Lɔga Zuga Gayɛa Bho Boyɛsɛnɛa Yesus
2
1 Na Yesus hunaa hudhukkiyaa Betelemɔ ɔra iho baa Yudha bɛrgua allinɛnɛa :komoruya kèe Herediose, yɔk zukte gaɛ bhoa banda yalɔ na hoya chɔɔ Yerusalem, 2 na ghini zugo na seyɛsɛ, “Ngangaye, Komoruya Ayhudhi bɔɔ ngani hudhukkinyana, i ori? Agge bɔɔ korro munyunyiya nɛnɛ yalɔ hunde ujjonoye. Na mɛa aynde kohonyɛo na kɔ̀tɔgɔndɛsɛo kɔmmaye.”3 Na komoru Heredios hunaa shikko ngalɔktaye, churɛ. Na ko yɔk zuga Yerusalemi kumulɔng churtɛ ko nɔng kari. 4 Na nɔng koo muga gɔldangɛa bibiyo doraa Tumu barara ko zuga madhdhɛa zugo Damiya Tumu bere kàjjɛa Muse kumulɔng na ghinu na sɛɛsɛ, “Ngangaye, Kirisosb bere kèe ale hudhukkinya ori?” 5 Na yɔk yaktɛsɛ na seyɛsɛ, “Bere kènno ale hudhukkinya Betelemɔ ɔra iho baa Yudha. Na chɔɔ lɔga gɛnyɛ annaa dha bere tɔgɔdhɛsɛa :hira yogɛsɛna zugo lɔga yokkono :Tumu dadab na sewa,
6 ‘Ngaɔrra kènniny Betelem ihi baa Yudhaye,
inye bhɛa ngaoriya ɛl Yudhagiyeye, chinyi ngaaniyo
ke ngaya hira allinɛnɛa zuga ganyu Isirayeli
na lɔmma shɛɛ huna mɛdɛrniuny ale bansanɛ bhɛa nunuye.’”
7 Na Heredios koo eleo zugaa gayɛa bho dari na ghinu kolee bere orɛ munyunyiye. Na yɔk kɔbhtɛsɛ na tagu shɛɛ. 8 Na koo egu Betelemɔ na sɛɛsɛ, “Ago na lamiyo eri bhee ihɛye. Na hunde artoye, hoya na yoktogonyu na ko anye kòk na kɔ̀tɔgɔdhɛsɛ kɔmma.”
9-10 Na yɔk hunaa shikta ngalɔkta komoruynyde na tewa ushaye, banda na ago. Na koo argi munyunyiya bɔɔ kɔbhbhanɛa surr yalɔ na hinisi te hɔli goore dhogoy. Na dhiganu :munyunyiyɔ dirr ko bhee dogɛ bhɛa ihɛa :eriyɔ. 11 Na hunaa tunnukkɛa doriye, argi eri hunde ɛl ko jɔnɛ Ngamariyambe, na tɔgɔndɛsɛ kɔmma na ayɛ diram. Na koo oyo giligilinyaa gɛ lɔmmɛa ahaa bo dhandala na ibhta worginya ko kɛya ɔngɔnaa hur hur ko galite hɛt ko bokkoy na ayɛ. 12 Na yɔk koo ibbayu :Tumu kunaɔ na bhɛa Herediosi ngawokkɛ. Na koo dha ganggu kona na waga baa nɛ.
Lɔga Kèngesɛa Yesus Gibsigiye
13 Na hunaa zuga gayɛa bho aytaye, nɔng hira ekko :Tumu kona ko na yogɛsɛ Yoseb lɔgɔ kunaɔ na sɛɛsɛ, “Eri lami :Herediosi na kɔgɔndɔ. Na mɛa bana ibha eri ko jɔnɛ na jarɛ Gibsigiye. Na ko bhee koyokkogɛiny kolee ale wokkonɛye, ga tɛ ngonu!”
14 Na Yoseb bana na ibha eri ko jɔnɛ barɔ na ɔgɛ Gibsigiye. 15 Na tɛu ngonu ko bhee Heredios rɛsɛ. Na hunaa iho ngonuye, lɔga dha bere yokkono :Komoruyɔ Tumu bhɛa hira yogɛsɛna zugo lɔga yokkono :nɛa, urruknyɛsɛ. Yɔk ngalɔktonu sennɛ, “Anye wa keliwa eriya nanu Gibsigiye.”
16 Na Heredios hunaa tagga lɔga tabhɛa :zuga gayɛa bhoye, dɛbu goore. Na yogɛsɛ bholisa gɛnyɛ lɔgɔ na kago Betelemɔ ko oriya ɛlla dheyyɔ dheyyɔ na kindi erroye may oynya ku ramman ko gee oynya ramman ngani keteyoye kumulɔng. Nɔng bhee dha bere se kinɛ erroye a ngaya dha bɔɔ zuga gayɛa bho dhugunɛsɛnɛ nɔng kolea orɛa munyunyi hunde dha bɔɔ te oynya rammande. 17 Na hunaa tewa ngangaye, lɔga bere yokkono :hira yogɛsɛna zugo lɔga yokkono :Tumu kèe Ermiyas bhugnyɛsɛ. Yɔk ngalɔktonu sennɛ,
18 “Ramagiye zugo wa turta goore na kunjiya “Dumm!”
Na Ngarahel turra erroa gɛnyɛ,
na tamara chɔɔ bhɛa ilalɛa :zugu
ke ngaya hukkinyanɛ erroa gɛnyɛye.”
Lɔga Wogɛa :Yosebi Naziretɔ
19 Na hunaa Heredios erra na tewa ushaye, nɔng hira ekko :Tumu kona ko na yogɛsɛ Yoseb lɔgɔ kunaɔ 20 na sɛɛsɛ, “Bana ibha eri ko jɔnɛ na yak baa Isirayeli ke ngaya zuga bɔɔ senno kɔgɔdhɔ eri dha bɔɔ ertɛye.”
21 Na Yoseb bana na ibha eri ko jɔnɛ na wagu baa Isirayeli. 22 Na nɔng hunaa shikko lɔkte sennɛ liya Herediosi kèe Arikɛla dha bɔɔ sɛrɛu bhɛa chɔgɔnɛ na te komoruya Yudhaye, tɛngɛru bhɛa senno kɔgɛ ngonu. Na koo ibbayu :Komoruyɔ Tumu kunaɔ na banda na ago baa Gelila. 23 Na koo ogo chɔɔ ɔrre kèe Naziret na bhagu ngoonu. Na lɔga dha bere yokkonɛa :zuga yogɛsɛna zugo lɔga yokkono :Tumu sennɛa, “Nɔng ale elɛɛ :zugu hira Nazireti,” urruknyɛsɛ.