Lɔga Isaki Ko Ga Abemeliki
26
1 Na hozzoa iho bɛrgua bere Awurahami ko sɛgɛn,
na ba kumulɔng te hozzo.
Na koo Isak ogo Girarɔ bhɛa komoruya bhora Bhilistemi kènno Abemelik ke ngaya ba anɛ hozzoye.
2 Na hunaa iho ngonuye,
dhulɛsɛ :Tumu dɛk na sɛɛsɛ,
“Gibsigiye ngakɔ!
Ale baye keni bhakte,
koyokkoginydɔ.
3 Nɔng mɛa keni ga tɛa ngabaya bhee chinyi.
Anye kɛl kari ko inye na kutuhenydɔ.
Na ngabaya kumulɔng ale kajjiny inye ko ashaa gunyu na kubhugnyɛsɛn lɔga bere kibhiiginɛnɛo ko chogonu Awuraham.
4 Na ashaa gunyu ale kɛbhɛli na heo ko munyunyaa tumony na sɛrɛɛ ngabaya.
Na bhorinyaa bany kumulɔng ale tuhinɛnɛ hoyaa gunyu
5 ke ngaya Awuraham ngairannɛanyo na shikkɛanyde.
Yɔk lɔga bere kajjɛi ko kera bere kamadhɛsɛni nɔng na kɛbhbhɛk,
annaa bere bhɛkka shɛɛ.”
6 Na nɔng Isak shigu Tumu na bhagu Girar ngoonu.
7 Na zuga ngaɔrronu ghini nɔng na seyɛsɛ,
“Ngangaye,
Ngaribika bhɛa nunu a ɔng?”
Nɔng Ngaribika dha bere a sedhdheya bo challa lɔma ɛs.
Na nɔng Isak tɛngɛru zugo ke ngaya se ngakɔgɔndɛye na sɛɛsɛ,
“A ngɔna!”
Na hunde dha a tɛriya nɛnɛye,
ngani koyogɛsɛo.
8 Na hunaa bhakka ngonu ungge mɛriye,
kali kona komoruya bhora Bhilistemi Abemelik gɔnyu ba bhurbhurɔ na aru Isak hunde hirhir bhuguya Ngaribikaye.
9 Na egu hiri na kelɛɛsɛ Isak.
Na hunaa kunnoye,
ghinu :komoruyɔ na sɛɛsɛ,
“Ngaribika dha a tɛriya nunu so!
Inye huna bɔɔ seni a ngonu,
bɔɔ seni kɛ ɔng?”
Na nɔng yagɛsɛ na sɛɛsɛ,
“Bhee bɔɔ kesenɛ a ngɔnaye,
a ngaya anɛ sedhdheya bo challa lɔma ɛs na kɛngɛrsɛ zugo na keni ngakɔgɔndɛanyde.”
10 Na sɛɛsɛ :komoruyɔ,
“Nganga mesi kɛ ɔng?
Hunde tɛriya nunu kɛzɛgɛsɛ :hir konnɔ,
anda seni ayiy lɔgɔ na kèteyo zuga gɛrsa?”
11 Na ibbayu zugo na sɛɛsɛ,
“Mɛa hirre ibhbhana ngahirra oo tɛriya nɛnɛ na me hun konde,
katii rɛsɛyɔ.”
12 Na Isak kɔha gu ngabaonu na ngabɛrguonu tuhu :Tumu na liwaa gɛnyɛ eggi dhogoni na suniu na dhiu doriyo dhik dhik.
13 Na ogu na te hira bo aha mɛra dhogoni.
14 Na gaymanyaa gɛnyɛ te mɛri.
Na mɛdɛrni ko bea gɛnyɛ ko yɔk bhɛldɛ goore na chirkana :zuga Bhilistemi.
15 Na bolkɛna many bere bhɔkkanɛa :gaymanyaa chɔgɔnɛ bɛrgua bere ihɛa basseyɔ,
gingi :zuga Bhilistemi kumulɔng.
16 Na Abemelik sɛɛsɛ Isak,
“Inye bhɛa nayo dha bɔɔ teu hira bo ɔnnɛna.
Na mɛa ɔdda ɔra nayo na zɛga.”
17 Na nɔng zɛgu dara iho Girarɔ na bhagu ngonu.
18 Na bolkɛna many bere bhɔkkanɛa :gaymanyaa Awurahami bɛrgua bere ihɛa basseyɔ na koo hunaa rɛsaye gingngɛa :zuga Bhilistemi,
koo bhɔgu :Isaki sɛgɛn na eliu sara bere kɔdhɛsɛna :chɔgɔnɛ.
19 Na yɔk gaymanyaa Isaki huna bere bhɔkkɛa bolkɛna many darɔ ngonu,
kali kona koo jɔya maa bo hɔla challa bhɛa ku kawari.
20 Na yɔk zuga Girari iwonɛna se,
“Ngagiya a maa gayo.”
Na ɛkɛnyandɛ ko gaymanyaa Isaki.
Na nɔng Isak ngabolkuonu tɔgɔdhɛsɛ sarre kèe,
“Hesek”a ke ngaya bansanɛ ɛkɛnyanɔye.
21 Na koo gaymanya Isaki bhɔkta bolkua many kona na ɛkɛnyandɛy ngadamitonu sɛgɛn.
Na tɔgɔdhɛsɛ :Isaki sarre kèe “Sitina.”b
22 Na koo ago tan konnɔ na bhɔkta bolkua many kona sɛgɛn.
Na kalda lɔkte ɛkɛnyanɛnɛ ko zuga Girari garayɛ.
Na tɔgɔdhɛsɛ :Isaki sarre kèe “Robot”c na seu,
“Mɛa Komoru Tumu wa ayiyɔ ba bhɛa bo gore na ale kɛbhɛlnɛ na kan mɛri.”
23 Na Isak koo bana na ogo Bersabagiye.
24 Na jhaynɔ dhulɛsɛ :Tumu dɛk na sɛɛsɛ,
“Anye kani Tumua bere chogonu Awurahami na bho ngaɛngɛrsi,
ke ngaya kɛlɛ kari ko inyeye.
Ale kutuheny damiya bere kibhiiginɛnɛo ko nɔng hira bere kachanyi na ashaa gunyu kɛbhɛli na a mɛri.”
25 Na Isak echiu ngawu ngonu na tɔgɔdhɛsɛ Tumu kɔmma.
Na tɔgɔdhu dukuwaa nɛnɛ na bhagu ngonu.
Na gaymanyaa gɛnyɛ bhɔkta bolkua many kona sɛgɛn.
26 Na kali kona Abemelik ko hira ɛana nɔng lɔkke kèe Huzet ko gulsaa bholisa gɛnyɛ kèe Bikol hoya Girarɔ.
27 Na sɛɛsɛ :Isaki,
“Igge ngaannoo zuga bere marranyu na chukonyu ɔra nu?
Na ngaya raano ɔng?”
28 Na yɔk yaktɛsɛ na seyɛsɛ,
“Agge wa katakto shɛɛ hunde Tumu dhaa ɛllo kari ko inyeye,
na wa kɛlɛhɛndo lɔgɔ na keseyo,
‘Maya kìbhiik ko ngahirra lɔga kàbhagɛa ba shɛɛ kari.’
29 Na mɛa ga,
kìbhiigi lɔgɔ ko inye na ibhɛiy shɛɛ damiya bɔɔ kibhbhɛinyi inye.
Agge annaa bɔɔ ngani kìtiranydɛinyio dhul na kabhakka ba shɛɛ na koo kittoninyi shɛɛ hung.
Nɔng inye bhɛa Tumu ani na bo tuhinɛni.”
30 Na koo Isak abhanyisiu yɔk.
Na usɛ,
na irtɛ.
31 Na bhorroyɔ banda na bhiigi ko Isak lɔgɔ.
Na ittonu na ago ke na bo challa.
32 Na ngakaldonu rɛ gaymanya hoya na yoktɛsɛ Isak lɔga bolkua dhaa bhɔkkanɛa na seyɛsɛ,
“Yee!
Agge wa kɔjɔyao ma ni!”
33 Na ngabolkuonu tɔgɔdhɛsɛ :Isaki sarre kèe “Sabe.”
d Na ko mɛa toye ngaɔrronu keli “Bersaba.”