Lɔga Madhinɛnɛa :Yohanisa Churro Zugo
3
1 Na ngakaldonu hirre kèe Yohanisa Churro Zugo ko na madhu zugo korua iho baa Yudha, 2 na sɛɛsɛ, “Kolea senno kɔtɔlɔmɛ :Komoruya tumonya zugo mɛa te ja. Na mɛa ujjugu lɔga gu gɛrsa na wakta gɔra nɛnɛ.” 3 Nɔng ngahirra a hira bere lɔga gɛnyɛ yokkono :hira yogɛsɛna zugo lɔga yokkono :Tumu kèe Isayas na senno,“Hir Kona ale i korugiye, na yokkono lɔgɔ goore na se,
‘Kɔhɔ ganggua Komoruyny,
na hande rɔngɔte kɛtɛldi dib.’”
4 Nɔng Yohanis dha bere maluk ruma kèmessono chɔra galiseny na kurɔ chib kɔdhɔrɔ na am rɛtɛa dusuny ko maradhoga. 5 Na yɔk dha bere zug gena bansanɛ Yerusalemɔ ko baa Yudha kumulɔng ko oriya ɛlla baa Yordanosi dheyyɔ dheyyɔ kumulɔng na hony bhɛa ihɛa :Yohanisi, 6 na dhugunɛsɛnɛ Tumu lɔga gɛ gɛrsa na chur :Yohanisi kidhoa Yordanosi.
7 Na hunaa Yohanis orro zuga bo mɛra kɔbhbhɛa damiya Bhɛrɛsi ko ga kɔbhbhɛa damiya Sodhokka hunde hony bhɛa churɛa :nɛa zugoye, sɛɛsɛ, “Ngahoyaa kurmusinyanyde, ngangaye inde ibbachchung na jara ngaattiya Tumu kunde a nɛng? 8 Hunde hinno bhɛa senno kùchurrɛung na jartɛ attiye, ga sabbɔ ujjugu lɔga gu gɛrsa na mesigi lɔga dhɔllanɛa bhɛa anɛo zuga dha bɔɔ ujjukto lɔga gɛrsa dhereb na waktao gɔra nɛnɛ! 9 Na ngaɛsɛdhɛ lɔgɔ na se, ‘Agge kàn zuga kɔ̀lɔmma kokonga na Awuraham, na ale Tumu ngaattieysho.’ Mɛa ga shiktonyuyɔ! Nɔng Tumu hunde kibha ngabɛnda na kɔbhɔdh na kete erroa Awurahami, bhɔdhtɔ. 10 Nɔng chɔɔ mɛa wa ojja bheya nɛnɛ kɔk na kɛtɛngɛdhay kɛnde kawara challa ngadhungnganɛoye. Na hunde tɔlɔ gee kawara challa ngadhungnganɛoye, kedhdhana rang na chɔgɛ go.
11 “Nɔng anye mɛa kuchurrong ma hung ke bhɛaa dhugunɛsɛno Tumu lɔga gu gɛrsa na ujjugɛa. Na nɔng inde ɔnnɛ na jorronony anyeye ale kɔbhbhananydɔ. Nɔng bhɛa nɛnɛ, anye kani na chinynyo ghasura chɔɔ chahaa gɛnyɛ ngakɔlɔgɔniyo. Na ale churrong Kuloya Tumu ko gogiye.” 12 Nɔng chɔɔ mɛa toye galiya ɛbbɛgɛa liwa lɔ siyɔ, na ale ɛbbɛk liwaa gɛnyɛ na kayeono na kawarɛ oy balanggigiye na hunggoga chɔgɛ goa ngadhittinɛnao dhul ko kingi.”
Lɔga Kùchurɛa Yesus
13 Na ngakoleonu ko nɔng Yesus bana Gelilagiye na ko chɔɔ Yordanos na kuchur :Yohanisi. 14 Na nɔng Yohanis illobu bhɛa senno katamarɛ bhɛa churɛa Yesus, na sɛɛsɛ, “Na inye wa kou na kuchurreny :anynyo ɛnɛng? Maya nganga ngayo! Anye maya kani hirre churrony :inynyoye.” 15 Na nɔng Yesus yagɛsɛ na sɛɛsɛ, “Nɔng inye yogi shɛɛ chi. Na nɔng mɛa ga igomo na churony hung ke ngaya agge kànɛ zuga kùrrugɛsɛna lɔga Tumu ridhing ningginɛna kumulɔngge.” Na Yohanis igomɛsɛ na churu. 16 Na Yesus hunaa ngani kùchurro na bansana ma toye ngangaye, tumu oyɛ ke tiri na aru Kuloya Tumu hunde dhibɛsɛn nɔng huna yikkayny na liginɛ nɔngge. 17 Na Tumu yogo lɔgɔ surr tumɔ na seu, “Erite nan ajjany hini hɔldin kibhɛsɛn hiniye, a nganda.”