Lɔga Ibbaysiyɛa :Yesusi Hira Chudhinɛna
9
1 Na Yesus koo irrɔgu gonggul, na erreu yirisi na wagu ɔra nɛnɛa. 2 Na yɔk zug gena ngarta hirre chudhinɛ ungu hayagiye na ayɛsɛ nɔng na kibbaysiyɔ. Na nɔng hunaa orro yɛbhaa ngazuktonuye, sɛɛsɛ hiri, “Ngahirra, ngashurnɛni! Lɔga gunyu gɛrsa wa kùjjukta na garta.”3 Na hunaa zuga madhdhɛa zugo Damiya Tumu bere kàjjɛa Muse gena shikkɛa ngalɔktaye, ɛsɛdhɛ lɔgɔ hinisichinne na se, “Na kèe nɔng ngahirra dhɔm Tumu.”
4 Na nɔng Yesus tagu lɔga ɛsɛdhdhɛa :yɔkku na sɛɛsɛ, “Ngangaye lɔga gɛrsa hinisichinne ɛsɛdhdho kɛ ɔng? 5 Mɛa bhasen hunde hiri kèsenɛsɛn, ‘Lɔga gunyu gɛrsa wa kùjjuktaye,’ oo bhasen hunde kèsenɛsɛn, ‘Bana ogoye?’ 6 Yee, ga kɔ̀dhɔlagung bhɛa lɔmɛa :Hiri Hoynɛ buyna ujjugɛa lɔga gɛrsa bay ngaya na tagatɔ ni go!” Na sɛɛsɛ hiraa chudhinɛna, “Bana ibha hayaa nunu na ok doraa nunu.” 7 Na hiraa chudhinɛna bana na ogo doraa nɛnɛ. 8 Na zugo hunaa orrɛa ngalɔktaye, dɛɛbɛ na iwachi na ayɛ Tumu diram ke ngaya ajjɛ zugo ngabuynda bu ku ngangaye.
Lɔga Bɛrranɛa :Yesusi Matiyos Na Keteɛ Hira Kɔbhbha Nɔng
9 Na Yesus hunaa bansana ngonu na kɔaye, koo aru hirre muk gharata kèe Matiyos hunde i bay bhɛa mugɛa gharataye na sɛɛsɛ, “Ga kɔbhaanydɔ!” Na nɔng bana na kɔbhu.
10 Na Yesus hunaa iho doraa Matiyosi bhɛa aminɛnɛa ko zuga kɔbhbhɛa nɔngge, yɔk zuga mukkɛa gharatab ko “ga lɔmmɛa ridhing”c hoya na muldɛ kari. 11 Na zuga kɔbhbhɛa damiya Bhɛrɛsi hunaa orrɛa ngalɔktaye, ghini zuga kɔbhbhɛa Yesus na seyɛsɛ, “Ngangaye ngahirra madhdhungge ko zuga mukkɛa gharata ko “zuga gɛrsa lɔmmɛa ridhing” kari mulnɛ kɛ ɔng?”
12 Na Yesus hunaa shikko ngalɔktaye sɛɛsɛ, “Yɔk zuga ngailagassɛayo bhee hinɛ akim ninggɛ. Gee hinnɛ akimbe a zuga ilagassɛa sɔng. 13 Na mɛa igge ga ago maraga lɔga sennɛa, ‘Anye bhɛa zuga uddullogonynyɛa go, goore kihini ga chirbhisiyɛa zugo,’ na taga bhɛa ku hologun. Nɔng anye huna bere kuguni, bere keni kàlamma zuga lɔmmɛa ridhing. Bhee bere kugunɛ na kàlammay zuga ridhing ningginɛna ngayo.”
Lɔga Kìghinɛa Yesus Bhɛa Zuga Kɔbhbhɛa Nɔng Rɛhi Hunynɛn Ngachibɛayo
14 Na koo zuga kɔbhbhɛa Yohanis hoya na ghini Yesus na seyɛsɛ, “Agge ko zuga kɔbhbhɛa damiya Bhɛrɛsi tii tii kichibbo rɛhi hunynɛn. Na yɔk zuga kɔbhbhinyɛa inye rɛhi hunynɛn ngachibbɛo kɛ ɔng?” 15 Na nɔng yagɛsɛ na sɛɛsɛ, “Ngangaye karuy hunde duriye, anda rɔra ɛlla kari munyussɛyɔ? Ngamunyussɛyo. Nɔng kolea kɛ̀hɛyɛa karuy na ko yɔk kari ngaɛlɛayo, ale andanayɔ. Na ngakoleonu yɔk ale chibɛ rɛhi hunynɛn.”
16 Nɔng inde ibhbhana ruma ngani chaga bhokkona na dhagɛsɛn na nyagasa ninggɛ. Chɔɔ ko hunde kadhagɛsɛ, nganda chakte ale rudh nganda nyagasse na aminɛ na ɛrrɛynɛ na jorrono hologuna bɔɔ sabbune. 17 Na ko nɔng hirre ibhbhana gimaya woynuny ngani kùchudhdhana na oy kammayiya nyagasa ninggɛ. Chɔɔ ko hunde koy, gimay bhɛsi ngakammayiya nyagasse na udhuynɛ na gara rang na kammayi ɛddɛnɛ na hologunde nɛ ninggɛ. Nɔng gimaya woynuny ngani kùchudhdhana maya kòy kammayiya ngani chaga na aynde woyn ko kammayi kari ɛlɛ shɛɛye.”
Lɔga Sedhdheya Rɛssa Ko Ga Tɛriya Taannana
18 Na Yesus hunaa ngani yogɛsɛna zugo ngalɔktaye, nɔng hirre ku gulsaa doraa madhinɛnɛa zuga Ayhudhi lɔga Tumu kona ko na tɔgɔdhɛsɛ nɔng kɔmma na sɛɛsɛ, “Sedhdheya nanu wa erra mɛarrɛ. Na wo na tadhɛ siyɔ na kabana.” 19 Na Yesus bana na dhi ko hiri. Na ko yɔk zuga kɔbhbhɛa nɔng dhi kari.
20 Na bere lɔmma tɛrite dha bere taannana kingi oynya 12 na chɔllanɛ goore. Na koo dhula bhuguya Yesusi dari na idharu ruma nɛnɛ nyabhi. 21 Nɔng dha bere ɛsɛdh lɔgɔ hinisɔ na se, “Mɛa hunde kìdhar ruma nɛnɛ hung, anda kabasiyɔ.”
22 Na Yesus budhɛ na gɔnyu tɛri na sɛɛsɛ, “Hoya nanuye, ngashurnɛni! Wa bau ke ngaya yɛbhbhɛanyde.” Na tɛri bau nga hung.
23 Na Yesus hunaa kɔa na dokko doraa bhakka hira ku gulsaa doraa madhinɛnɛa zuga Ayhudhi lɔga Tumuye, aru zugo hunde bu kunjiɛ dum na ruɛ na gena ɛbbɛkkɛ morroa kɛ̀bbɛkka duhugiyeye. 24 Na sɛɛsɛ zugo, “Ga isogotɔ! Eri ungu hung, ngani kerro.” Na yɔk zugo chɛktɛ nɔng. 25 Na zugo hunaa kòbhonisiyoa bho na tewa ushaye, nɔng Yesus tunnugu dori toye na ibhu sedhdhey siyɔ. Na sedhdhey bana na chilu tunɔ. 26 Na kamannaa ngalɔkta tɛhɛtɛy ko ngabaonu kumulɔng.
Lɔga Kibbaysiyɛa Zuga Kawarɛ Chaga Ko Hira Kadhdhakka Ibhinɛna
27 Na Yesus hunaa ngani dhɔtta ngonu na kɔaye, yɔk zukte ku ramman kawarɛ chagi kɔbhta nɔng na yoktɛsɛ lɔgɔ goore na seyɛsɛ, “Ashaya Dawiyye,d chirbhisieyyɔ!”
28 Na kɔbhɔ Yesus chɔɔ doraa tunnukko :nɛa. Na ghinu :Yesusi na sɛɛsɛ, “Ngangaye, hunde anye anda kibbayseung na kawara gu onɛye, yɛbhbho chi dha?”
Na yɔk yaktɛsɛ na seyɛsɛ, “Ee kɛyɛbhbhoyɔ, Komoru.”
29 Na Yesus kumu yɔk kawarɛ na sɛɛsɛ, “Ba ngadamita yɛbhɛoye.” 30 Na yɔk kawara gɛ oyɛ. Na dagɛsɛ :Yesusi go na sɛɛsɛ, “Ngalɔkta hir kona ngayogɛsɛno dhul!” 31 Na yɔk ago na yogo kamannaa :Yesusi na tɛhɛtɛy ko ngabaonu kumulɔng.
32 Na hunaa ngani dhɔttɛa ngonu na hɛaye, yɔk zugo hoyɛy hirre tɔgɛsɛn :mɛnɛngiyɔ na kadhdhakka ibhinɛ na ayɛsɛ Yesus. 33 Na Yesus obhoniseo mɛnɛngi bhɛa hiraa kadhdhakka ibhinɛna na hiri mɛzziu. Na zugo iwachiyɛ na se, “Lɔkte ku nganga baa Isirayeli ngani kàrgito dhul.”
34 Na yɔk zuga kɔbhbhɛa damiya Bhɛrɛsi se, “Ngahirra mɛnɛngi obhoniseono barartina gulsaa mɛnɛnguny bo.”
Lɔga Zuga Suninɛna Anɛa Muchugi
35 Nɔng Yesus bere woo ori toye kumulɔng na madhɛsɛna zugo lɔga Tumu doriyoa gɛ madhinɛnɛa zuga Ayhudhi, na kɔbhɛsɛna kamannaa challa ale lɔmɛa :Tumu zugo. Na bere ibbayseo chɔɔ zuga ilagassɛa mutanyoga bhiy bhiy kumulɔng. 36 Na nɔng hunaa orro ngazuktonu bu mɛrte, towonydɛsɛ :zugu ke ngaya chɔllanɛnɛ goore na hirre ɛana yɔk ninggɛ na hɛt ko mɛdɛrniya hira iwoo ningginɛnaye. 37 Na sɛɛsɛ zuga kɔbhbhɛa nɔng, “Yɔk liwaa kùsuneo a mɛri. Na yɔk zuga suninɛna a muchugi. 38 Na mɛa ga ghini Komoru, ɛnaa senno kusunɛɛ, na kittono zuga suninɛna gena na kusuni liwaa gɛnyɛ.”