Lɔga Zigɛa :Isirayeli Gibsigiye
46
1 Na Isirayel dhuma aha kumulɔng na zɛgu.
Na hunaa dokko Bersabaye,
udulɛsɛ Tumu,
Komoruya babaa nɛnɛ Isaki go.
2 Na barɔ kunau na eliu :Tumu na yogɛsɛ lɔgɔ na sɛɛsɛ,
“Yaykob!
Yaykob!”
Na nɔng elɛɛ,
“Woy,
kani nganda!”
3 Na sɛɛsɛ :Tumu,
“Anye kani Tumu,
Komoruya babaa nunu.
Na bhɛa seni zɛgɛ Gibsigiye bho ngaɛngɛrsi.
Anye ale kɛbhɛli ashaa gunyu na a bhora bo kàggaa Gibsigiye.
4 Na kidhi ko inye kari na ashaa gunyu ale kiyakkan ngabaya sɛgɛn.
Na chɔɔ hunde ale rɛsiye,
ɛllo ko Yoseb kari na ojjiny :nɛa.”
5 Na koo Yaykob bana Bersabagiye na ogo Gibsigiye.
Na erroa gɛnyɛ dhigana baba nɛ ko erroa gɛ ko tɛrroa gɛ gala ghurtɛa :harteyau bɔɔ ajjɛa :komoruya Gibsi.
6 Na Yaykob ko ashaa gɛnyɛ kumulɔng tɔgɔ bea gɛ ko mɛdɛrni ko tenɔ na dhumba ahaa bere lɔmmanɛa Kananɔ na zɛktɛ Gibsigiye.
7 Nɔng dha bere Yaykob hunde zig Gibsigiyeye,
dhɛɛ ko erroa gɛnyɛ maya ko ga ngaha ko ashaa gɛnyɛ kumulɔng.a
8 Mɛa te sara erroa Isirayeli maya (a bhɛa kèsenɛa erroa Yaykobi maya) bere shidhinɛna ko nɔng Gibsigiye:
Eriya Yaykobi ku aw keli Robel.
9 Na erroa Robeli a
Heno,
Bhalu,
Heron ko Karmi.
10 Ga Simoni a
Yimuel,
Yamin,
Ohad,
Yakin,
Zohar ko Shawul.
Nɔng Shawul anna bere kùhudhukkono bhɛa sedhdheya Kanani.
11 Ga Lewi a
Gershon,
Koha ko Mirari.
12 Ga Yuhudha a
Er,
Onan,
Sela,
Bhares ko Zara.
Yɔk Er ko Onan agga bere rɛssɛa Kananɔ.
Na erroa Bharesi a Heron ko Hamul.
13 Ga Isakori a
Tola,
Bhawa,
Yashub ko Shimiro.
14 Ga Zabiloni a
Sere,
Elon ko Yahel.
15 Yɔk erroa Yaykobi maya ko sedhdheya nɛnɛ kèe Ngadina bere hudhukkono :Ngaleya huna ngani bhakkɛa Badharam a ngagiya.
Yɔk dha bere ashaa Yaykobi hudhukkono :Ngaleya kumulɔng a 33.
16 Na erroa Gadi a
Sabhon,
Hagi,
Shuni,
Ebhon,
Heri,
Arodhi ko Arel.
17 Ga Aseri a
Yimina,
Yishiwa,
Yishiwuy ko Bereha.
Na ngɔnɛa nɛ keli Ngaserahi.
Na erroa Bereha dha bere a Heber ko Malakel.
18 Yɔk erroa bere hudhukkono :Ngazeliba,
gaymaya bere ibhbhana :Lawa na ajjɛa Ngaleya a ngagiya.
Yɔk dha bere ashaa Yaykobi hudhukkono :Ngazeliba kumulɔng a 16.
19 Na erroa bere hudhukkono :Ngaraheli a
Yoseb ko Biniyam.
20 Na erroa Yosebi a
Minase ko Ebhiron.
Yɔk ngaerroya agga bere hudhukkono :tɛriya nɛnɛ kèe Ngaasinati bere kɔyɛa kala bhagɛa Gibsi.
Nɔng Ngaasinati chɔgɔnɛ keli Bitibhar.
Na dha bere a gɔldanga ɔra iho Gibsigiye kènno On.
21 Ga Biniyami a
Bela,
Beker,
Ashabel,
Gera,
Naman,
Ehi,
Roshi,
Mubhim,
Hubhim ko Aradhi.
22 Yɔk ashaa bere hudhukkono :Ngaraheli a ngagiya.
Yɔk dha bere ashaa Yaykobi hudhukkono :Ngaraheli kumulɔng a 14.
23 Na eriya Dani a
Hushim.
24 Ga Nibitalemi a
Yazel,
Guni,
Yesir ko Chelem.
25 Yɔk erroa bere hudhukkono :Ngabali,
tɛriya Yaykobi ku gaymaya bere ibhbhana :Lawa na ajjɛa Ngarahel,
a ngagiya.
Yɔk dha bere ashaa Yaykobi hudhukkono :Ngabali kumulɔng a issabbay.
26 Yɔk ashaa Yaykobi bere dhiyɛa ko nɔng kari na hɛa Gibsigiye kumulɔng a 66.
Na yɔk mɛrɛyaa gɛnyɛ dha bere ngani kòtoyito.
27 Na hunde kɔtɔrɛ erroa bere Yosebi ku ramman kìrrittono Gibsigiyeye,
ashaa Yaykobi bere dhiyɛa ko nɔng Gibsigiye kumulɔng dha bere a 70.b
28 Na Yaykob egu Yuhudha sabbɔ na kassa Yoseb na koyogɛsɛ na kɔmɔya na kitinynyandɛy Gesem.
Na hunaa Yaykob ko zuga gɛnyɛ dokkɛa Gesembe,
29 nɔng Yoseb irrɔgu kɛga nɛnɛ woyɛa ghurtɛa :harteyau na ogo Gesemɔ na kitinynyandɛ ko chɔgɔnɛ.
Na hunaa itinynyanɛnaye,
issayɛ hinisiya bo hɔla na turɛsɛ sak sak dirr.c
30 Na Isirayel sɛɛsɛ hoynɛ,
“Mɛa wa karinyɔ.
Dhaa ngani ihi basseyɔ chi!
Na chɔɔ hunde mɛa kère,
kerra hung.”
31 Na Yoseb sɛɛsɛ gɔynggɛ ko zuga dhɛanɛa ko chɔgɔnɛ,
“Anye mɛa ga kòk na kòyogɛsɛ komoruya Gibsi na kèsɛɛsɛ,
‘Gochonginyaa ganyu ko zuga bere bhakkɛa ko baba nanu Kanan wa hoya na kassagany anye.
32 Yɔk a zuga iwoyɛa beo ko tenɔ ko mɛdɛrni.
Na dhaa zɛkta ko ahaa gɛ kumulɔng.’
33 Na hunde komoruya Gibsi ghinnong na sennagung,
‘Anno zukte messo zinggoye ku ɔngge?’
34 igge yaktɛsɛ na seyɛsɛ,
‘Agge bɛrgua bere kanɛo chichi ko mɛa toye,
kanno zuga kiwoo beo ko mɛdɛrni ko tenɔ damiya bere kokonginyaa gayo.’
Yɔk zuga Gibsi a zukte marrɛ zuga iwonɛna na kɛɛyɔ.
Na hunde senɛsɛno komoru ngangaye,
aynde ale ajjung Gesem ngaya na bhakko ke baa nuye.”