Amabhaköri muhungatë agha okorerra ukwa Waryobha
16
Mbe,
nkaighwa engamba enene ukurwa mu-nyumba iya Waryobha,
eratëëbhya abhamaraika muhungatë bhaara igha,
“Moghende mohomorre ko-kebhara okorerra ukwa Waryobha kono körëngë mo-mabhaköri muhungatë ghayö.”
2 Mbe,
maraika uwa mbere akaghya,
akahomorra ko-kebhara ribhaköri iryaye riyö irya okorerra ukwa Waryobha.
Hayö na hayö igho,
abhantö bhano bhaarë na eharama iya ughutyënyi,
na bhano bhaasëngërrëëyë ritöndö iryagho,
bhakabha na amahutë amaghogho,
ghano ghakotakunya bhököngʼu.
3 Ho maraika uwa kabhërë wonswe akahomorra ribhaköri iryaye ku-nyansha.
Amanshë ghakabha kya amaanyinga agha umuku,
ëbhëntö bhyonswe igho bhekakwa mu-nyansha muyö.
4 Mbe,
maraika uwa katatö,
wonswe akahomorra ku-myoro na ebheseekaani ribhaköri iryaye,
amanshë ghayö ghonswe igho,
ghakabha amaanyinga.
5 Nkaighwa maraika umwimërërri uwa amanshë araghamba igha,
“Ë Waryobha Ömöhörëëru,
uwe ho waarë ukurwa kare na kora bhoono igho hö örë,
uwe nu-uwa heene örë,
na öbhöbhötöri ubhwaho ubhwa ikiina bhono,
nu-bhwa heene.
6 Ko bhoora igha,
abhantö abhaghogho bhaaitirë abhantö abhaaho na abharööti abhaaho,
uwe Waryobha obhashibhiri ko okobhahaana amaanyinga,
bhanywe.
Ubhushibhu bhuyö,
mbobhaingʼarëëyë!”
7 Mbe,
nkaighwa engamba erarwera ku-riighyö eraghamba igha,
“M-maheene,
Omonene Waryobha uwa obhotoro bhwonswe igho,
ubhushibhu ubhwaho,
m-bwa heene,
na ubhwa obhoheene.”
8 Ho maraika uwa kane,
wonswe akahomorra ribhaköri iryaye ku-ryobha.
Iryobha rekahaanwa obhotoro ubhwa okosamba abhantö na omobhasö ughwaryo.
9 Abhantö bhakasambwa bhörrö.
Bhakatoka Waryobha ko bhoora yaarë na ubhwera ubhwa ibhyateko bhiyö.
Kasi abhantö bhayö,
tebhaahöngööyë ëbhëbhë ibhyabho,
handë igha bhatööni Waryobha hë.
10 Mbe,
maraika uwa kataano,
akahomorra ribhaköri iryaye ku-kitumbë ikya ekekama ikya ughutyënyi ghoora.
Ikisuntë kekakura kamwë igho,
ko-bhokama ubhwa ughutyënyi ghuyö,
na abhantö bhakairomaroma bhörrö sëndëmë isyabho,
ko bhoora bhaanyaharekanga.
11 Bhakatoka Waryobha uwa mu-ryobha,
ko okoghera iya öbhörrö na amahutë amaghogho ghano bhanyöörrë.
Kora tebhaahöngööyë amangʼana aghaabho amaghogho hë.
12 Mbe,
maraika uwa kasansabha,
wonswe akahomorra ribhaköri iryaye ko-mooro omonene ughwa Yufurati,
omooro ghuyö,
ghokooma.
Ku bhuyö ekakorwa-ho enshera iya okoheta-ko abhakama abha ukurwera röghörö.
13 Mbe,
nkamaaha amasambwa atatö,
ghano ghaatuubhaini na ebhekere.
Rimwë rekarwa mu-munywa ughwa ughushoka,
iryëndë,
rekarwa mu-munywa ughwa ughutyënyi,
na iryëndë,
rekarwa mu-munywa ughwa ömörööti uwa obhorongoa oora.
14 Amasambwa ghayö,
ghaarenga na obhotoro ubhwa okokora ebhemanyërryö ibhya amakono,
na emeremo ighyagho,
nu-kughya okokomania abhakama bhonswe igho ko-kebhara,
okore bhakore riihë ku-rusikö oronene roora,
urwa Waryobha uwa obhotoro bhwonswe igho.
15 Omonene Yëësu araghamba igha,
“Momaahe!
Nindiisha kya bhoora umwibhi akuusha igho atarëkëëyë amangʼana.
Yaamara okongʼoorwa ömöntö ono akwiraarerra eno aibhöhirë singibho isyaye bhuuya,
okore atakaasha okoghenda kengʼaabhi na ökösöökërribhwa mo-bhantö.”
16 Mbe,
amasambwa ghayö ghakakomania abhakama bhonswe igho na abhasirikare abhaabho ahasë hano hakobherekerwa ku-Kiëbhuraania igha,
Harimagedoni.
17 Mbe,
maraika uwa muhungatë akahomorra ribhaköri iryaye ighörö iyö.
Ghwiki nkaighwa engamba enene,
erarwera ku-kitumbë ikya ekekama mu-nyumba iya Waryobha,
eraghamba igha,
“Bhoono ghahööyë!”
18 Bhekabha-ho ëbhëmësyö na ebhebhaghatyö ibhya enkobha.
Ekebhara kekarighita bhököngʼu.
Ikirighiti kiyö,
n-kenene kyaarë okokera ibhirighiti bhyonswe igho,
ukurwa hano ömöntö yaabhömbirwë.
19 Mbe,
umughi omonene ghoora ghokobherekerwa igha Bhaabhëëri ghokaahokana sembaara isatö,
na imighi emenene ighya ibhyaro ibhyëndë,
ghekasareka ghyonswe igho.
Waryobha tiyëëbhirë umughi omonene ghoora Bhaabhëëri,
ku bhuyö akaghusingʼirrya ghunywe ekekombe ikya idivai iya okorerra ukwaye.
20 Ikirighiti kiyö nkyaaghërrë amaghinga ghonswe igho ghakasika,
na singuku syonswe igho,
tisyamaahekaini ghwiki hë.
21 Imbura iya righörö ekatwa.
Amaghena amanene agha righörö agha ubhurito kya ubhwa sikiiro merongo etaano kera rimwë,
ghakarwa mu-ryobha,
ghakaghwera abhantö.
Abhantö bhakatoka Waryobha ku kibhuno ikya ibhyateko bhiyö ibhya imbura iya righörö,
ko bhoora ibhyateko bhiyö,
m-beghogho bhököngʼu bhyaarë.