Lɔga Ibbaysiyɛa :Yesusi Hira Amma :Lollu
5
1 Na Yesus ko zuga kɔbhbhɛa nɔng erre yirisiyɔ tandɔ na daga baa kèe Gergeson.a 2 Na Yesus hunaa ngani bhonsana gonggulɔ ngangaye, nɔng hirre am :lollu kona bhona bhee bhogoyɛte dha bere kòjjɛ zugo na itinynyandɛ ko nɔng. 3 Nɔng ngahirronu dha bere bhakkana hana igingony kingi. Na chɔɔ hirre dha bere chib gɔrgɔriyaye na ɔana, ninggɛ dhul. 4 Na nɔng dha tii hunde kìchib jagarɛ siggoye, na sɛnɔ kìchib gɔrgɔriyayeye, ken dur dur na hirre ɔana nɔng ninggɛ dhul. 5 Na dha bere bar ko kali wo hana igingony ko dhuminyaye tundɔ na ar wuy ngahandonu na ken rɛ bɛna bo lɛsha.6 Na hunaa dharɛsɛna Yesus ko rɛnaye, ngea gɔra nɛnɛ na tɔgɔdhɛsɛ kɔmma. 7-8 Na sɛɛsɛ :Yesusi, “Ngamɛnɛngita bu gɛrɛse, bhona bhɛa ngahirra na ogo!” Na mɛnɛngi yogo lɔgɔ goore na sɛɛsɛ, “Eriya Tumua Ɔana Lɔgɔ Kumulɔng, Yesuse, ngangaye ko anye kɔ̀lɔmnɛ ɔng? Kɔtɔllɔhaginy sara Tumu, ngatiranyɛanyi!”
9 Na ghinu :Yesusi na sɛɛsɛ, “Kèliyeny ɛnɛng?”
Na nɔng yagɛsɛ na sɛɛsɛ, “Kèleony Kamman ke ngaya kanɛo mɛriye.b” 10 Na tɔllɔhɛsɛ Yesus goore na yɔk bhokkonnɔ ngachugi.
11 Nɔng dha bere lɔ chɔwachinde bu mɛri ghɛnɛ gɛsayɔ jaa ngonu. 12 Na mɛnɛnga tɔllɔsɛsɛ Yesus na seyɛsɛ, “Igomo na chugagiy ngachɔwachinda toye na kùtunnukto yɔk hung.” 13 Na nɔng igomɛsɛ. Na mɛnɛnga bhonda bhɛa hiriguny na tunnugu chɔwachin toye. Na chɔwachin nge na shittɛ ngololɔ na ngɔyɛsɛ yirisi toye na gɔytɛ. Yɔk ngachɔwachindonu hunde kɛ̀lɛhɛnde heo a 2,000.
14 Na zugaa iwoyɛa chɔwachina nge na koo ago na yoktɛsɛ ngalɔkta zuga ɛlla ɔr toye ko ga ɛlla gunya toye. Na zugo muktiyaa na hoya na kargi ngalɔkta wa ɛrrinyaye. 15 Na hunaa honynyo chɔɔ bhɛaa ihɛa :Yesusiye, argi hira bɔɔ tɔgɛsɛnɛa :mɛnɛnga ku kamman na amma :lollu hunde dhaa bau na malugu ruminya na tɛu bayte, na yɔk tɛngɛrɛ bho. 16 Na zuga iwoyɛa chɔwachina wa orrɛa ngalɔkta, koo dhugundɛsɛ zugo lɔgaa kìbbaysiyɛa hira bɔɔ amma :lollu ko ngalɔkta wa ngɔsɛnɛ :chɔwachinnu yirisi toyeye. 17 Na zuga ngabaonu kumulɔng koo tɔllɔsɛsɛ Yesus na kɔdda baa nɛ na koktɔ.
18 Na Yesus hunaa irɔkka gonggulde, nɔng hira bɔɔ amma :lollu na kìbbayseo tɔllɔhɛsɛ Yesus na kidhi kari. 19 Na nɔng Yesus taganyɛ na madhɛsɛ lɔgɔ na sɛɛsɛ, “Inye ok ɔra nunu na yogɛsɛ zuga gunyu ngalɔkta bu dhandal wa chirbhisiyɛiny :Komoruyɔ na ibbaysiyɛinyde.” 20 Na hiri koo ogo na yogɛsɛ zuga bhakkɛa ngabaonu kèe Ori Tɔmmɔnde lɔgaa mesɛsɛna :Yesusi kumulɔng. Na zuga shikkɛa ngalɔkta kumulɔng iwachiyɛ.
Lɔga Sedhdheya Rɛsa Ko Ga Tɛriya Ilagasa
21 Na hunaa Yesus ko zuga kɔbhbhɛa nɔng erressɛa gonggulɔ na wokkɛa tandɔ na ngani ɛlla yirisiyɔ tugɔye, yɔk zuga bo mɛra hoya na muknyɛsɛ nɔng. 22 Na bhɛa gulsachinaa allinɛnɛa doraa madhinɛnɛa zuga Ayhudhi lɔga Tumu na kèe Yaros dha bere kun na i ngonu. Na hunaa orro Yesuse, dhugumo na tɔgɔdhɛsɛ kɔmma jagara gɛnyɛ. 23 Na tɔllɔhɛsɛ goore na sɛɛsɛ, “Sedhdheya nanu chinynyo ilaga na a rɛsi. Na mɛa ga wo na tadhɛ siyɔ na ibbaysi na kaba.” 24 Na Yesus dhi ko nɔng kari.
Na zuga bo mɛra kɔbhɔ nɔng na ikkisi goore. 25 Nɔng ngonu dha bere lɔ tɛrite taandɔ. Na dha bere taannana kingi oynya 12. 26 Na chɔllanɛ goore na kɔ akimɛte na dheshshana birinyaa gɛnyɛ kumulɔng na ngabasso. Na ilaga goore na jorrono chɔɔ bhɛa bɔɔ ilagasɛa sabbɔ.
27 Na hunaa shikko sabhana Yesusiye, koo dhula bhuguya Yesusi dari zukke kɛrghɛnɔ na idharu ruma nɛnɛ nyabhi. 28 Nɔng dha bere bhee idharɛ rum ngangaye, a ngaya ɛsɛdhɛ lɔgɔ hinisɔ na senɛ, “Mɛa anye hunde kòk na kìdhar chɔɔ ruma nɛnɛ hung, kabasiyɔye.” 29 Na hunaa idharraye bhɛa taa taanɛa kedhdhu shaw hung. Na nɔng tagu rɛa nɛnɛ hunde dhaa bau bhɛa ilagaya bɔɔ chɔllanɛnɛaye.
30 Na Yesus tagu ke tiri hunde dhaa ɔnneya barartinuny bhona bhɛa nɛnɛye, na budhu zugo na ghinu na sɛɛsɛ, “Inde idhar ruma nanuye a nɛng?”
31 Na yɔk zuga kɔbhbhɛa nɔng yaktɛsɛ na seyɛsɛ, “Yɔk ngazukta bu mɛrte ori chi hunde a ngagiya ikkisenyɛye, na mɛa ‘Idharrany noy?’ seni kɛ ɔng?”
32 Na nɔng Yesus budhɛ na maragu zugo dirr na kar hirre wa idhar ruma nɛnɛye. 33 Na tɛri hunaa taga ngalɔkta kìbbaysiɛye, tɛngɛru bho na bharriyo tik tik na ko na tɔgɔdhɛsɛ Yesus kɔmma. Na dhugunɛsɛ Yesus lɔgaa messo :nɛa kumulɔng bhɛa anɛa dhere hunde dhaa idhar :nɛaye. 34 Na sɛɛsɛ :Yesusi, “Hoya nanuye, wa bau ke ngaya yɛbhbhɛanyde. Na mɛa ok shɛɛ ke na bo challa na hɔng ngailagayta bɔɔ chɔllainyde.”
35 Na Yesus hunde chinyi ngani yokkono lɔgɔ ngangaye, yɔk zug gena hoya doraa Yarosi hira ku gulsaa allinɛnɛa doraa madhinɛnɛa zuga Ayhudhi lɔga Tumu. Na yoktɛsɛ Yaros lɔgɔ na seyɛsɛ, “Sedhdheya nunu wa garra, na hira madhdhiy ngatani!”
36 Na Yesus hunaa shikko ngalɔkta yokkonɛ :zuguye, nɔng bhassu na sɛɛsɛ gulsaa allinɛnɛa doraa kàmadhɛa zugo lɔga Tumu, “Yɛbhany hung! Ngadɛɛsi!”
37 Na nɔng taganyɛ zugo kumulɔng bhɛa senno ngakɔɔbhtɛ nɔng doraa Yarosi. Na dhi ko Betiros ko Yaykob ko gochonga Yaykobi kèe Yohanis sɔng. 38 Na hunaa hɛa na dokkɛa doraa gulsaa allinɛnɛa doraa madhinɛnɛa zuga Ayhudhi lɔga Tumuye, Yesus aru zugo hunde ruɛ burr na bholollɛye. 39 Na tunnugu dori na sɛɛsɛ zugo, “Ruo na bholollo kɛ ɔng? Eri ungu hung, ngani kerro.” 40 Na yɔk zugo chɛktɛ nɔng.
Na hunaa obhonisiwa zugo na bhonda bhɔ kumulɔng na tewa ushaye, eliu eri jɔnɛ ko chɔgɔnɛ ko zuga kɔbhbhɛa nɔng wa dhianɛa kari na ago dorigiye toye bhɛa ungusɛa :eriyɔ. 41 Na ibhu eri siyɔ na sɛɛsɛ, “Talita koum!” (Talita koum a bhɛa kènɛa, “Ngahoyta, kesennaginy, ga bana tunɔ!”) 42 Na eri bana kɛhɛy ke tiri na chilu tunɔ, na yiriu dorigiye toye. Nɔng eri dha bere oynyaa gɛnyɛ a 12. Na zugo argi ngalɔkta na iwachiyɛ goore dhogoy. 43 Na nɔng Yesus aynɛ zugo lɔgɔ ke dhandali na ngalɔkta zug gena ngayogɛsɛnɛ dhul. Na yogɛsɛ zugo lɔgɔ na kayɛ eri ahite ami.