Lɔga Kibbaysiyɛa Hira Amma :Gedhdhe
8
1 Na Yesus hunaa shidhinyana kutulɔye, zuga bo mɛra kɔbhta nɔng. 2 Na koo hirre am :gedhdhe kona ko na tɔgɔdhɛsɛ Yesus kɔmma na sɛɛsɛ, “Komoru, mɛa hunde sea :inynyo sabbaa nunu, anda onynyonony na kabasi na kihi hurr.”3 Na Yesus tadhɛ hiri siyɔ na sɛɛsɛ, “Wa keseyau, na mɛa ba, na tɛ hurr.” Na gedhdhe tururriyaa na hiri bau shaw hung. 4 Na sɛɛsɛ :Yesusi, “Ngalɔkta kìbbaysiyɛinyde, ngayogɛsɛ hir kona! Na nɔng ga ok, dhɔlɛsɛ gɔldanga doraa Tumu barara rɛ. Na ibha ahaa bere sennagungu ꞉Muse kènno tonydɛy, na uddulɛsɛ Tumu. Na kartiny :zugu na kataktiny hunde dha bɔɔ bau dhereye.”
Lɔga Yɛbhaa :Gulsaa Bholisuny
5 Na Yesus hunaa kɔa na dokko Kibirombe, nɔng hirre ku gulsaa bholisuny kona ko na assa nɔng na tɔllɔhɛsɛ na kɛayɔ. Na sɛɛsɛ, 6 “Komoru, anye kɔlɔmi hira kachchanyi inde chudhinɛ na ilaga ke rɛsi. Na mɛa ungu dorigiye.”
7 Na sɛɛsɛ :Yesusi, “Aleo kɔgɔ na kibbaysiyɔ.”
8 Na nɔng gulsaa bholisuny yagɛsɛ na sɛɛsɛ, “Komoru, anye bhɛa nunu kani chinyi ghasuri na doraa nanu ngakuni. Na nɔng ga yogo lɔgɔ ngaya hung, na hira kachchanyi kaba. 9 Anye bhee kesennagɛiny ngangaye, a ngaya ko anye kɔlɔmɛ gulsachina ganyu bibiyo allinɛnɛanyɛa ko bholisa ganyu kallinɛnɛiye. Na hunde kesenɛsɛn bholisa ganyu kona, ‘Ogoye’ kɔyɔ. Na hunde kesenɛsɛn kona, ‘Wongaye!’ kundɔ. Na ko nɔng hira kachchanyi hunde kesenɛsɛn, ‘Me ngangaye!’ messɔ.”
10 Na Yesus hunaa shikko ngalɔktaye, iwachɛɛ na sɛɛsɛ zugaa kɔbhbhanɛa nɔng, “Ga shigitɔ! Anye bhɛa zuga Isirayeli, hirre yɛbhbhany hunde ngahirraye kona ngani kàrro dhul. 11 Na mɛa anye kesennagung ɛnɛnggeo, yɔk zugo ga mɛra ale bansanɛ yalɔ ko kɛnkɛnɔ na hony na ɛl ko Awuraham ko Isak ko Yaykob bhɛa lɔmɛa :Komoruya tumonya zugo na ammɛ tila kari. 12 Na yɔk zuga bere kòjjɛsɛna ba kɔk kènno ale kɔtɔlɔ :Tumu, ale kùchuk bhɔ bhɛa ku mugur, ruyɛa :zugu na rimɛa nigiya.”
13 Na koo Yesus sɛɛsɛ gulsaa bholisuny, “Ogo! Na hiri any kaba ngadamita wa yɛbhɛye.” Na koleaa senɛa :Yesusi nganga, nɔng hiraa ilagasa dorigiye gɔrronu bau nga hung.
Lɔga Kibbaysiyɛa Zuga Bo Mɛra
14 Na Yesus hunaa kɔa doraa Betirosiye, aru nyaga Betirosi hunde ilaga na rɛ awuren na ungu bayte. 15 Na Yesus kumu siya nyaga Betirosi na awurneyaa gina garu na bau. Na bana na tagayu Yesus.
16 Na hunaa bho tewa ririnyaye, zugo hoyɛy zuga bo mɛra tɔgɛsɛnɛa :mɛnɛngu. Na nɔng Yesus yogɛsɛ mɛnɛnga lɔgɔ na obhoniseo na chugu. Na ibbaysiu zuga ilagasɛa kumulɔng. 17 Na hunaa anna ngangaye, lɔga bere yokkono :hira yogɛsɛna zugo lɔga yokkono :Tumu kèe Isayas urruknyɛsɛ. Yɔk ngalɔktonu sennɛ,
“Nɔng wa ibhaa mutanyoga ga na tɔlɔma :nɛa,
na tɛwa chɔɔ ilagayɛna kɔ̀lɔmma :aggeu.”
Lɔga Kòdokkono Hunde Kɔ̀ɔbh Yesusse
18 Na Yesus hunaa orro zugo hunde muknyɛsɛnɛ nɔng ke mɛriye, yogɛsɛ zuga kɔbhbhɛa nɔng lɔgɔ na kerre yirisiyɔ tandɔ. 19 Na nɔng hira madhdha zugo Damiya Tumu bere kàjjɛa Muse kona ko na assa Yesus na sɛɛsɛ, “Hira Madhdhiy, anye kɔɔbhbhiny inye hande kɔɛye kumulɔng.”
20 Na nɔng Yesus yagɛsɛ na sɛɛsɛ, “Yɔk dhokkoli bolkɛna gɛ ɛllɛ. Na ko yɔk shɔa doriyoa gɛ ɛllɛ. Na nɔng Hiri Hoynɛ chɔɔ bhɛa igingo ninggɛ.”
21 Na hira kɔbhbha nɔng kona sɛɛsɛ, “Komoru, ga sabbɔ igomogony na kòk kòy baba nanu.”
22 Na nɔng Yesus sɛɛsɛ, “Yɔk zuga rɛssɛa any koytɛ :eygo kɛngɔ. Inye ga kɔbhaanydɔ!”
Lɔga Iggarisiyɛa :Yesusi Huroya Bansana Yirisiyɔ
23 Na koo Yesus irrɔgu gonggul na ko yɔk zuga kɔbhbhɛa nɔng irrɔgɔ na dhi kari. 24 Na huroyte bu ɔnnɛ bana yirisiyɔ toye dari na chukkiu yɔk ko bhee gonggul dhabbanɛ ma. Na nɔng Yesus bere ungussoyɔ. 25 Na zuga kɔbhbhɛa nɔng ago na ibbanisi na seyɛsɛ, “Komorue, te rɛsɛ so! Ibbaysieyyɔ!”
26 Na yagɛsɛ :Yesusi na sɛɛsɛ, “Ngazukta Tumu goore ngayɛbhbhooye, ngangaye ɛngɛrso bho goore kɛ ɔng?” Na bana na ɛggɛɛsɛ huroy ko yirisiyaa chukkinɛna na yɔk dhittɛ rib na tɛldi lɛtɛtɛm.
27 Na yɔk zugo iwachiyɛ na ghindɛ kɛngɔ na se, “Na dha nganda a hirre kunɛnɛng, shikkɛ chɔɔ :ngɔttɛnu ko :maa yirisinyde?”
Lɔga Kibbaysiyɛa Zuga Ku Ramman Amma :Lollu
28 Na nɔng hunaa errewa yirisiyɔ tandɔ na dakka baa zuga kèe Gergesonde, yɔk zukte am :lollu ku ramman bhonda bhogoyɛte dha bere kòjjɛ zugo na itinynyandɛ ko nɔng. Yɔk dha bere a lolloa dhakkɛa zugo bo kɛ̀ngɛrsa na chɔɔ ngagangguonu ɛlɛ :yɔkkuye zugo ngadhoyɛayo dhul. 29 Na mɛnɛnga yokto lɔgɔ goore na seyɛsɛ, “Eriya Tumue, ko agge kɔ̀lɔmnɛ ɔng? Wa kou na tiranyɛiy hunde kolea kàttiyɛiy agge ngani kugooye?”
30 Nɔng ngoonu ɛlɛ :yɔkkuye ko rɛna bere lɔmma chɔwachinde ghɛnɛyɔ. 31 Na mɛnɛnga tɔllɔsɛsɛ Yesus na seyɛsɛ, “Hunde seni chugeyte, chugagiy ngachɔwachinda toye na kùtunnukto yɔk hung.”
32 Na Yesus sɛɛsɛ mɛnɛnga, “Bhonda ago!” Na yɔk bhonda bhɛa zugony na tunnugu chɔwachin toye. Na chɔwachin bhuktiyaa na nge na shittɛ ngololɔ na ngɔyɛsɛ yirisi toye na gɔytɛ na ergi rang. 33 Na yɔk zugaa iwoyɛa chɔwachina nge ɔrɔ na yoktɛsɛ zugo ngalɔkta kumulɔng ko gaa kìbbaysiyɛa zuga bere tɔgɛsɛnɛa :mɛnɛngu. 34 Na zugo muktiyaa ɔr toye kumulɔng na hoya na kitinynyandɛ ko Yesus. Na hunaa orrɛaye, tɔllɔsɛsɛ na kɔdda baa nɛ na koktɔ.