Lɔgɔ Sabba 27

Lɔga Isak Tuhɛa Yaykob

1 Na Isak hunaa nyaggawa dhogoni na bho ngani ngaorroye, koo eliu liya nɛnɛ ku aw kèe Esau na sɛɛsɛ, “Eriya nanuye!”

Na nɔng seu, “Woy! Kani nganda.”

2 Na Isak sɛɛsɛ, “Anye ngamɛa kani nyagasi na kolea ale kɛrɛsɛi kimagiyɔ. 3 Na mɛa ga bana ibha gala gunyu kɔdhɛi kɛginya, torong ko bɛr, na ok dusɔ na tɔgɔdhagany kɛgɛ. 4 Na agagany ke choy damiya keyelɛi na ayagany na kùssɔ. Na kùtuheny hunde ngani kihi basseyɔye na ale sɛrɛ ahaa ganyu kumulɔng.”

5 Na dha bere Isak hunde yogɛsɛn Esau lɔgɔye, nɔng Ngaribika i jaa na shiktɔ. Na Esau hunaa bansana na kɔa dusɔ na kɔgɔn kɛgɛye, 6 Ngaribika sɛɛsɛ eriya nɛnɛ Yaykob, “Ɛnɛnggeo, anye wa kishikka chogonu hunde senɛsɛn goonu, 7 ‘Ok dusɔ na tɔgɔn kɛgɛ na agagany ke choy na kùssɔ. Na kùtuheny bhɛa Tumu hunde ngani kihi basseyɔye.’ 8 Na mɛa eriya nanuye, ga chirarany shɛɛ na me lɔkte keni kòyogoginyde. 9 Bana ok na tɔga kɔlachinaye ngani dhakkanɛ ngochinde gee ku ramman na in na kàgɛsɛ chogonu ke choy damiya hinɛa. 10 Na ɔgɛ na ayɛsɛ na kus na kutuheny hunde ngani i basseyɔye.”

11 Na sɛɛsɛ :Yaykobi, “Nɔng gochonga nanu rɛ lɔ chɔrɛ, na anye rɛa nanu a ghilghili, chɔrɛ ninggɛ. 12 Na kesea hunde kumony :babaa nanu na ga ngaya katabhɛye, kako chɔrany na ngatuhonyo.”

13 Na sɛɛsɛ :jɔnɛ, “Eriya nanuye, lɔkte ale kɔ̀chɔrrɛinyde any kɔ̀chɔrtɛany anye. Na mɛa ga, shik ngagiya ganyde na ok na tɔga kɔlachina.”

14 Na Yaykob ogo na tɔga na inu na aynɛ jɔnɛ na nɔng agu royoa bu choyo damiya yelɛa :chɔgɔnɛ. 15 Na koo ibha ruma bo challa malukko :Esau bhɛa ihɛa dorigiye na aynɛ Yaykob na malugu. 16 Na dhuma sayaa kìniggana na ulubɛ Yaykob sɛnɔ ko ngo. 17 Na koo dhuma royoa bu choyo wa okko ko tila na aynɛ Yaykob.

18 Na nɔng ɔgɛ chɔɔ bhɛa ihɛa chɔgɔnɛ na eliu na sɛɛsɛ, “Baba!”

Na chɔgɔnɛ elɛɛ na seu, “Woy! Eriya nanu, kani nganda. Ani nɛng?”

19 Na Yaykob yagɛsɛ na sɛɛsɛ, “Kani Esau, eriya nunu ku aw. Na wa kemessa damiyaa sennagɛanyi. Na mɛa ga bana tunɔ na us kɛgaa kɔgɔdhi na tuhony damiyaa senɛi.”

20 Na nɔng Isak sɛɛsɛ, “Na shaw hung wa jɔyau minang?”

Na sɛɛsɛ :Yaykobi, “Wa ɛyaanyɔ :Komoruya nunu Tumu na kɔjɔyau shaw hung.”

21 Na Isak sɛɛsɛ, “Ngangaye, ani Esau chi dha? Ga wo gɔrra nande jaa na kùgumenydɔ.”

22 Na nɔng ogo gɔra chɔgɔnɛ jaa na kumu :chɔgɔnɛ na seu, “Inye mɛzii huna Yaykobi na yɔk sɛna gunyu heo ga Esau.” 23-24 Na Isak timagu Yaykob ke ngaya lɔmɛ chɔrɛ sɛnɛ huna Esauye. Na hunaa ngani senno kutuse, dhaktɛ ko hini na ghinu sɛgɛn na sɛɛsɛ, “Ngangaye, ani eriya nanu Esau dhere chi dha?”

Na nɔng seu, “Ee! Kani anye chi.”

25 Na sɛɛsɛ :Isaki, “Ga ayagany ayugaa kunɛi na kùs na kùtuhenydɔ.”

Na Yaykob ibha na aynɛ na ussu. Na koo aynɛ chutaya woynuny na irɛ. 26 Na Isak hunaa usɛa na tewa ushaye, eliu na sɛɛsɛ, “Ga wo jaa gɔrra na kùtuhenydɔ.”

27 Na nɔng ogu jaa na kutu :chɔgɔnɛ. Na Isak hunaa sabhbha rum na tewa ushaye, tuhu na sɛɛsɛ,

“Yee, ɔngaya eriya nanu

ɔngɔna hurhur huna gua tuho :Tumu.

28 Tumu any kutu gua nunu na kɔtɔlɔ osu tii

na kete na bo ba mɔrɔdhɔga

na woyn ko liwaa ɛlla guyɔ toye

keggeo kawarte mɛri.

29 Na bhorinya gen any katagaytiny inye na alliyɛy :inynyo.

Na te komoruya allinɛnɛi gochonginyaa gunyu

na te hira kɔdhaginyɛa :erroa junu kɔmma.

Na zukte chɔrrinynyɛye ko yɔk any kete chɔrnɛ,

na gee tuhenynyɛye ko yɔk any kete tuhinɛ.”

30 Na Yaykob hunaa kùtuho na dhɔtta chɔgɔnɛ na ngani kɔaye, nɔng Esau waga dusɔ. 31 Na ko nɔng agu royoa bu choyo, na kuyɛy na ayɛsɛ chɔgɔnɛ na sɛɛsɛ, “Babaye! Bana tunɔ na us ayuga kugunɛi dusɔ na tuhonyɔ.”

32 Na ghinu :Isaki na sɛɛsɛ, “Ay, na inye ani nɛng?”

Na nɔng yagɛsɛ na sɛɛsɛ, “Anye kani Esau so, eriya nunu ku aw.”

33 Na Isak dɛɛbu goore na bhariyu tik tik na seu, “Na inde wa kɔn kɛginya na ajjagany ayukte dhaa a nɛng? Yee! Anye wa kussa amissɛa ajjaganyi :nɛa na kutuha ni. Na mɛa nɔng ale bhagu ba ke na bo tuhinɛna dhul!”

34 Na Esau hunaa shikko ngalɔkta kòyogɛsɛnde, aru wuy na turu goore na sɛɛsɛ chɔgɔnɛ, “Baba nanuye! Tuhony ko anye sɛgɛn ni so!”

35 Na chɔgɔnɛ seu, “Anye wa tabhanyɔ :goonu na tuhaa nunu kutuhɛu nɔng.”

36 Na Esau seu, “Nɔng sara gɛnyɛ ngakeliyo Yaykob dha? Nɔng mɛa tabhany jagarɛ kɛngi ramman. Bɔɔ sabbɔ annaa tabhbhananyi bhɛa senno kɛsɛrɛɛ buyna nanu. Na mɛa tabhagany tuhaa nanu sɛgɛn! Babaye! Lɔkte tuhɛany anye gena ninggɛ dhul?”

37 Na Isak yagɛsɛ na sɛɛsɛ, “Anye wa kutuha nɔng na ale kete gulsaa nunu na kalliyɛiny inye ko bhɛnɛna gɛnyɛ kumulɔng. Na chɔɔ wa kutuha na woyn ko liwaa ɛlla gua nɛnɛ keggeo kawarte mɛri. Na mɛa eriya nanuye, inye kalda kemesiny ɛnɛng?”

38 Na Esau sɛɛsɛ chɔgɔnɛ, “Babaye! Yee, inye lɔga tuhɛi zugo tuhi kalde dhɔnɛ sɔng? Ga, tuhony ko anye sɛgɛn se.” Na aru wuy na turu.

39 Na sɛɛsɛ :Isaki,

“Inye baye bu mɔrɔdhɔk lɔ osua ajjiy :Tumuye

ale dhɔyi na bhagi rɛna.

40 Na ba bhagi yirɔ

na ani hira kayi gochonga nunu.

Na nɔng hunde hinisa nunu te chinyi na hangɛuye,

ale hɔngi bhɛa chɔllaa chɔllayɛinyi :goonu.”

Lɔga Ullugunynɛnɛa :Yaykobi Ɔra Oynɛ

41 Na Esau tɔlɔmɛsɛ Yaykob lɔgɔ hinisɔ ke ngaya wa kùtuhɛ sabbɔye. Na ɛsɛdhu lɔgɔ na seu, “Nɔng baba kolea senno kerɛ, mɛa te ja. Na ale hunde rɛsse, Yaykob kɔgɔdhiyɔ.”

42 Na nɔng Ngaribika hunaa shikko lɔga ɛsɛdhdha :Esauye, koo eliu Yaykob na sɛɛsɛ, “Ga chiraranydɔ, goonu Esau wa ɛsɛdhdha lɔgɔ na kɔgɔdhiny inye na hinisa nɛnɛ kɛtɛa bay. 43 Na mɛa eriya nanuye, lɔkte koyokkoginyde ga shiktɔ. Bana ok na ullugunyɛ baa kèe Karan bhakka :gochonga nanu Lawa. 44 Na ko bhee hinisa goonu ihonɛ bay, ga tɛ ngonu. 45 Na hunde hinisa goonu tɛa bay na dhinyɛsɛ ngalɔkta na ngani ngakadhdhanoye, ale kegerisoginy hir kona na eleiny na kuniyɔ. Hunde ɛllo kari ngaya na kali kona kɔnɛnno na rɛssoye, ale kani bhoyogi na kumunyusi goore.” 46 Na koo Ngaribika sɛɛsɛ Isak, “Anye wa kɛgɛwa bhɛa keni kabhagɛ ba ngaya ke ngaya Esau bɔɔ gamɛ sedhdhea bhora Hitaniye. Na mɛa ko nɔng Yaykob hunde kagam sedhdheya ngabaya ngadamita Esauye, anye maya kɛrɛsiyɔ.”