Ughutyënyi ughwa mbere
13
Mbe,
nkamaaha ughutyënyi ghorarwa mu-nyansha.
Ughutyënyi ghuyö,
ngwaarë na emetwe muhungatë,
na amatera ikömi,
na kera retera,
ndyaarenga na ikirighi ekeke ikya ekekama.
Na kera omotwe,
ngwaarenga ghwaandëkirwë-ko iriina irya okotoka Waryobha.
2 Ughutyënyi ghuyö naarööshë,
ghwaarenga kya ëngwë,
kasi amaghörö aghaagho,
ghaarë kya agha ityënyi eno ekobherekerwa igha idubhu,
na umunywa ughwaryo,
ghwaarë kya ughwa ëndwë.
Ughushoka ghoora,
ghokahaana ughutyënyi singuru isyagho,
ikitumbë ikyagho ikya ekekama,
na ubhwera bhwonswe igho.
3 Omotwe öghömwë ughwa ughutyënyi ghuyö,
ghwaarenga ghoharaghirwë oroghoma urwa nyende.
Kasi oroharagho ruyö,
rokahwena!
Engʼana iyö,
ekaröghöörya abhantö bhonswe igho ko-kebhara,
bhakasoorana ughutyënyi ghuyö.
4 Kora bhakasengerra ughushoka ghuyö,
ko bhoora ghwaahaayë ughutyënyi obhotoro ubhwa okotonga.
Bhakasengerra na ughutyënyi ghoora ghwonswe eno bharaghamba igha,
“Taaho ömöntö kya ughutyënyi ghono hë!
Handë ono akaatora ukwitana nagho.”
5 Mbe,
ughutyënyi ghuyö,
ghokahaanwa obhotoro ubhwa ukwihasha ko amangʼana agha okotoka Waryobha.
Ughutyënyi ghuyö,
ghwaahaaywë ubhwera ubhwa okokora ghayö,
ku-myëri merongo ene na ibhërë.
6 Ughutyënyi ghuyö,
ghokatoka Waryobha,
iriina iryaye na ahasë hano akwikara,
ko bhoora igha,
ghokatoka abhamënyi abha mu-ryobha bhonswe igho.
7 Ughutyënyi ghuyö ghokaikërërribhwa ghokore riihë na abhantö abha Waryobha,
ghobhabhaahe.
Ghokahaanwa na ubhwera ubhwa okotonga abhantö abha amakabhira ghonswe igho,
sihiiri syonswe igho,
ebheghambo bhyonswe igho na ibhyaro bhyonswe igho.
8 Abhantö bhonswe igho abha ko-kebhara kono,
bhano amariina aghaabho ghatandëkirwë mo-ketabho ikya Öbhöhöru,
mbareghosengerra.
Eketabho kiyö,
ni-ikya Omoona Ringʼöndi ono yaanshinshirwë,
nkyaandëkirwë ukurwa okosemoka ukwa ekebhara.
9 Ono aana amatwë,
aitegherre.
10 Ömöntö ono yaaitengʼerwanga igha agheghwe këghötërëëyë,
naregheghwa këghötërëëyë.
Ömöntö ono yaaitengʼerwanga igha aitwe na umushonge,
nariitwa na umushonge.
Ku bhuyö ni-igha abhantö abha Waryobha,
bhaghömërri inyaanyi iyö,
na bhaghëndërri okobha na umukumo.
Ughutyënyi ughwa kabhërë
11 Mbe,
nkamaaha ughutyënyi ughwöndë ghorarwa mu-rirobha.
Ughutyënyi ghuyö,
ngwaarë na amatera amake igho abhërë,
kya agha ekemaanwa ikya ringʼöndi,
kasi engamba iyaaghwo,
yaarë kya iya ughushoka.
12 Ghokakora amangʼana ku ubhwera bhonswe igho ubhwa ughutyënyi ughwa mbere ghoora,
na ko okoghera iya ughwene ghuyö.
Ughutyënyi ughwa kabhërë ghuyö,
ghokasingʼirrya abhantö bhonswe igho abha ko-kebhara,
bhasengerre ughutyënyi ughwa mbere ghoora ghwaarë na oroghoma urwa nyende rono rwaahwënirë.
13 Ughutyënyi ughwa kabhërë ghuyö ghwaakörrë ebhemanyërryö ibhya amakono agha ököröghöörya,
kora ghokaghera omorro ghwike ukurwa mu-ryobha,
ghuushe ko-kebhara,
na eno abhantö bharamaaha bhuuya igho.
14 Ghokangʼaina abhatakumya ko-kebhara okohetera kö ebhemanyërryö ibhya amakono bheno ghwaakörrë ko okoghera iya ughutyënyi ughwa mbere ghoora.
Ghokatëëbhya abhantö igha,
bhakore ritöndö ko okoghera iya okosooka ughutyënyi ughwa mbere ghoora ghwaaharaghirwë oroghoma urwa nyende na umushonge,
kasi ghwiki,
ghokabha öghöhöru.
15 Mbe,
ughutyënyi ghuyö,
ghokahaanwa obhotoro ubhwa okohootera umwika ughwa öbhöhöru mu-ritöndö irya ughutyënyi ughwa mbere ghoora.
Ghwaakörrë igho,
okore ritöndö riyö reghambe na okohamera igha,
bhaitwe bhaara bhonswe igho bhaangirë okoghosengerra.
16 Ughutyënyi ughwa kabhërë ghuyö ghokasingʼirrya abhantö bhonswe igho,
abha ibhyeo na bhano bhataarë na ibhyeo,
abhaamë na abhatöbhu,
abhatöönööni na abhaghorwa,
bhatoorrwe ekemanyërryö ko-kobhoko ukwa bhoryo handë ku-bhusyö.
17 Ku bhuyö ni-igha,
ömöntö taaghore handë ököghörya kyokyonswe keera hë,
hano ataana eharama iya iriina irya ughutyënyi handë risaabhu irya seherufi isya ughutyënyi ghoora.
18 Engʼana eno,
nö-bhöngʼaini ikutuna.
Omongʼaini,
asesore ensonga iya risaabhu irya ughutyënyi ghuyö,
ko bhoora igha,
ni-risaabhu irya kinyabhantö.
Risaabhu irya-ko na-maghana asansabha merongo esansabha na isansabha.