Lɔga Bere Gamnɛnɛa :Awurahami Sɛgɛn
25
1 Na koo Awuraham gama tɛrite kèe Ngakutura.
2 Na ngatɛritonu hudhugo Zimira ko Yokisha ko Mɛdha ko Midhiyam ko Yushibo ko Shuha.
3 Na Yokisha ko nɔng koo irriyo Shɛba ko Didan.
Yɔk ashaa Didani a ngabhorinyaya kèe Asor ko Latush ko Lumaye.
4 Nɔng Midhiyam erroa gɛnyɛ dha bere keli Ɛbha ko Eber ko Henok ko Abida ko Eldad.
Yɔk ngazukta kumulɔng a ashaa Ngakutura.
5 Na Awuraham ibha ahaa gɛnyɛ kumulɔng na aynɛ Isak.
6 Nɔng Awuraham huna ngani iho basseyɔ,
dha bere ibhbhana aha gen na ɛdhɛttanɛ erroa gɛnyɛ irrittono bhɛa tɛrroa chicho.
Na koo ittonu baa iho yalɔ na kabhaga ko Isak rɛna rɛna.
Lɔga Bere Rɛsɛa :Awuraham
7 Yɔk dha bere oynyaa bhagɛa :Awurahami ba kumulɔng a 175.
8 Na hunaa tɛwa ngaoynyaya bu mɛrte,
nyaggau na ere na kɔbhu zuga gɛnyɛ bere rɛssɛa sabbɔ.
9 Na ojjigi :erroa gɛnyɛ Isaki ko Ismayeli bhogoya kèe Magabela.
Nɔng ngabhogotonu dha bere i Mamirɛgiye jaa gua eriya Zohari ku hira bhora Hitani kènno Ebherom.
10 Nɔng dha bere ngaguonu anna tallana :Awurahami bhɛa zuga bhora Hitani.
Na nɔng kojjigi bhɛa bere kòjjɛa tɛriya nɛnɛ Ngasara jaa.
11 Na hunaa Awuraham erra na kòyta na tewa ushaye,
Tumu tuhu Isak.
Nɔng Isak dha bere bhak Bɛr Lay Roy jaa.a
Ashaa Ismayeli
12-13 Mɛa te lɔga ashaa eriya Awurahami kèe Ismayel bere kìrrittono bhɛa sedhdheya Gibsi kèe Agar ku gaymaya Ngasara.
Eriya ku aw a Nɛbiyoti.
Na dhoono Kedhari ko Abideli ko Mibisa.
14 Na kɔbhbhana Mishima ko Dhuma ko Massa,
15 ko Hadadhi ko Tema ko Jeturi ko Nabhishi ko naa Kennɛnɛa wayɔ kènno Kɛdhɛma.
16 Ngagiya kumulɔng a erroa bere Ismayeli.
Na sara gɛ agga bere kèliyɛa gulsachina allinɛnɛa gettoa gɛ ku tɔmmɔn ko ramman ko hana bhakkɛa :yɔkku.
17 Na Ismayel nyaggau na oynyaa gɛnyɛ te 137 na ere na kɔbhu zuga gɛnyɛ bere rɛssɛa sabbɔ.
18 Nɔng ashaa gɛnyɛ dha bere bhakkɛ Hawula ko Shur kɛrghɛn gɔra kɛ̀hɛɛa Asorɔ ranɛna ko ngerreya Gibsi.
Na yɔk dha bere marnɛ ko ashaa Awurahami gen.
Kolea Kùhudhukkonɛa :Yaykob Ko :Esau
19 Mɛa te lɔga eriya Awurahami kèe Isak.
Awuraham dha bere irrittono Isak.
20 Na Isak hunaa oynyaa gɛnyɛ tewa zugo rammande,
gamu hoya Batuli kèe Ngaribika.
Na Ngaribika ko gɔynɛ Lawa ko baba nɛ,
dha bere a zuga bhora kèe Soriya na bhakkɛ ɔrre kèe Badharam.
21 Nɔng Ngaribika dha bere wo hɔlɔng,
eri ninggɛn.
Na ogolɛsɛ :Isaki Tumu.
Na Tumu shigu na Ngaribika tɔlɔma eri.
22 Na hunaa lɔmmana eriye,
dha bere a shɔa na ikinynɛ kɛngɔ.
Na nɔng seu,
“Na dha kɛngɔ amany ɔnɔng?”
Na koo ghinu Tumu.
23 Na sɛɛsɛ :Tumu,
“Kɛngɔ toye lɔmi erroye ale ku bhorinya ramman,
na ngabhorinyaya hunde ale hudhukkinyaye,
marnɛ na kennɛ kɛngɔ.
Na ale bhor kona anna bu ɔnnɛna bhɛa lallɛnɛ,
na na ku sabba,
ale kay inde kɔbhinya wurtɔye.”
24 Na unga senno kuhudhukiɛy :Ngaribika hunaa dheytiyaye,
koo hudhugo erroye may ku ramman.
25 Na eriya hudhukkinyana sabbɔ dha bere a gɔlɔnyi,
na rɛ bhoy a chahuri.
Na yɔk tɔgɔndɛsɛ sarre kèe Esau.b
26 Na na kɔbhinyana hunaa hudhukkinyanaye dha bere ibh gɔynɛ tiinyoy.
Na nɔng kɔ̀tɔgɔndɛsɛ sarre kèe Yaykob.
c Nɔng ngabɛrguonu dha bere oynyaa chɔgɔnɛ a 60.
27 Na erro chili na te bibi.
Na Esau te muralɛa bo woo dusɔ na kɔdhdha kɛginya bɛrrɔ na ejjo chɔɔ torongngɔ.
Na Yaykob nɔng a hira iho laay na te na iho ɔrɔ iwoo aha.
28 Na Isak nɔng teyelu Esau goore ke ngaya ajjɛɛn ayuga dusunyde.
Na nɔng Ngaribika teyelu Yaykob.
29 Na kali kona Yaykob hunaa okko hotuye,
Esau ko dusɔ na dha bere dhak :hozzo goore.
30 Na sɛɛsɛ Yaykob,
“Wa dhaganyɔ :hozzo gɛrrɛng.
Ga any ngahotuya gɔlɔnyde bhee chinyi.”
Na ngaya ogolɛ hotuye,
a bhee ale koo keliɛ nɔng Edombe.d
31 Na Yaykob nɔng sɛɛsɛ,
“Ga sabbɔ any kàtaliny buyna nunu ale sɛrɛyɛi aha.”
32 Na nɔng sɛɛsɛ,
“Anye se kèr hozzo so!
Seni buyn kème ɛnɛng?”
33 Na Yaykob nɔng seu,
“Yee!
Hunde seni kàtal buyna nunuye,
ga sabbɔ wo bhiigagany lɔgɔ ni.”
Na yɔk bhiigi lɔgɔ na Yaykob talu buyna Esau.
34 Na hunaa bhiikta lɔgɔ na tewa ushaye,
koo Yaykob ibha tila ko hotu na aynɛ.
Na Esau hunaa usɛa na tewa ushaye,
bana na ogo.
Yɔk lɔga bere marɛa :Esau buyn na dhɔyɛsɛna Yaykob a ngagiya.