Pilati yi citi kanlɛ Yezu la
(Maco 27.1-7,11-14; Marka 15.1-5; Zaan 18.28-38)
23
1 A zama tuma ya yɛ ka zigi ǹ ni wɔ kə Yezu cii Pilati ji.
2 Ǹ tǝ sa ǹ ni sɔn da a la ci giri: «Wu ya wɔrɔ a gulɛ ci yira wa gana mun gɔn sɔgɔrɛ. A ni pɛn mə̀ ǹ ni gɔn gɔn ma ǹ bə ra ɲile jilɛ saa Rɔmu cii do nɛ ba. Nkə yi dɔ, mə̀ á yi cii nkə Krista lɛ.»
3 Pilati tə landa a la: «Ń yi Zuwifun fu ci lɛ?» Yezu ni lɛ si: « Ńcɛn yi a prɛ.»
4 Pilati ni pɛn a kanbɔlɛ yɛdanan nkə a zama nɛ: «Mə bǝ za zɛɛn ye a gulɛ ci ma ba kəna bɛ a ɲarɛ mə̀ a n jɛ a n gin ba.»
5 Fo, ǹ ya cicima Pilati ma ǹ ni a pɛn: «A yi gɔn gɔnma jije kɔrɛ a gana mun la. A ni lɛ gun Galile ganan ma, a n da Zude gana tuma ji, a kə ce a da cina jɛn dɔ nɔ.»
Erɔdi yi citi kanlɛ Yezu la
6 Pilati bɛ yi ma, a ya landa: «A gulɛ ci yi Galilena lɛ?»
7 Ǹ ni a lɛ si mə̀ Yezu yi Galilena lɛ. A bɛ ni dɔnɛ mə̀ Yezu yi cii do Erɔdi fu gana mu lɛ, a ni a ja a la. A ya da yira Erɔdi dɔ ya da Zeruzalɛmu yi waa ce nɔ.
8 Erɔdi bɛ Yezu ye, a fɔ ya nina kɔ tantan, a buru a bɛ sɛn kənan ma Yezu sɛ rɔ, a ya gura garɛ ji haalɛ zizi, mə̀ a ni ye kə á yɛɛrɛ. A yii rɔ á ni a ye kabada sɛ gɔ zanlɛ.
9 A ya landa Yezu la kə sɛ mɔnlɛn nɔ, fo Yezu bǝ a lɛ si tuun ba.
10 Laa fu cin kanbɔlɛ yɛdanan nkə a dula yɛɛ ɲawulen ya da bi. Ǹ yi sɔn tɔyɛ tuma darɛ a la.
11 Erɔdi nkə á fu surasɛn yi yira sure a ma mə̀ ǹ ni a ɲalɔ kɔrɛ. Yi cɛrɛ Erɔdi ya minɛ zaan gɔ wɔ a ma, a ni á ɲina a ni a ja Pilati la.
12 Yi pini, Erɔdi nkə Pilati n ya bɔ tɔn lɛ, da yira zɔɔbra yi ǹ jire zilɛ.
Za bə Yezu ma ba
(Maco 27.15-26; Marka 15.6-15; Zaan 18.39-19.16)
13 Pilati ya lɛ ja Laa fu cin kanbɔlɛ yɛdanan nkə a gɔndanan nkə a zama yɛdanan la.
14 A ni pɛn ǹ nɛ: «A gulɛ ci ya ka da kə a nɔ, kə mə̀ a yi a cuu mun gɔn sugɔrɛ. A bɛ, mə ya landa a la kəcɛn yɛɛ ma, kə bɛ sɛ kəna tuma darɛ a la, mə bǝ yi zɛɛn za ye a ma kəna bə jɛ bɔ ba.
15 Erɔdi dɔ bǝ za zɛɛn ye a ma ba, yi wulɛ ya a ni a ja wu la. Mə̀ yi ya kə yɛ, a bǝ sɛ zanɛ kəna bɛ ɲarɛ mə̀ a n jɛ a n gin ba.
16 Yi tɔ ma, mə da ǹ da a nɔ ma, yi cɛrɛ mə a dala.» [
17 Kanɛ la bebɛ tɔ Kanɛ la bəbɛ ji, Pilati yi narɛ ma a n kasa nɔ mu gɔ dala.]
18 A zama ya pətara mə̀ ǹ ni a prɛ: «Yezu ɲile n bɔ, Barabasi n dala.»
19 Barabasi ya ǹ ni a da kasa nɔ, a buru aci nkə a mun bɛ ni gɔn gɔn ma Rɔmu mun lo a cuuri, mu gɔ ya gin yi bɔsɛ ji.
20 Pilati bɛ ji a n Yezu dala, a ya sɛ pɛn a zama ji dɔ.
21 Fo, a zama ni pɛn: «A dwa da ma! A dwa da ma!»
22 Pilati tə a pɛn a cɔwfuna ma: «Kɔn fɔ sɛ bubu ya a gulɛ ci ni zanɛ? Mə bǝ za ye a ma kəna bɛ ɲarɛ mə̀ mə a ɲile bɔ ba. Mə da ǹ da a nɔ ma, yi cɛrɛ mə a dala.»
23 Fo, a zama yi sure mə̀ Pilati n Yezu dwa da ma. Ǹ ya la a lɛ nɛ;
24 Pilati ya bana a ni kura ǹ fu ma.
25 A gulɛ kəna bɛ ǹ ni a da kasa nɔ a zama ɲiin za nkə a mu jɛ tɔ ma, a ya yi dala a n kaɲa kə ǹ fu landa. A tə Yezu dala ǹ wɔn lɛ ma ǹ ni ǹ jun zanɛ a nɛ.
Ǹ yi wulɛ kə Yezu a jɛ jɛnɛ
(Maco 27.32; Marka 15.21)
26 Ǹ bɛ wulɛ kə a nɔ, ǹ ya tra gulɛ gɔ lɛ bɔ wu rɔ. A tɔ mə̀ Simɔn, Sirɛnina ya. A surasɛn ni a da Yezu fu dwa da sa ma, a n turu a cɛ kə a nɔ.
27 Zama do yi tuure Yezu ma, lɔn yi bi ǹ jire ǹ ni wu pɛrɛ ǹ ni ǹcɛn jɛrɛ.
28 A ni á beere a ni pɛn ǹ nɛ: «Zeruzalɛmu lɔn nɔ, kə bǝ ra wu pɛ ma ji ba, kə wu pɛ kəcɛn nkə ka ɲaan lɛ ma.
29 A buru mə waa gɔ dɔ, mun da pɛn: “Lɔn kunan nɔ, lɔn kənan bɛ ǹ bǝ nɛ ye tuun ba, lɔn kənan bɛ ǹ bə ɲɔ kɔ nɛ la ba, dosɛ yi yin nɛ.”
30 Mun da pɛn tutun nɛ: “Kə wuro kə kɔ wu lɛ!” Ǹ ni a pɛn tutun ɲiɲalɔn nɛ: “Kə wuro kə kɔ wu lɛ!”
31 Mə̀ ci n zanlɛ wɔ butu nɛ, kɔn da zan wɔ laga nɛ?»
32 Ǹ yi wulɛ kə kɛ zawule mu pra dɔ, ǹ ni da ǹ da Yezu ji ǹ ni ǹ jɛ kə ǹ ɲɛ nɔ.
Ǹ yi Yezu dwarɛ
(Maco 27.33-44; Marka 15.22-32; Zaan 19.17-27)
33 Ǹ ya dɔ jɛn gɔ nɔ, yi jɛn ci ya ǹ ni a beere ǹcɛn fu lɛ sɛ nɔ mə̀ «Ɲii Pɛrɛ». Ǹ ya Yezu dwara a da ma yi jɛnɛ, ǹ ni a kɛ zawule gɔ dwara a jan sin ji, ǹ ni gɔ dwara a jan gwin ji.
34 Yezu ni pɛn: «Mǝ Yaa, ǹ fu sɛ bubu kura ǹ nɛ, a buru ǹ bɛ sɛ kəna zanlɛ ǹ bǝ a dɔn ba.» Ǹ ya su pan Yezu fu minɛn ma ǹ ni ǹ bəkan ǹ ɲɛ nɛ.
35 A cuu mun yi gɔnlɛ ǹ ni ga ǹ ma. A yɛdanan cɛn yi ǹ wan bɔrɛ mə̀ ǹ ni a prɛ: «Ń ya mu talan ɲile kana; mə̀ ń Krista lɛ sɔbɛ, ń ni ńcɛn ɲile kana bɛɛnɛ.»
36 A sɔrasɛn dɔn yi yira sure a ma. Ǹ ni ǹ mɔrɔ a ma ǹ ni vinɛgri kɔ a la mə̀ a ni mi.
37 Ǹ yi a prɛ: «Mə̀ ń Zuwifun fu cii lɛ sɔbɛ, ńcɛn ɲile kana.»
38 A da ma Yezu ɲiin bəri, a sɛbɛ yi ci giri: «A Zuwifun fu ci yi kə ce.»
39 A kɛ zawule gɔ ni á kura a da ma a n Yezu susɔ ci giri: «Cina ń yi Krista lɛ? Ńcɛn ɲile kana ń ni wucɛn dɔn ɲile kana!»
40 Fo, a gɔ ce ya yɛrɛ á munu ma a ni pɛn: «Kə tuman yi kukwe gɔrɔ nɔ, ń bə ɲi Laa nɛ ba?
41 Wucɛn kɔn fu kukwe yi á zɛ ji. Wu bɛ sɛ kəna zanɛ, yi wulɛ dɔ yi kə ce bɔ wu ma, fo a gulɛ ci bǝ sɛ bubu zɛɛn zan ba.»
42 A tə a pɛn Yezu nɛ: «Mə̀ ń da ń fu cibra nɔ pin kəna pini, ń ni ń yii da mə ji.»
43 Yezu ni lɛ si: «Caan ya! Mə yi a prɛ ń nɛ, pə cɛnɛ, ńci nkə ma da wɔ Laa paa kə wu ɲɛ nɔ.»
Yezu jɛ
(Maco 27.45-56; Marki 15.33-41; Zaan 19.28-30)
44-45 Pinin bɛ kɔ sinsɛnw, jɛn ya kuro, a buru mutə ya wɔ tu la fantan a n wɔ dɔ misanbɔ ji sa waa ma. Minɛ kəna bɛ Laa fu cin do nɔ bəkanlɛ, yi ya tɔrɛ a bə rɔ palala.
46 Yezu ya pəta ka pan: «Mə Yaa, mə yi mə ɲile wɔ ń wɔn nɔ.» A bɛ á lɛ ɲarɛ, a fɔ bə kanlɛ.
47 A sɔrasɛ yɛdana bɛ yi sɛ zanlɛ ci ye, a ya Laa do kɔ a ni pɛn: «Yira nkə sɔmɔ ni á bɔ a nɔ, a gulɛ ce yi mu tətele lɛ!»
48 Mu kənan tuman bɛ da ga a mu dwarɛn ma, sɛ kəna bɛ zan ǹ yɛɛ ma, ǹ yi wulɛ paa mə̀ ǹ ni ǹ ɲiin pəpasa fɔ za tɔ ma.
49 A lɔn kənan bɛ ni tuu Yezu ma haalɛ Galile gana nɔ, yin nkə Yezu dɔnwulen yi gɔnlɛ zayii mə̀ ǹ ni ga ǹ ma.
Yezu bǝ sɛrɛ
(Maco 27.57-61; Marka 15.42-47; Zaan 19.38-42)
50-51 A Zuwifun fu ci wɔlɛn jire, gulɛ gɔ yi bɔ Arimate cuuri, a tɔ mə̀ Zozɛfu. Arimate yi Zuwifun fu gana gɔ lɛ. A yi mu sɔbɛ lɛ, a tətele dɔ ya, a ya gura á yɛɛ dɔ Laa fu cibra fu da ji. Ǹ munun bɛ ni sɛ kəna lɛ kanɛ ǹ ni a zanɛ, a bə na yi nɔ ba.
52 A ya wɔ Pilati ji a n wɔ Yezu jii ɲɔnɔ a ji.
53 A ni jii jise a dwa da ma, a n bə minɛ pini a ma a n wɔrɔ da jii yɛ rɔ. Yi jii yɛ ci yi bi para nɔ, ǹ bə mu zɛɛn da a nɔ ba.
54 Yi lɛ mɛ ya kaɲa juma ma, a Zuwifun fu suso pini lɛ n gure.
55 A lɔn kənan bɛ tuu Yezu ma haalɛ Galile gana nɔ, yin ya da jɔ Zozɛfu ma. Ǹ ya ga a yɛ nkə Yezu bə gɔn ma.
56 Yi cɛrɛ, ǹ ni ǹ ɲina ǹ ni wɔ paa, ǹ ni wɔ tɔnkɔlɔma jin nina nkə ɲilɛ jin nina zizanɛ cina ǹ ni a ka Yezu jii ma. Ǹ ni ǹ suso a suso pini a n kaɲa kə a dula fu prɛ.