28
1 Na Isak eliu Yaykob na tuhu na sɛɛsɛ,
“Sedhdheya ngabhorra Kananiye ngagami.
2 Bana ok Badharamɔ na assa kogonu Batula ngonu na gam sedhdhea oonu kona.
3 Na any kutuheny :Tumu,
Komoruya Ɔana Lɔgɔ Kumulɔng na kɛbhɛliny na kainy ashaye mɛri na te hira bo gettoa mɛra.
4 Na Tumu any kutuheny inye ko ashaa gunyu damiya bere tuhɛa Awuraham.
Na ngabaya bere ajjɛ :Tumu Awuraham na mɛa bhagi :inynyo hira ku kɔmɔniye,
any kainy :Tumu ke baa nunu sɛrɛi.”
5 Na koo ittonu Yaykob.
Na nɔng ogo Badharamɔ na tɛldi ko oynɛ Lawa ngonu.
Nɔng Lawa a gochonga Ngaribika na nɔng a mama Esau ko Yaykobi.
Na babaa Lawa ko Ngaribika keli Batul na dha bere a hira bhora Soriya.
6 Na nɔng Esau tagu hunde dha bɔɔ Isak tuhu Yaykob na ittonu Badharamɔ na kagam sedhdheya ngabaonuye.
Na koo shigu lɔga dha bɔɔ kòyogɛsɛna Yaykob kala kùtuhɛa hunde dha kèsenɛsɛn,
“Sedhdheya Kanani ngagamiye!”
7 ko lɔga dha bɔɔ igomɛsɛna chɔgɔnɛ ko jɔnɛ na kɔyɛa Badharamɔ.
8 Na hunaa tagga bhɛa sedhdhea Kanani anna ga marra :chɔgɔnɛye,
9 koo ogu na lameo sedhdhey kona bhɛa liya Awurahami kèe Ismayel na kagam na kɔtɔrɛ tɛrroa gɛnyɛ.
Na gamu sedhdheya Ismayeli kènno Ngamahil.
Nɔng dha bere Ngamahil gɔynɛ a hirre kèe Nɛbiyo.
Lɔga Kunasɛa :Yaykobi Betelɔ
10 Na Yaykob bana na dhɔyu Bersaba na ogu Karanɔ.
11 Na hunaa kɔa na dokko bhokonaye,
ayawsu ke ngaya bho barsɛye.
Na dhuma bɛ kona ngonu na igingu na tungu.
12 Na koo kunau na aru gala bo ɔrkinɛna na ɔllɔraninyana tumɔ na dokkɛa ba bay.
Na aru zuga ekko :Tumu hunde gena irrɔkkɛ na hɛ tumɔ na gena bhonsanɛ baye.
13 Nɔng Tumu dha bere chil bhɛa nɛnɛ jaa na senɛsɛn,
“Anye kani Tumu,
Komoruya babaa nunu Awurahami ko na Isaki.
Na ngabaya ungusɛye ale kajjiny inye ko ashaye guny ale chillanɛye.
14 Yɔk ashaa gunyu ale bhɛlnɛ na heo kasaya bany na hɛtinɛnɛ ko ba kumulɔng.
b Na bhorinya kumulɔng tuhinɛnɛinyɛ inye ko ashaa gunyu.
15 Anye kɛl kari ko inye gɔrre kɔɛye kumulɔng na kɛbhɛkkiny na ale kayakkaniny ngabaya.
Na ko bhee kurrugɛsɛn ngalɔkta wa kibhiikkaginyde kumulɔng,
anye ngakɔdhɔttinyo.”
16 Na Yaykob hunaa dharachinyana ungeye,
ɛsɛdhu na seu,
“Dhaa Tumu ngaya ihe chi na anye ngani kàtaggo.”
17 Na tɛngɛru bho na seu,
“Dhaa ngaya a bhɛa bo kɛngɛrsa bhakka :Tumu ku ganggua kɛ̀hɛyɛa tumɔ dhere.”
18 Na bana bhelleyɔ shaw na ibha bɛaa igingo na imu na kete bhɛa ale kadhdhanɛa ngalɔkta.
Na ɛrɛsɛ mala bhɔrayny.
19 Nɔng dha bere kingi ngaɔrronu keli Loza.
Na nɔng koo tɔgɔdhɛsɛ sarre kèe “Betel.”c
20 Na Yaykob bhiigɛsɛ Tumu lɔgɔ na sɛɛsɛ,
“Hunde kɛtɛldi kari ko anye na bhɛganyɔ gɔrre kɔgɔɛye,
na aanyɔ tila ko ruminyaa kamalugi
21 na yaganyɔ doraa babaa nanu shɛɛye,
inye ale ani Komoruya nanu.
22 Na ngabɛya wa kimi ngaya na ale kàgadhayɛinyde,
ale a bɛa kɔ̀gɔdhɛa doraa nunu.
Na ahaye ajjanyde kumulɔng ale kɛngɛrran gaminya tɔmmɔn na gambe dhɔnɛ kajjiny inye.”