Omoona Ringʼöndi na abhantö abhaaye 144,000
14
Mbe,
hano naarëkëëyë amaiso,
nkamaaha Omoona Ringʼöndi aimërëëyë ku-nguku iya Sayuuni,
hamwë na abhantö eraaki ëmwë ëbhëkwë merongo ene na bhine.
Abhantö bhayö bhaarenga bhandëkirwë iriina irya Omoona Ringʼöndi na irya Suwaabho,
ku-bhusyö.
2 Nkaighwa engamba ukurwa mu-ryobha kya okoherra ukwa amanshë amaaru,
na kya ekebhaghatyö ikirito kya enkobha.
Ghwiki engamba iyö,
yaarë kya abhatëmi abha amatungu abhaaru bhano bhakorengerrania.
3 Abhantö eraaki ëmwë ëbhëkwë merongo ene na bhine bhayö,
bhaarenga bhaimërëëyë mbere iya ikitumbë ikya ekekama keera,
na bhöröngë ubhwa ëbhëntö ibhine bheno bhekoheeshera na mbere iya abhaghaaka merongo ëbhërë na abhane bhaara.
Bhaarëëtyanga rirëëtyö reehya,
na taaho ömöntö uwöndë ono yaatöörrë ukwegha rirëëtyö riyö hë,
kasi na abhantö bhayö bhaarenga bhatunguribhwi ukurwa ko-kebhara abheene igho.
4 Abhantö bhayö,
nkosoorana bharë Omoona Ringʼöndi ahasë hohonswe igho hano akughya.
Tebhaarenga bhainyankuhiri ko okotaara na abhakari,
ku bhuyö,
nsi-ntindë bhaarë.
Bhaatunguriibhwi ukurwa mo-bhantö abhandë,
bhakakorwa ikimwenso ikya obhotongore ku-Waryobha bhaana Omoona Ringʼöndi.
5 Tebhakaaghambirë obhorongo hë,
kora tebhaarë na risoro ryoryonswe igho hë.
Abhamaraika bhatatö bhararaareka engʼana iya Waryobha
6 Mbe,
nkamaaha maraika uwöndë araibhurruka ighörö iyö.
Maraika uyö,
yaarë na Amangʼana Amaiya agha amakora ghonswe igho,
agha ökötëëbhya abhantö bhonswe igho abha ko-kebhara kono,
abha ibhyaro bhyonswe igho,
amakabhira ghonswe igho,
abha ebheghambo bhyonswe igho,
na abha sihiiri syonswe igho.
7 Mbe,
maraika uyö akakonga araghamba igha,
“Mosookenga Waryobha na mömötööni,
ko bhoora enkaagha iyaaye iya okobhotorra abhantö ikiina,
ihikirë.
Mosengerre Waryobha,
we yaabhömbirë mu-ryobha,
rirobha,
inyansha,
na ebheseekaani.”
8 Mbe,
maraika uwöndë uwa kabhërë,
akaroobhera-ko araghamba igha,
“Umughi omonene ughwa Bhaabhëëri,
a ghötëmööywë këmwë!
Umughi ghono ghwaakörrë abhantö bhonswe igho bhakanywa idivai iyaagho ëndörö.
Idivai ëndörö iyö,
no-bhosooraare ubhwagho.”
9 Mbe,
maraika uwöndë uwa katatö,
wonswe akaroobhera ko-bhandë bhaara.
Akaghamba bhököngʼu igha,
“Hano ömöntö araasengerre ughutyënyi ghuyö na ritöndö irya-ko,
na atoorrwe ekemanyërryö ku-bhusyö handë ko-kobhoko,
10 ömöntö uyö wonswe naraanywe idivai iya okorerra ukwa Waryobha.
Idivai iyö,
në-ndörö kya amarwa ghano ghataghörröywë na amanshë.
Waryobha umwene naraamotoorre mo-kekombe ikya okorerra ukwaye anywe.
Ömöntö uyö naraateeswe mo-morro ömörörö kai,
na ubhurutu ubhwa ikibhiriiti,
bhöröngë ubhwa abhamaraika abhahörëëru na bhöröngë ubhwa Omoona Ringʼöndi.
11 Iryöki irya omorro ghuyö ghokobhateesa,
ndiriighundenga ukughya ighörö iyö amakora ghonswe igho.
Abhantö bhayö,
tebharishomerwa röndë hë,
mbokaabha ubhutikö handë omobhasö,
ko bhoora bhaasëngërrëëyë ughutyënyi na ritöndö irya-ko,
bhakatoorrwa ekemanyërryö ikya iriina irya ughutyënyi ghuyö.”
12 Bhoono enkaagha eno,
yo iya ököghömërrya ukwa abhantö abha Waryobha bhano bhakoghoota amaraghërryö agha Waryobha,
na ukukumya Yëësu.
13 Nkaighwa engamba erarwa mu-ryobha,
eraghamba igha,
“Andeka igha,
nyakara abhantö bhano bhakukwa ukurwa bhoono igho na eno bhakumiri Omonene Yëësu.”
Mbe,
Umwika Ömöhörëëru uwa Waryobha akaghamba igha,
“Tigha bhamuunye inyanko iyaabho eno bhaanyoora,
ko bhoora amangʼana aghaabho amaiya ghano bhaakora,
ngarebhasoorana.”
Okogheswa ukwa ekebhara
14 Mbe,
nkarekera-yo amaiso ghwiki,
nkamaaha risaarö rirabhu.
Ku-risaarö kuyö,
yaarenga aikaayë-ko ömöntö kya Omoona uwa Ömöntö.
b Ömöntö uyö,
yaarenga atöörrë ikirighi ikya ekekama ikya esahaabhu ko-motwe ughwaye.
Mo-kobhoko ukwaye,
yaaghöötërrëëyë-mo righasi iryöghë.
15 Ho maraika uwöndë akarwa mu-nyumba iya Waryobha,
akakonga bhököngʼu aratëëbhya oora yaaikaayë ku-risaarö igha,
“Taghoota righasi iryaho oghese,
ko bhoora righesa irya ekebhara rebhaayë,
na enkaagha iya okoghesa ihikirë.”
16 Mbe,
ömöntö oora yaaikaayë ku-risaarö,
akarekera righasi iryaye ko-kebhara,
akaghesa.
17 Ghwiki maraika uwöndë akarwa mu-ryobha iyö,
mu-nyumba iya Waryobha,
na eno aghöötërrëëyë righasi iryöghë.
18 Mbe,
maraika ono akwimererra omorro,
akarwera ku-riighyö irya okosambera-ko ëkörösö.
Maraika uyö akakonga,
akatëëbhya maraika nyaighasi iryöghë uyö igha,
“Taghoota righasi iryaho iryöghë,
otabhore ebhesaghara ibhya sezabhibhu isya ko-kebhara,
ko bhoora sehagho isyako syaatöbhirë.”
19 Mbe,
maraika uyö akarekera righasi iryaye,
akaghesa sezabhibhu isya ko-kebhara,
akasetoora mö-këntö ekenene ikya okometera-mo.
Ëkëntö kiyö këröörökya okorerra ukwa Waryobha.
20 Sezabhibhu sekameterwa mö-këntö kiyö,
kebhara iya umughi omonene.
Sekarwa amaanyinga.
Amaanyinga ghayö,
ghakabha omoghera omotambë.
Obhotambë ubhwagho,
mbwaarë kya sikiromiita amaghana atatö,
na obhotambë ubhwa okosekera,
n-kya imiita ëmwë na ritënë.