Waryobha aratöönibhwa
19
Hano ghayö ghaahööyë,
nkaighwa engamba kya iya rikomo rinene mu-ryobha iyö,
erakonga igha,
“Waryobha akumibhwi!
Öbhöhönia,
ubhuhika na obhotoro,
ni-ibhya Waryobha uwëëtö,
2 ko bhoora okobhotora ibhiina ukwaye,
n-kwa obhoheene,
na n-kwa heene.
Abhötörëëyë omosooraare bhököngʼu oora ikiina,
ono yaasarya ekebhara ko obhosooraare ubhwaye.
Waryobha amarrë ikisiiyomba
ko okoghera iya amaanyinga agha abhaköri abha emeremo abhaaye.”
3 Bhakaghamba urwa kabhërë igha,
“Waryobha akumibhwi!
Iryöki irya umughi ghuyö
nkwighunda rërë ukughya ighörö iyö amakora ghonswe igho.”
4 Abhaghaaka merongo ëbhërë na abhane bhaara,
bhakaighwësya hansë bhubhuumaayë hamwë na ëbhëntö ibhine bheno bhekoheeshera,
bhakasaasaama Waryobha.
Waryobha ono aikaayë ku-kitumbë ikya ekekama,
we bhaasaasaamanga igha,
“Amina!
Waryobha akumibhwi!”
5 Mbe,
nkaighwa engamba iyëndë erarwera ku-kitumbë ikya ekekama hayö eraghamba igha,
“Mukumi Waryobha uwëëtö,
bhëënyu abhaköri abha emeremo abhaaye bhonswe igho.
Mumukumi bhano mokomosooka,
abha ibhyeo na kora bhano bhataana ibhyeo!”
6 Mbe,
nkaighwa engamba kya iya rikomo rinene.
Engamba iyö,
yaarë okanya igha m-manshë amaaru ghakoghera.
Ghwiki yaarë kya enkobha eno ekobhaghatya,
ekaghamba igha,
“Waryobha akumibhwi!
Ko bhoora Omonene Waryobha uwëëtö uwa obhotoro bhwonswe igho we akotonga.
7 Ni-igha tushomerwe,
tukirirri na ökömötöönia.
Ko bhoora inyangi iya obhoghabhöri ubhwa Omoona Ringʼöndi ihikirë,
na umwenga uwaaye amarrë ukwisëëmya.
8 Umwenga uyö ahaaywë singibho sinshiiya isya öbhöghöri
seno sekomekameka.”
Singibho sinshiiya siyö ensonga yaamo,
na-mangʼana amaiya ghano abhantö abha Waryobha bhakokora.
9 Mbe,
maraika uyö,
akantëëbhya igha,
“Andeka igha,
nyakara bhano bharaarekwa ku-nyangi iya obhoghabhöri ubhwa Omoona Ringʼöndi.”
Ghwiki akantëëbhya igha,
“Amangʼana ghayö ngambirë,
na-mangʼana amaheene agha Waryobha.”
10 Mbe,
ho naaghööyë hansë bhubhuumaayë ko-maghörö agha maraika uyö,
okore mmosaasaame.
Kasi akantëëbhya igha,
“Tigha otakaakora igho!
Öni wonswe murikyaho ndë,
ömököri uwa emeremo hamwë na abhakumya bharikyaho,
bhano bhakwimererra amangʼana agha Yëësu.
Sengerra Waryobha!
Ko bhoora ukwimererra amangʼana agha Yëësu kuyö nkwo esemoka iya öbhörööti.”
Ömöghëndya uwa efaraasi endabhu
11 Hano ghayö ghaahööyë,
nkamaaha mu-ryobha haighökirë.
Nkamaaha efaraasi endabhu.
Ono yaaikaayë-ko,
yaabherekerwanga igha,
“Uwa heene” na “Uwa Obhoheene.”
Nkobhotora arë ibhiina na ukwitana riihë ubhwa heene.
12 Amaiso aghaaye,
ngaarë kya emerengaari ighya omorro.
Yaarenga aibhöhiibhwi ibhirighi ebheke ibhyaru ibhya ekekama ko-motwe ughwaye.
Yandëkirwë iriina reno reetaamanyirwë na uwöndë,
kasi nu-mwene igho we yaaremanyirë.
13 Yaarenga aibhöhiibhwi engansho eno yaarenga ishöshirë amaanyinga.
Yaabherekerwanga igha,
“Engʼana iya Waryobha.”
14 Abhasirikare abha mu-ryobha mbaamosooraini,
bhariinirë ko-sefaraasi sendabhu,
bhaibhöhëëyë singibho sinshiiya isya öbhöghöri,
sendabhu shaa.
15 Umushonge umwöghë,
nkurwa ghörë mu-munywa ughwaye,
okore abhaahe Abhakyaro.
Narebhatonga ku ubhwera obhonene.
Uyö we akotashera sezabhibhu mö-këntö ikya okosemetera-mo.
Ëkëntö kiyö këröörökya okorerra ukwa Waryobha uwa obhotoro bhwonswe igho.
16 Ömöntö uyö,
yaarë na iriina ryandëkirwë ko-ngansho orobhareka urwa ku-kiimo ikyaye igha,
omokama uwa abhakama,
omonene uwa abhanene.
17 Mbe,
nkamaaha maraika ömwë aimërëëyë ku-ryobha kighörö.
Maraika uyö akakonga bhököngʼu,
aratëëbhya ibhinyönyi bhonswe igho bheno bhyaaibhurrukanga kighörö igha,
“Muushe,
mwikomani ku-nyangi enene iya Waryobha.
18 Muushe moraaghere ibhihundughu ibhya abhakama,
ibhya abhatangati abha riihë,
ibhya abhantö abha singuru.
Moraaghere sinyama isya sefaraasi na isya abhaghëndya abha sefaraasi siyö.
Moraaghere sinyama isya abhantö bhonswe igho,
abhaghorwa na abhatöönööni,
abha ibhyeo na bhano bhataana ibhyeo.”
19 Mbe,
nkamaaha ughutyënyi ghuyö na abhakama abha ko-kebhara na abhasirikare abhaabho bhaaikomaini hamwë.
Bhaatunanga igha,
bhaitane na uyö yaaikaayë ko-faraasi endabhu hamwë na abhasirikare abhaaye.
20 Kasi ughutyënyi ghuyö hamwë na ömörööti uwaaye uwa obhorongo oora yaaghökörëëyë amakono,
bhaaghëghirwë këghötërëëyë.
Ko amakono aghaaye ghayö,
ömörööti uyö,
yaangʼainirë abhantö bhano bhaarë na ekemanyërryö ikya ughutyënyi ghuyö,
na bhano bhaasengerranga ritöndö iryagho.
Bhonswe igho bhabhërë bhayö,
mbaatabhutirwë bharëngë bhahöru mu-nyansha eno ikwibhugha omorro na ubhurutu ubhwa ikibhiriiti.
21 Abhantö bhano bhaatighaayë,
mbaaitirwë na umushonge ughwa oora yaarenga aikaayë ko-faraasi endabhu.
Umushonge ghuyö,
n-goora ghwaarwanga mu-munywa ughwaye.
Ibhinyönyi bhonswe igho bhekarya sinyama isya ibhihundughu bhiyö,
bhekeeghota.