Lɔgɔ Sabba 44

Kombiya Garsa Na Kɔ̀jɔana Kammaya Biniyami

1 Na Yoseb aynɛ gulsaa doraa nɛnɛ lɔgɔ na sɛɛsɛ, “Ibha liwa na dhi kammayiya ngazukta dhik dhik. Na ibha tomoga gɛ hɔla gaw dhandala na ojjɛsɛ kammayiya gɛ tugi. 2 Na ibha kombiya nanu na ojjɛsɛ kammaya gochonga nɛ chinyo tugɔ ko birinyaa liwany kari.” Na gulsa koo mesu damiyaa kòyogɛsɛna.

3 Na hunaa bho anna bhelleyte, Yoseb gɔynggɛ kittono na tɔgɔ sigiriyaa gɛ na ago. 4-5 Na hunaa ngani hɛa na chɔɔ ko rɛna ngani kadaktaoye, Yoseb sɛɛsɛ gulsa, “Ga ok kɔbh ngazuktonu. Na hunde uturbhbhaniye, sɛɛsɛ, ‘Komoruya nanu huna bɔɔ abhanyiseungngɔ kɛr. Na igge wa tɔlɔ ɔng hunde mesigi gɛrrɛng na ogoro kombiya nɛnɛye? Ngakombitonu ngayo na nɛnɛ barara maynɛnɛa na maragɛa lɔgɔ kumulɔng? Yɔk ngalɔkta messo :iggeuye a gɛrsi dhul!’”

6 Na hunaa gulsa kɔa na uturbhbhanaye, yogɛsɛ lɔgɔ damiyaa kòyogɛsɛna. 7 Na yɔk yaktɛsɛ na seyɛsɛ, “Gulsae, nganga seni kɛ ɔng? Ngalɔkta yogiye agge ngani kemessoyo. 8 Worginya ko tomoga hɔla gaw dhandala gen anda doraa komoruny kogorro kɛ ɔng? Chɔɔ birinyaa bere kòjjɛsɛna kammayiya gayo toye, huna kayakkano Kananɔ na kajaginyiyɔ ngayo? 9 Yee! Hunde jɔyau hirre lɔ ngakombitonuye, nɔng any kertɔ. Na agge kumulɔng keteyo gaymanyaa gunyu.”

10 Na nɔng sɛɛsɛ, “A challi, any kete damite senɛoye. Na nɔng hirre kammaya nɛnɛ kɔjɔanɛ kombiye, dhɔynɛ na a gaymaya nanu. Na igge gee lɔgɔ ngani ɛddɛttoye, hɛoyɔ.”

11 Na yɔk dhɔnggɛsɛ kammayi ba ke tiri na ɔgɔ kammayiya gɛ bhiy bhiy. 12 Na gulsaa doraa Yosebi lamiu kombi. Na sabbɔ gɔnyu kammaya naa ku aw. Na koo lamiu kammayi bhoy ko bhee dogɛ na eriya ku bochuy. Na hunaa lamiwa na tewa ushaye, koo jɔa kammaya Biniyami toye. 13 Na yɔk hunaa orrɛaye, dɛɛbɛ na munyu goore na ɛrrɛyɛ ruminyaa gɛ. Na dhɔnggɛsɛ sigiriya aha na waga ɔr toye.

14 Na Yuhudha ko gochonginyaa gɛnyɛ hunaa hɛa doraa Yosebiye, nɔng dhaa ngani i ngonu na koo tɔgɔndɛsɛ kɔmma. 15 Na ghinu :Yosebi na sɛɛsɛ, “Ngalɔkta bare messo kɛ ɔng? Ngakaniyo hira barara kamaragi lɔgɔ? Na igge senno ale ngakɔjɔanno ka?”

16 Na Yuhudha seu, “Ala, gulsaa nayoye, senno kèseo ɛnɛng? Lɔkte kiyakkagungngu ninggɛ. Chɔɔ lɔga anda kenno kòyoktoo na kɛɛnggayɛo ngalɔkta ninggɛ dhul. Nɔng Tumu wa dhugunoa lɔga gɛrsa wa kɛddɛo :aggeu zuga kagachungngu igge. Na mɛa hiraa kammaya nɛnɛ kɔ̀jɔanɛa kombi ko agge any keteyo gaymanyaa gu kumulɔng.”

17 Na nɔng sɛɛsɛ, “Anye nganga ngakemesiyo dhul! Maya gaymaya nanu a hiraa kammaya nɛnɛ kɔ̀jɔanɛa kombi sɔng. Na igge waga na assa baba nu ke na bo challa!”

18 Na Yuhudha ogo bhɛa ihɛa Yosebi jaa na sɛɛsɛ, “Gulsae, agge kanno gaymaya nu. Na ga igombogiy na kòyoktoo lɔkte muchugi. Na hunde koyokkonoye, ngadɛmnyakkiy ke ngaya anɛo hira bo lɔmmo diram huna komoruya Gibsiye. 19 Gulsae, igge annaa bɔɔ sabbɔ ghinneiy na sennagiy, ‘Baba nu ihe oo ninggɛ? Na gochonga nu kona ihe oo ninggɛ?’ 20 Na agge kèsennagungu, ‘Baba nayo ihe na a nyagasi. Na chɔɔ bɔɔ irriyoa gochonga nayo chinyo nyagayɔ. Nɔng ngaeritonu gɔynɛ bere erra. Na doraa nɛ mɛa dhɔynɛ :nɛa sɔng. Na chɔɔ nɔng yel ꞉chɔgɔnɛ goore.’

21 “Na igge annaa ajjiy lɔgɔ na sennagiy, ‘Ago dhiganda ngaeritonu na kàrtoyɔ.’ 22 Na agge annaa kèsennagungu, ‘Eri bhee dhɔɛ chɔgɔnɛ bhichang na kunɛ ninggɛ. Hunde dhɔ chɔgɔnɛ na kunde, chɔgɔnɛ rɛsɔ.’ 23 Na igge annaa ibbashshiy na yokkogiy lɔgɔ na sennagiy, ‘Hunde gochonga nu chinyo ngadhigannanooye, ko agge ngakitinynyannɛo.’ 24 Na agge annaa kawakto bhɛa babaa nayo na koyoktɛsɛo lɔga bere yokkogiy :iggeu kumulɔng.

25 “Na nɔng koo seagiy, ‘Ago waga Gibsigiye na talda liwa sɛgɛn.’ 26 Na agge keseyɛsɛo, ‘Bɔɔ ibbashshiy :gulsaɔ na sennagiy, “Hunde ko gochonga nu chinyo kari ngadhɛanooye, ko anye ngakitinynyannɛo.” Na nɔng hunde seni kayto ngonuye, maya gochonga nayo chinyo kidhiyo kari. Bhichang ngakɛhɛoyo.’

27 “Na nɔng baba nayo bere sennagiy, ‘Nɔng huna bere tɛriya nanu Ngarahel hudhukkono lusa ramman sɔng, igge gao chi. 28 Na kona annaa heo ussa :guchur na garra. Na ko mɛa toye ngani kàrro dhul. 29 Nɔng anye kani nyagasi. Na mɛa hunde dhiganno nganda na kako dokkono lɔkte gɛrsiye, anye ngahirra nyaga kɔlɔmi kurnugaye ale kuru na kɛrɛsiyɔ.’

30-31 “Na mɛa agge hunde kɔdhɔtto Biniyam na kowokko bhichang na baba nanu orriy agge sɔngge, nɔng rɛsɔ ke ngaya yelɛ ngaerita gooreye. Na hunde a ngangaye, ale kɛtɛhɛtto ko zuga kihinɛsɛnno baba nayo nyagasa lɔma kurnuga munyusey na kertɔ. 32 Nɔng anye annaa bɔɔ kibhiigɛsɛni baba nanu lɔgɔ na kesenɛsɛni, ‘Hunde eri ngaya ngani ngakidhigannanoye, ghinony anye na gigey kɔ̀tɔlɔ :anynyo ko bhee kɛrɛsɛ.’

33 “Na mɛa agge, hira kagachungngu, any kɔ̀dhɔtteo ngaya na kɛ̀sɛrɛyo bhɛa eriny na kèteyo gaymaya nu. Na nɔng eri kawaga ko gɔynggɛ ɔrɔ. 34 Agge bhee kɔdhɔyɛo eri ngaya na kowogɛo ɔrɔ na kassanɛo baba nayo bhichang, ninggɛ. Chɔɔ agge hunde baba nayo churnɛ ngalɔktaye, maya ngakorroo.”