Omosooraare na ughutyënyi oghokangaaru
17
Mbe,
ömwë mo-bhamaraika muhungatë,
bhayö bhaarë na amabhaköri agha okorerra ukwa Waryobha,
akaasha ku-öni,
akantëëbhya igha,
“Nshö hano nkwöröki ubhushibhu ubhwa omokari omosooraare,
uyö,
nu-mughi ghoora ghwaahaghaashwa ko-manshë amaaru.
2 Omosooraare uyö,
we abhakama abha ko-kebhara bhaakörrë nawe obhosooraare,
na abhantö abha ko-kebhara kono,
bhakaghootwa na obhosooraare ubhwaye bhuyö,
kya hano ömöntö aghöötirwë na amarwa.”
3 Mbe,
Umwika Ömöhörëëru uwa Waryobha akanyitoomera.
Maraika akantangata ukughya ku-riköngö.
Hano naahikirë iyö,
nkamaaha omokari aikaayë ku-ghutyënyi oghokangaaru.
Ughutyënyi ghuyö,
ghwaarenga na emetwe muhungatë,
na amatera ikömi.
Kö-möbhërë ughwa ughutyënyi ghuyö,
ghaarenga gharomaini-ko amariina agha okotoka Waryobha.
4 Omokari uyö,
yaarenga aibhöhirë singibho sinshiiya isya erangë këësërö na isya erangë enkangaaru.
Ghwiki yaarenga atöörrë esahaabhu,
ebheghera ibhya öbhöghöri na iruuru.
Mo-kobhoko ukwaye,
yaaghöötërrëëyë ekekombe ikya esahaabhu,
keno kyaaishööyë amanyënyëëri na amangʼana amanyanku agha obhosooraare ubhwaye bhuyö.
5 Ku-bhusyö ubhwa omokari uyö,
ryarenga ryandëkirwë-ko iriina irya ikibhisirë.
Iriina reno ryaandëkirwë-ko ni-igha,
umughi omonene bhaabhëëri,
nyakuwaabho abhasooraare
na amanyënyëëri ghonswe igho agha ko-kebhara.
6 Nkamaaha omokari uyö,
abhaaye kya ono aghöötirwë na amarwa,
ko bhoora yaarenga anyööyë amaanyinga agha abhantö abha Waryobha,
bhano bhaaitirwë ku ikibhuno ikya ukwimererra amangʼana agha Yëësu.
Hano naamörööshë,
nkaroghoora bhököngʼu!
7 Kasi maraika uyö akamböörya igha,
“N-kwakë öröghöörrë?
Tigha nkötëëbhi ensonga iya ikibhisirë ikya omokari uyö,
na iya ughutyënyi nyametwe muhungatë,
na amatera ikömi ghayö.
8 Ughutyënyi ghuyö örööshë,
ngö-höru ghwaarë,
kasi bhoono ghwaakwa.
Kora n-haangʼë ghörë ghurwe mu-bhwina ubhwa mu-kyaro ikya abhaku,
kasi Waryobha naraaghusiki.
Abhantö bhonswe igho abha ko-kebhara kono,
bhano amariina aghaabho ghatandëkirwë mo-Ketabho ikya Öbhöhöru,
hano waanyöörrë ekebhara ketaraabhombwa,
mbareroghoora okomaaha ughutyënyi ghuyö,
ko bhoora igha,
ho ghwaarenga,
ghokakwa,
kasi ghwiki ngurikyora.”
9 Maraika uyö akaghëndërrya akaghamba igha,
“Hano,
haratuna ömöntö uwa obhongʼaini.
Emetwe muhungatë ghiyö örööshë,
ghiyö ne-bhekereghe muhungatë bheno omokari uyö akwikara-ko.
10 Ghwiki emetwe muhungatë ghiyö,
nkwimererra ghërë abhakama muhungatë.
Mo-bhakama muhungatë bhayö,
abhataano,
bhaamara ukukwa,
ömwë,
nkotonga akërë.
Kasi omokama uwöndë ono araaroobhere-ko,
hano ariisha,
Waryobha naremohaana umweya,
atonge ku-ribhagha ike igho.
11 Ughutyënyi ghuyö ghwaarenga ghöhöru kasi ghokakwa,
ngwo omokama uwa monaane.
Omokama uwa monaane uyö mmo-bhakama muhungatë bhayö yaarë,
kasi wonswe Waryobha narimusikya.
12 “Amatera ikömi ghayö örööshë,
nkwimererra gharë abhakama ikömi bhano bhataraatonga.
Bhonswe igho bhayö,
mbarehaanwa ubhwera ubhwa okotonga hamwë na ughutyënyi ghuyö,
ku-ribhagha irya esa ëmwë igho.
13 Abhakama ikömi bhayö,
mbarebha na ikiina këmwë.
Mbarehaana ughutyënyi obhotoro na ubhwera ubhwabho bhwonswe igho.
14 Mbareghootana na ughutyënyi ghuyö,
okore bhaitane na Omoona Ringʼöndi.
Kasi Omoona Ringʼöndi hamwë na abhantö abhaaye,
narebhabhaaha,
ko bhoora we Omonene uwa abhanene na Omokama uwa abhakama.
Abhantö abhaaye bhayö,
m-baara Waryobha yaabhërëkëëyë,
akabhashaaghora,
abhantö bhayö,
m-ba heene.”
15 Maraika akaghëndërrya ukushumaasha,
akantëëbhya igha,
“Amanshë ghayö örööshë omosooraare aikaayë-ko,
ne-bheghambo bhyonswe igho ghakwemererra,
sihiiri syonswe igho na ibhyaro bhyonswe igho.
16 “Amatera ikömi ghayö örööshë,
hamwë na ughutyënyi ghuyö,
mbereregha omosooraare uyö.
Mbaremosensa ëbhëntö ibhyaye bhyonswe igho,
bhamutighe kengʼaabhi kya mutyënyi.
Mbaremorya,
na bheno bheretama,
mbarebhetabhuta mo-morro.
17 Waryobha umwene we yaakörrë bhabhe na ikiina ëkëmwë ikya okohaana ughutyënyi ghuyö obhotoro ubhwabho ubhwa okotonga.
Ni-igho bharekora okohekera hano ësëëmyö iya Waryobha erehekerana.
18 Omokari uyö örööshë,
uyö we akwimererra umughi omonene ghoora ghokotonga abhakama bhonswe igho abha ko-kebhara kono.”