Umughi ughwa Bhaabhëëri ghoratemorwa
18
Hano ghayö ghaahööyë,
nkamaaha maraika uwöndë ono yaarë na ubhwera obhonene,
araika ukurwa mu-ryobha.
Yaarenga na emerengaari gheno ghyaamërëkëri ekebhara.
2 Akakonga bhököngʼu igha,
“Ghötëmööywë!
Umughi omonene ughwa Bhaabhëëri,
ghötëmööywë!
Bhoono ghobhaayë ahasë aha ukwibhisa,
amasambwa,
na ëbhëhwë ebheghogho ibhya seteemo syonswe igho.
Obhaayë ahasë aha amanyönyi amanyanku agha ökösëësëëbhya enkoro.
3 Bhaabhëëri ghötëmööywë,
ko bhoora abhantö abha ibhyaro bhyonswe igho,
bhaanywa idivai ëndörö iya oronamba urwa obhosooraare ubhwaye,
abhakama abha ekebhara bhaakörrë nawe amaigha.
Abhaköri abha ibhyashara abha ko-kebhara
bhaamëhëëyë ko-ronamba urwaye rono rotaana orotonga.”
4 Mbe,
nkaighwa engamba iyëndë ukurwa mu-ryobha iyö eraghamba igha,
“Bhare abhantö abhaane,
murwe mu-mughi ghuyö,
okore motakaaghootana nagho okokora ëbhëbhë,
motakaasha okohombanibhwa hamwë mu-bhushibhu ubhwagho.
5 Ko bhoora ëbhëbhë ibhyaye,
bhyaruhirë,
kora bhyahikirë mu-ryobha.
Waryobha n-haangʼë arë aghushibhi,
ko amangʼana aghaagho amaghogho.
6 Momokorre ighoigho,
kya bhoora we yaakörëëyë abhandë.
Kora ni-igha mumwëngëri kabhërë ko amangʼana amaghogho ghayö yaakörëëyë abhandë.
Mogheghe ekekombe ikyaye
momotoorre-mo mara kabhërë iya öbhörrö bhono yaabhatöörëëyë bhëënyu.
7 Mumushibhi na momoteese ko okorengʼaana na bhono yaakörrë akaameha igho,
akaghya sinkuma.
Ko bhoora igha,
nkwihasha arë mo-maitegherro aghaaye araghamba igha,
‘Nikaayë kya omokama omokari,
ko bhoora tëndëngë musinö hë,
tendebhaabhayera röndë hë!’
8 Ku bhuyö ibhyateko bhyonswe igho,
mbirimunyoora ku-rusikö örömwë,
ibhyateko ibhya uruku,
ikikuuro na ibhya inshara.
Naresambwa mo-morro asikibhwi,
ko bhoora Omonene Waryobha ono akobhotora ibhiina,
n-wa obhotoro.”
9 Abhakama abha ekebhara bhano bhaakörrë nawe amaigha,
na okosanga ubhwamë ubhwaye,
hano bharemaaha iryöki irya ukusika ukwa umughi ghuyö,
mbarikuura,
bharasenkemerra umughi ghuyö.
10 Abhakama bhayö,
mbariitasha hare na umughi ghuyö,
ko okoobhoha inyaanyi iya umughi ghuyö.
Mbarikuuranga bharaghamba igha,
“Haahö,
haahö umughi omonene Bhaabhëëri,
umughi ughwa singuru!
Ko bhoora ko-nkaagha iya esa ëmwë igho,
ushibhiibhwi.”
11 Abhaköri abha ibhyashara abha ko-kebhara,
mbarikuura na okosenkemerra,
ko bhoora taaho ghwiki ömöntö uwa okoghora ëbhëntö ibhyabho hë.
12 Ömöntö uwa okoghora ëbhëntö ibhya öbhöghöri ibhya esahaabhu,
seehera,
iruuru,
ebheghera ibhya öbhöghöri taatooke hë.
Ömöntö uwa okoghora eketambaara ikiiya ikya öbhöghöri,
singibho isya erangë këësërö,
isya ehariri na senkangaaru,
taatooke hë.
Ghwiki ömöntö uwa okoghora kera eteemo iya ömötë ughwa ëkörösö,
kera ëkëntö ikya amaino agha sinshöghu,
kera ëkëntö ikya ömötë ughwa öbhöghöri,
ikya ishabha,
ikyoma na ëkëntö ikya emaarumaaru,
taatooke hë.
13 Ömöntö uwa okoghora omodarasiini,
ebherongo,
ihiriki,
amaghuta agha öbhöghöri,
ëkörösö,
idivai,
amaghuta agha okohensherra,
obhose ubhuuya na engano,
taatooke hë.
Ömöntö uwa okoghora sengʼombe,
amangʼöndi,
sefaraasi na ëmëkökötëëni ighya ukurutwa na sefaraasi,
abhaghorwa na öbhöhöru ubhwa abhantö,
taatooke hë.
14 Mbe,
abhaköri abha ibhyashara mbareghamba igha,
“Ëbhëntö bheno waahanshirë bhisikirë.
Ëbhëntö ibhya öbhöghöri,
bhisikirë,
tebheeho hë,
kora turibhinyoora röndë hë.”
15 Abhaköri abha ibhyashara ibhya ëbhëntö bhiyö,
bhano bhaamëhirë ku ibhyashara ibhya ku-mughi ghuyö,
mbariitasha hare,
ko okoobhoha inyaanyi iyaagho,
eno bharakuura na okobhaabhayera.
16 Mbareghambanga igha,
“Haahö,
haahö,
ghore umughi omonene.
Waaibhohanga singibho sinshiiya isya öbhöghöri obhonene,
na isya erangë këësërö na enkangaaru.
Waaikonanga na esahaabhu,
ebheghera ibhya öbhöghöri na iruuru,
17 kasi bhoono kamwë igho,
ubhwamë bhuyö bhwonswe igho,
bhusikiibhwi!”
Abhaghöbhya abha amaato bhonswe igho,
abhantö bhonswe igho bhano bhakoheta ku-nyansha,
abhantö bhonswe igho bhano bhakokora emeremo mo-maato,
mbariimerra hare iyö.
18 Hano bharemaaha iryöki irya ukusikibhwa ukwa umughi ghuyö,
mbarikuura bhököngʼu bharaghamba igha,
“Teghooho umughi omonene ughwöndë kya umughi ghono hë!”
19 Abhantö bhayö,
mbariyerorra urutu ko-metwe ighyabho,
ukwörökya igha,
bhabhaabhayëëyë.
Mbarikuura eno bharaghamba igha,
“Haahö,
haahö,
umughi omonene ghono.
Umughi ghono ngwo ghwaakora bhëëtö bheene maato bhonswe igho,
twameha ko okoghera iya ubhwamë ubhwagho.
Kasi bhoono ghusikirë kamwë igho.”
20 Mushomerwe abhamënyi abha mu-ryobha,
na bhëënyu abhantö abha Waryobha,
abhatomwa na abharööti,
bhonswe igho mushomerwe,
ko bhoora Waryobha ashibhiri umughi ghuyö,
ko okoghera iya ghaara umughi ghuyö ghwaabhakörëëyë.
21 Mbe,
maraika uwa singuru,
akainyökya reghena kya oroghena oronene urwa okoseera,
akarerekera mu-nyansha,
akaghamba igha,
“Ku singuru sinsharu kya igho,
ni-igho Bhaabhëëri arerekerwa,
umughi omonene ghuyö,
toremaahwa ghwiki hë.
22 Taaho ömöntö ono ariighwa-mo abhantö bhararëëtya,
handë ukwighwa-mo ritungu,
ekerongwe handë setarumbeeta.
Tarebha-mo umunfundi wowonswe oora hë,
ömöntö tariighwa ömöntö arasya muyö hë!
23 Kora emerengaari ighya etara tegheremoreka-mo hë.
Kora inyangi iya öbhötëti terebha-mo hë.
Ko bhoora abhaköri abha ibhyashara abhaaho,
m-banene abha ibhyaro bhaarë,
na ko okoghera iya ubhuturutumbi ubhwaho,
ibhyaro bhyonswe igho,
bhekangʼainwa.
24 Mu-mughi muyö,
ghaare-mo amaanyinga agha abharööti na agha abhantö abhandë abha Waryobha,
hamwë na amaanyinga agha abhantö bhonswe igho bhano bhaaitirwë ko-kebhara kono.”