Lɔgɔ Sabba 29

Lɔga Kɔyɛa :Yaykobi Doraa Oynɛ Lawa

1 Na Yaykob bana na ogo na dagu baa zuga bhakkɛa yal. 2 Na hunaa kɔaye, jɔa bolkua lɔma ma kona mogiyɔ bhokonnɔ. Na dha bere ngonu lɔ mɛdɛrniya bo mɛra keninyana tayɛn sizzi ungussɛa bay ke ngaya ma mattɛ bolkugiye ngonuye. Nɔng bolku tugɔ dha bere nyuginɛ bɛa bo goore. 3 Na hunde mɛdɛrni mukkinya kumulɔngge, zuga iwonɛna dhɔngnganɛ bɛ na ɛgɛllɛ mɛdɛrni. Na hunde irtɛ kumulɔngge, ibhbhanɛ bɛ na nyugɛ bolku tugɔ.

4 Na Yaykob ghinu zuga iwonɛna na sɛɛsɛ, “Gochonginyaa ganyuye, honynyo ori?”

Na seyɛsɛ, “Kohonynyo Karanɔ.”

5 Na nɔng ghinu na sɛɛsɛ, “Na ashaya Nakori kèe Lawa, gaoyɔ oo imaggoyɔ?”

Na yɔk yaktɛsɛ na seyɛsɛ, “Ee, kaggaoyɔ.”

6 Na ghinu na sɛɛsɛ, “Na a challi hung?”

Na yɔk se, “Mmm, a challi hung. Chɔɔ sedhdheya nɛnɛ kèe Ngarahel a surr ngandonu tɔkkana mɛdɛrniye.”

7 Na sɛɛsɛ :Yaykobi, “Bho ngani a kali na nganda kolea kɔ̀tɔkkanɛa mɛdɛrni ngayo. Banda, ayɛ ma na yaga ghɛanayɔ.”

8 Na zuga iwonɛna yɔk seyɛsɛ, “Nganga ngayo. Ko bhee mɛdɛrni kumulɔng mukkinyanɛ na kɔdhɔngnganɛ ngabɛya nyuk bolku tugɔye, bhee kajjɛo ngagiya ma ninggɛ. Nɔng hunde muktiyaa kumulɔng na te ushaye, aynde ale kɔdhɔngnganɛo ngabɛya na kajjɛo maye.”

9 Na Yaykob hunaa ngani mɛzinɛna ko yɔkte, Ngarahel tɔga mɛdɛrniya chɔgɔnɛ. Nɔng dha bere a sedhdheya iwoo mɛdɛrni. 10 Na Yaykob hunaa orro eriya oynɛ ku sedhdhey hunde tɔkkana mɛdɛrniya chɔgɔnɛye, ogo bolkugiye na dhɔnga bɛa kùnyugɛa tugɔ na aynɛ mɛdɛrniya oynɛ ma. 11 Na issau Ngarahel na turu goore. 12 Na sɛɛsɛ Ngarahel, “Anye kani liya chogonua ngaha kèe Ngaribika.” Na Ngarahel nɔng hunaa shikko ngangaye, ngeu ɔrɔ na yogɛsɛ chɔgɔnɛ.

13 Na hunaa Lawa shikko bhɛa kunɛa :ngosoniya nɛnɛ Yaykobiye, ayugu na kidhiganayɔ. Na koo issau na tuhu na dhiganu dorigiye. Na nɔng kɔbhɛsɛ oynɛ lɔkte kunɛye kumulɔng. 14 Na koo Lawa sɛɛsɛ, “A dhere chi! Inye ani bhɛnɛniya nanu tull.” Na Yaykob tɛldi ko oynɛ tagi dhɔnɛ ngonu dhɔng.

Lɔga Duriyɛa :Yaykobi Ngaleya ko Ngarahel

15 Na hunaa tɛlda ko Lawa tagi dhɔnɛ ngonuye, koo sɛɛsɛ :Lawa, “Inye ani bhɛnɛniya nanu. Na ko hunde kete nganga, maya hɔlɔng ngamesinɛnno. Na maya kagadhieny ɔng?”

16 Nɔng dha bere Lawa lɔ sedhdhee ku ramman. Na na ku aw keli Ngaleya. Na na kɔbhbhana keli Ngarahel. 17 Na Ngaleya dha bere kawarɛ a aminɛ. Na Ngarahel nɔng a sedhdheya bo challa lɔma ɛs. 18 Na tɛhɛnu :Yaykobi na koo sɛɛsɛ Lawa, “Hunde ajjany sedhdheya nunu chinyo kèe Ngarahelde, ale kemesinɛn bhɛa nunu oynya issabbay.”

19 Na sɛɛsɛ :Lawa, “Ko bhee kajjɛ hir kona, hunde kàiny inye a challi. Na mɛa tɛ ngaya na kàbhaga kari.” 20 Na Yaykob tagayu nɔng oynya issabbay na kagam Ngarahel. Na ngaoynyaya ku issabbayte ojju ke muchugi ke ngaya hinɛ Ngarahel gooreye.

21 Na hunaa oynyaa kayɛa oynɛ gartaye, sɛɛsɛ oynɛ, “Bɛrgunyaa bɔɔ seni kemesɛi wa garta. Na mɛa any sedhdheya nunu kihini na kùduriyɔ.”

22 Na Lawa aynɛ zuga ngabaonu kumulɔng bharra na kohoya wololo. 23 Na hunaa bho barsaye, Lawa nɔng ibha sedhdheya nɛnɛ bo kèe Ngaleya na dhiganɛsɛ Yaykob na tunggi kari. 24 Na koo ibha gaymaya nɛnɛ ku sedhdhey kèe Ngazeliba na aynɛ Ngaleya na katagaytɔ.

25 Na hunaa bho arsaye, Yaykob tagu hunde sedhdhey dhaa a Ngaleyaye. Na ogu na sɛɛsɛ Lawa, “Nganga messony kɛ ɔng? Huna kemesinɛni bere ngakeni anynyo Ngarahel? Na tabhbhany kɛ ɔng?” 26 Na nɔng Lawa yagɛsɛ Yaykob na sɛɛsɛ, “Agge damiya ɔra nayo hunde sedhdhey ngɔnɛa bo ngani kagamattoye, na chinyo ngakɛhɛɛyo. 27 Na ga bhɛk wololoa Ngaleya ungge ku issabbay ko bhee garsɛ na kɔ̀tɔrɛiny ngɔnɛa chinyo. Na ale tagayany oynya issabbay sɛgɛn.”

28 Na yɔk shiktɛ na Ngaleya teu mɛrtay ungo issabbay. Na hunaa kùduriya na tewa ushaye, Lawa aynɛ Yaykob Ngarahel na gamu sɛgɛn. 29 Na Lawa ibha gaymaya nɛnɛ ku sedhdhey kèe Ngabal na aynɛ Ngarahel na katagaytɔ. 30 Na Yaykob assa Ngarahel. Na bhɛa hinɛa Ngaleya, nɔng tɛhɛnu Ngarahel goore. Na nɔng kɔ̀tɔrtɛ oynya issabbay na mesu zinggo bhɛa Lawa sɛgɛn.

Erroa Yaykobi

31 Na hunaa Tumu arra Yaykob hunde Ngaleya ngahinnoye, aynɛ Ngaleya bhɛa lɔmmanɛa eri. Na Ngarahel nɔng tɔu hɔlɔng. 32 Na Ngaleya tɔlɔma eri. Na hudhugo erite may na seu, “Tumu dhaa aru chɔllaa nanu gɛɛ! Na mɛa ale hira nanu tɛhɛnanyɔ.” Na tɔgɔdhɛsɛ sarre kèe “Robel.” 33 Na tɔlɔma eri sɛgɛn na hudhugo ke may na seu, “Tumu aru ngaya kàmarɛanyde na aany ngaerita mayte sɛgɛn.” Na tɔgɔdhɛsɛ sarre kèe Simon. 34 Na tɔlɔma eri sɛgɛn na hudhugo ke may na seu, “Wa kuhudhugou erroye may ku sizzi na ale mɛa hira nanu tɛhɛnany dhogoni!” Na tɔgɔdhɛsɛ sarre kèe “Lewi.” 35 Na tɔlɔma eri sɛgɛn. Na hunaa hudhugoa ke may sɛgɛnde, seu, “Mɛa anye keterrisani Tumu.” Na tɔgɔdhɛsɛ sarre kèe Yuhudha. Na wurtɔ sɛgɛn ngani ngahudhuginɛo.