Lɔga Yoseb Dhugunɛsɛna Gɔynggɛ Rɛ
45
1 Na koo Yoseb bhee se kinyimɛ lɔgɔ bhɛa ɛlɛa ko gaymanyaa gɛnyɛ garu.
Na arɛsɛ wuy na sɛɛsɛ,
“Bhono bhɔ!”
Nɔng Yoseb dha bere huna dhugunɛsɛna gɔynggɛ rɛ,
ɛl ko gɔynggɛ sɔng.
Hir kona ninggɛ.
2 Na turu goore na shigi :zuga Gibsi na koo yogo na shigi chɔɔ zuga doraa komoruya Gibsi.
3 Na Yoseb sɛɛsɛ gɔynggɛ,
“Anye kani Yoseb.
Na baba nanu ngani i basseyɔ?”
Na gɔynggɛ yɔk dɛɛbɛ na bhɛa yagɛsɛnɛa lɔgɔ garu ke ngaya ɛngɛrsɛ nɔngge.
4 Na sɛɛsɛ :Yosebi,
“Ga hoya jaa bheya!”
Na hunaa hɛaye,
sɛɛsɛ,
“Anye kani gochonga nu kènnonyi Yoseb bere talnɛnɛanyu na kòhonyɛanyi Gibsi.
5 Na mɛa igge ngachurnɛnno na ujukkanno rɛhiya gu.
Ngalɔkta bere ɛddɛo na talnɛnɛanyuye,
dha bere ekkonony ꞉Tumu sabbɔ na kìbaysi zugo.
6 Yɔk mɛa oynyaa zugo dhagɛa hozzo bɔɔ tewa ramman.
Na yɔk oynya hayna ga zugo ngakɔhinɛnɛayoa na ba anɛa hozzo ale ngani andanɛyɔ.
7 Nɔng Tumu dha bere ibhbhanany na ijimiseonony Gibsi na kibayseung igge na ale tɔlɔmɔ asha na bhaga ba ke na bo challa.
8 “Na ngalɔkta bhee anɛ ngangaye,
dha bere ekkonony :Tumu.
Igge ngaekkononyoo.
Nɔng Tumu anna bɔɔ ibhaanyɔ na ketewa hira kɛhɛtto ko baba komoruya Gibsi kàmaragi lɔga gɛnyɛ.
Na aany gulsamo na ketewa hira kallinɛnɛi ahaa gɛnyɛ ko baa Gibsi kumulɔng.
9 Na mɛa banda ke tiri na waga na assa baba nanu na seyɛsɛ,
‘Eriya nunu Yosebi se kèseyaginy ɛnɛnggeo,
“Tumu bere aanyɔ gulsamo na ketewa gulsaa bo kallinɛnɛi baa Gibsi kumulɔng.
Na wo ke tiri,
dhul ngaihi.
10 Na muga ahaa gunyu lɔmi kumulɔng ko bea gunyu ko tena gunyu ko mɛdɛrniya gunyu na dhigana erroa gunyu ko ashaa gunyu.
Na zɛga na bhak Gesem bhɛa kabhagi :anynyo jaa.
11 Yɔk oynyaa ba anɛa hozzo gee ku hayna ale ngani andanɛyɔ.
Na zɛga na bhak Gesem na inye ko zuga gunyu ko ahaa gunyu iwoi kɛ̀aung :anynyo amissɛyɔ na hozzo ngadhakkungu.
Hunde ngaziggonnoye,
ale chɔllanɛno goore.”’”
12 Na koo sɛɛsɛ,
“Anye hunde kani Yoseb dhereye,
igge wa taktanyu.
Chɔɔ ko nɔng gochonga nanu Biniyam wa taganyɔ.
13 Na mɛa ago na yoktɛsɛ baba nanu ngalɔkta bu kɔlɔmɛ dirama bo gore Gibsigiye ko ngalɔkta orrono ꞉iggeu kawarreye kumulɔng na dhiganda ke tiri.”
14 Na Yoseb ko Biniyam issayɛ na chardhuktɛ na turgiyo.
15 Na koo issayɛ ko gɔynggɛ kumulɔng na turɛsɛ sak sak.
Na hunaa yagaa hiniye,
dhaga kali.
16 Na hunaa komoruya Gibsi ko gulsachina gɛnyɛ shikkɛa bhɛa honynyɛa :gochonginyaa Yosebiye,
hinisi te hɔli na dɛlɛyɛ.
17 Na komoru sɛɛsɛ Yoseb,
“Yogɛsɛ gochonginyaa gunyu na kɔdhɔnggɛsɛ kammayi sigiriyaa gɛ na kawaga Kananɔ.
18 Na kidhiganda baba nɛ ko zuga gɛ na kohoya ngabaya nande.
Na kàynɛ ba bhee chal lalende Gibsigiye.
Na kabhaga ngabaya bu tuh :Tumu aha mɛrte ke na bo challa.
19 Na yogɛsɛ na kɔtɔgɔ harteyiya Gibsi ghurtɛa gala kòwoyɛa,
na kete gee ale woonɛ :tɛrroa gɛ ko :erroa gɛ ko :babaa nɛ hunde ziggonɛye.
20 Na ahaa gɛ sɛɛ ngahonynyɛ,
ke ngaya ngaahaya bu chal ɛl Gibsigiye kumulɔngge,
ale anɛ ga gɛye.”
21 Na erroa Isirayeli mesigi damiyaa kòyogɛsɛna.
Na Yoseb ibha harteyiya ghurtɛa gala kòwoyɛa damiyaa yogɛsɛna :komoruyɔ ko galaa ammɛa gɔrɔ na aynɛ.
22 Na kɔrgɔrɛ ruminyaa bo ngani katallana bhiy bhiy.
Na Biniyam nɔng aynɛ ruminyaye ku hayna ko tomoga hɔla gaw dhandalab gee ku giraminya 3500.c
23 Na dhuma sigiriyaye ku tɔmmɔn dhaa kɔ̀chɔdhɛsɛn ahaa Gibsi bu challa ko sigiriyaye ngahi ku tɔmmɔn kɔ̀chɔdhɛsɛn liwa ko galaa ale ammɛa ganggugiye hunde ale ziggonɛye na kɔtɔktɛsɛ chɔgɔnɛ.
24 Na ittonu gochonginyaa gɛnyɛ na sɛɛsɛ,
“Ago shɛɛ,
na ganggugiye ngaɛkɛnyanɛno!”
25 Na yɔk banda Gibsigiye na kago Kananɔ na kassa chɔgɔnɛ.
26 Na hunaa dokkɛa Kanande,
yoktɛsɛ chɔgɔnɛ na seyɛsɛ,
“Yoseb ngani i basseyɔ!
Na dha bere te gulsaa bo allinɛnɛa baa Gibsi kumulɔng.”
Na Yaykob dɛɛbu na rɛgɛ :lɔkku na ngani ngayɛbhbho.
27 Na yɔk hunaa kɔbhɛsɛnɛa lɔgaa yogɛsɛna :Yosebi kumulɔng na orro chɔɔ gala ghurtɛa :harteyau kenno kɔtɔɛ :nɛa na kɔgɛ Gibsigiyeye,
hini tɛa bay.
28 Na koo seu,
“Wa kɛyɛbhbha ni!
Dha eriya nanu Yoseb ngani i basseyɔ chi gɛɛ!
Mɛa any kòk na kàr hunde ngani kihi basseyɔye.”