho ngaɛngɛrso!” 51 Na irrɔgu gonggul na tɛldi ko yɔk kari na ngɔyɔ garu. Na yɔk rɛgɛ :lɔkku na iwachiyɛ goore, 52 ke ngaya sabbiya gɛ anɛ dhandali na lɔgaa bu dhandala wa abhanyisiyɛa :Yesusi zugo amissɛyɔ ngani kutunggɛsɛoye. 53 Na hunaa erressɛa yirisiyɔ tandɔye, koo daga ba Gensaretɔ na ojjigi gonggul ngonu na bhonda. 54 Na hunaa ngani bhonsanɛa gonggulɔ ngangaye, zugo taga nɔng hunde a Yesuse. 55 Na nge oriya ɛlla ngabaonu kumulɔng na ngarta zuga ilagassɛa gala gɛ ungusɛa na hoyɛy hande shigɛsɛnɛ Yesuse. 56 Nɔng Yesus huna bere woo ngabaonu ori toye ko ori dheyyɔ kumulɔng, yɔk zugo bere obhonisionɛa zuga ilagassɛa na ngorronɛa hana sɛrɔ ɔdhdha. Na zuga ilagassɛa bere tɔllɔhɛsɛnɛa Yesus na kigomɛsɛ bhɛa idharɛa chɔɔ ruma malukko :nɛa nyabha. Na ga bere idharrɛa rum nyabha, bere bassɛa kumulɔng.