Lɔga Yaykobi Senno Kitinynyandiyɛy Ko Esau
32
1 Na ko nɔng Yaykob chɛbbɛ na ogo.
Na hunaa ngani iho gɔrɔye,
koo itinynyandɛ ko zuga ekko :Tumu.
2 Na hunaa orroye seu,
“Yee gɛrɛ goore hɛmmɛɛ!
Ngaya kèe dhaa a tua zigɛsɛna :Tumu ko bholisa gɛnyɛ!”
Na ngoonu tɔgɔdhɛsɛ sarre kèe Manayem.a
3 Nɔng Yaykob gɔynɛa kènno Esau dha bere bhak baye kèe Seher i Edomɔ.
Na koo Yaykob kerɛɛsɛ zugo na koyoktɛsɛ
4 na keseyɛsɛ,
“Ago seyɛsɛ gulsaa nanu Esau,
‘Hira bere kachinyi kèe Yaykob se kèseyaginy ɛnɛnggeo,
‘Anye ko mɛa toye bɔɔ kabhakto ko Lawa kɛr.
5 Na mɛa bɔɔ kɔtɔlɔmma beo ko sigiriya ko tenɔ ko mɛdɛrni ko gaymanyaa maya ko ga ngaha.
Na ngaya kegerissogɛiny ngazuktaye,
a bhɛa keni hinisa nunu ketɛɛ hɔli na chirbhisɛanydɔ.’”
6 Na zuga kèkko hunaa wokkonɛaye,
seyɛsɛ Yaykob,
“Bare kassao goonu.
Na mɛa aynde dhɛanɛ ko gaymanyaa gɛnyɛ gee ku 400 na kɔmɔtainyde.”
7 Na Yaykob dɛɛbu na churɛ.
Na koo ngɛru zuga gɛnyɛ na kedhu beo ko mɛdɛrni ko tenɔ ko galisenya na te gaminya ramman.
8 Na hunaa messa ngangaye,
ɛsɛdhu lɔgɔ na seu,
“Esau hunde kun na kako tɔk tande dhɔnɛye,
tan kona kàjarɛyɔ.”
9 Na koo alliyɛ ko Tumu na seu,
“Tumu,
Komoruya babachina ganyu Awurahami ko Isakiye,
inye annaa bere sennaganyi,
‘Bana zɛg baa bere bhɛnɛna gunyu hudhukkinyanɛi.’
10 Na anye kani hira chinyo tɔlgɔnya kagachinyi inye na chɔɔ bhee chirbhisiyɛanyi na yelɛanyi ninggɛ dhul.
Anye huna bere kerressani kidhoa kèe Yordanos,
annaa kɔgɔmbinynyani bhirɛgiye sɔng.
Na nɔng mɛa ketewa hira bo zugo mɛra.
Na chɔɔ ngaahaya keninya gaminya rammande agga ganyu.
11 Na mɛa anye kogolliny inye na ibayseony bhɛa gochonga nanu Esau.
Anye kɛngɛrsi nɔng ke ngaya keni ngakugo na kidhiyɛany anye ko tɛrroa ganyu ko erroa ganyuye.
12 Inye annaa bere bhiikkaganyi lɔgɔ na sennaganyi,
‘Ale kemessoginy lɔga bo challa na kɛbhɛlliny na ashaa gunyu hɛ ko kasaya iho yirisiyɔ tugɔ na toyi rɛkkiytɔ.’”
13-15 Na koo tungu ngonu.
Na bhorroyɔ bɛra tende ngahi ku 200 ko kɔlachinde ku 20 ko mɛdɛrnite ngahi ku 200 ko gee ku olinya 20 ko galisenyaa ku lamala gee ku 30 ko bea ku jugɛ gee ku 40 ko olinyaye ku 10 ko sigiriyaa ngaha gee ku 20 ko ga maya gee ku 10 na ojju kɔk na kaynɛ gɔynɛ.
16 Na tɛgɛlu na tɛldi bhiy bhiy na ibhɛsɛ zuga tɔkkɛa na madhɛsɛ lɔgɔ na sɛɛsɛ,
“Igge tɔktɛ sabbɔ.
Na hunde tɔginɛnoye,
any kɔgɔndɛ kuri na kɛtɛldi rɛna rɛna.”
17 Na madhɛsɛ hira tɔginɛna sabbɔ lɔgɔ na sɛɛsɛ,
“Hunde itinynyanɛno ko gochonga nanu Esau na ghinneny na sennaginy,
‘Ani hirre kèe nɛng?
Na gulsaa nunu a noy?
Na kɔ ori?
Na ngabea tɔgiye agga gigiye?’
18 sɛɛsɛ,
‘Ngabea agga gaymaya nunu Yaykobi.
Na kèe kɔ̀tɔgɛsɛ gulsaa nɛnɛ Esau.
Nɔng Yaykob aynde kɔbhinya wurtɔye.’”
19 Na koo madhɛsɛ ko zuga tɔkkinyana wurtɔ na sɛɛsɛ,
“Ko igge hunde orro Esauye,
yoktɛsɛ nganga.
20 Na dhugundɛsɛ hologun shɛɛ na seyɛsɛ,
‘Gaymaya nunu Yaykob nɔng aynde kɔbhinya wurtɔye.’”
Nɔng bhee lɔmɛ ngalɔkta ku ngangaye,
dha bere ɛsɛdh lɔgɔ na se,
“Hunde anye sabbɔ ngani ngonu kòkko,
na kittoni ngabea kajjɛye ale bhɛa dɛmnɛa goore hini lalnanayɔ.
Na hunde ale kitinynyanɛnoye,
kako lammanany hinisa bo hɔla.”
21 Na zugo tɔgɔ beo sabbɔ na nɔng tungu tɔ ngonu.
Lɔga Yaykobi Maginɛnɛa Ko Tumu
22 Na ngabartonu Yaykob bana na ibha tɛrroa gɛnyɛ ku ramman ko sedhdhea bere ku gaymanyaa gɛnyɛ ku ramman na kɔyɛa ke tɛrroa gɛnyɛ ko erroa gɛnyɛ ku tɔmmɔn ko dhɔnɛ na erre kidhoa kèe Yabok.
23 Na hunaa erresiwa yɔk na tewa ushaye,
koo erresiu bea tɔkkɛa sɛgɛn kumulɔng.
24 Na nɔng dhɔyɛ kidho tandɔ bhichang na koo barɔ maktɛ ko hir kona barbar ko bhee bho arsɛ.
25 Na ngahirronu hunaa maktɛa ko Yaykob goore na ngani ngaɔanaoye,
Yaykob kidhara tegerey na bhugɛ.
26 Na koo hiri seu,
“Bho dhaa aru,
ɔddaganyɔ.”
Na Yaykob seu,
“Hunde ngatuhonyoye,
ngakoddoninyo.”
27 Na ghinu :hiriyɔ na sɛɛsɛ,
“Sara gunyu keliyeny ɛnɛng?”
Na nɔng yagɛsɛ na sɛɛsɛ,
“Keleony Yaykob.”
28 Na ngahirronu seu,
“Ngakalda wurtɔ Yaykob ngakeliyenyo dhul.
Mɛa keliyeny “Isirayel” ke ngaya maginɛnɛo ko Tumu ko zugo na mɔgɛye.”
29 Na ko nɔng Yaykob ghinu na sɛɛsɛ,
“Na inye sara gunyu keliyeny ɛnɛng?”
Na hiri seu,
“Sara ganyu ghinnony kɛ ɔng?”
Na nɔng koo tuhu Yaykob.
30 Na Yaykob seu,
“Anye dhaa wa karra Tumub na chɔɔ ngani kihi basseyɔ gɛɛ!”
Na ngaya orɛ ngalɔktaye ngabaonu eliu sarre kèe,
“Bhɛnɛl.”c