Lɔga Itinynyanɛnɛa :Yaykob Ko :Esau
33
1 Na Yaykob dharɛsɛ Esau hunde kɔrgɔrranɛ ko zuga gɛnyɛ ku 400.
Na ngɛru erro na gen aynɛ Ngaleya,
gen aynɛ Ngarahel,
gen aynɛ gaymanyaa gɛnyɛ ku ramman.
2 Na ibha gaymanyaa gɛnyɛ ku ramman ko erroa gɛ na kɛjɛmɛ sabbɔ.
Na ibha Ngaleya ko erroa gɛnyɛ na kɔbhtɛ.
Na Ngarahel ko Yoseb bhɛa zugaa jimmɛa kumulɔng yɔk tɛlda wurtɔ.
3 Na nɔng Yaykob jɛmu sabbɔ.
Na hunaa senno kadak bhɛa ihɛa gɔynɛ Esauye,
tɔgɔdhɛsɛ kɔmma gɔrɔ gɔrɔ kɛngi issabbay.a
4 Na Esau nɔng ngea gɔra nɛnɛ na kitinynyandɛyɔ.
Na issayɛb na dɛldɛ goore na turgi kari.
5 Na koo Esau dhɔnga sabba na aru tɛrro ko erro hunde kɔbhbhanɛ Yaykobte na ghinu na sɛɛsɛ,
“Ngagiya dhɛano kariye a zukte gigi?”
Na Yaykob sɛɛsɛ,
“Gulsaa nanuye,
ngagiya a erroa ganyu bere chirbhisianyi :Tumu na ajjanyi.”
6 Na koo tɛrroa gɛnyɛ ku gaymanya ko erroa gɛ hoya na tɔgɔndhɛsɛ Esau kɔmma.
7 Na ko nɔng Ngaleya ko erroa gɛnyɛ hoya na tɔgɔndɛsɛ kɔmma.
Na wurtɔ Ngarahel ko Yoseb ko yɔk hoya na tɔgɔndɛsɛ kɔmma sɛgɛn.
8 Na Esau ghinu na seu,
“Na ngabea bu mɛr hɛ sabbɔye aggee kunɛnɛng?”
Na Yaykob sɛɛsɛ,
“Gulsae!
Agga kɔtɔkkaginyi inye na hinisa nunu kete hɔli.”
9 Na nɔng Esau sɛɛsɛ,
“Gochongnge!
Anye bea ganyu a mɛri.
Na ngagiya gunyde tɔlɔ :ɛna hung.”
10 Na Yaykob tamaru na sɛɛsɛ,
“Nganga ngayo!
Hunde hinisa nunu aniny hɔliye,
maya tɔgi ngabea kajjiny :anynyoye.
Ngaya kìtinynyanɛnɛye,
chɔɔ hɛ ko bhɛa kitinynyanɛnɛo ko Tumu,
ke ngaya yellɛany na hinisa nunu anɛiny hɔliye.
11 Kɔtɔllɔhaginy na tɔk ngabea kajjinyde ke ngaya bere Tumu chirbhisiyɛany goore na ajjɛany ahaa kihini kumulɔngge.”
Na Esau koo tɔgu ke ngaya tɔllɔhɛsɛnɛ gooreye.
12 Na nɔng sɛɛsɛ,
“Bana,
kìdhiganinyɔ.”
13 Na Yaykob nɔng sɛɛsɛ,
“Gulsae,
inye gayɔ hunde erro a tɔlgɔnyiye.
Chɔɔ ngabea ko ngamɛdɛrnita ku lamalaye ko yɔk maya kɛbhɛgiyɔ.
Hunde ngakalda kizigɛ kali bhɛa bo tiiye,
rɛsɛyɔ.
14 Na mɛa gulsae,
anye kani hira kagachinyi inye na ga jɛm sabbɔ.
Na anye kiyo erroa ganyu halɛ halɛ ko ngaahaya na ale koo kuturbhaniny Seherɔ.”
15 Na Esau sɛɛsɛ,
“Yee!
Hunde a ngangaye,
ngabarra ganyde gen kɔ̀dhɔyaginy inye na dhiya kari.”
Na Yaykob nɔng tamaru na sɛɛsɛ,
“Ay,
ahite kihini bhɛa nunu kona ninggɛ.
Na mɛa gulsaa nanuye,
kihini ngaya chirbhisiyɛany na hini anɛiny hɔliye sɔng.
Na bara gunyu ngadhɔtaganyi.”
16 Na koo Esau kalaa gina bana na wagu Seherɔ.
17 Na Yaykob nɔng ogu Sukotɔ na lugu tunyaa beony ko tenyiya mɛdɛrniuny na dhagu gahachina.
Na ngabaonu tɔgɔdhɛsɛ sarre kèe ‘Sukot.’c
18-20 Na koo dagu ɔra iho Kananɔ kèe Sekem shɛɛ hung.
Na zɛgɛsɛ mogiya iho ɔr dheyyɔ na bhagu ngonu.
Na ngabaonu tɔgɔdhu dukuwachinde tallana tomoga hɔla gaw dhandalad ku 100 bhɛa tɛgɛna hira kèe Emor.
Nɔng tɛgɛna Emori kona dha bere keli Sekem.
Na nɔng Yaykob echiu ngawu ngonu na tɔgɔdhɛsɛ sarre kèe “Tumu a Komoruya Isirayeli!”
Na lɔga bere wokkonɛa :Yaykobi Badharamɔ a ngagiya.