Omokari na Ughushoka
12
Mbe,
kekeebhoka ekemanyërryö ikya ököröghöörya bhököngʼu,
ighörö iyö.
Nkamaaha omokari aibhöhiibhwi iryobha,
na eno amaghörö aghaaye,
ghatashirë ku-mwëri.
Ghwiki,
yaarenga atöörrë ikirighi ikya ekekama ko-motwe ughwaye.
Ikirighi kiyö,
kyaarë na sinyota ikömi na ibhërë.
2 Omokari uyö,
ne-nda yaarë,
ekahekera-ho enkaagha aitoorani,
ebhesa bhekamukuurya.
3 Mbe,
ghwiki kekeebhoka ekemanyërryö ikyëndë ikya ököröghöörya ighörö iyö.
Tamaaha!
Ghwaare-ho ughushoka oghonene oghokangaaru.
Ughushoka ghuyö ngwaarë na emetwe muhungatë,
na amatera ikömi,
na kera omotwe ughwaryo ngwaarë na ikirighi ekeke ikya ekekama.
4 Omokera ughwa ughushoka ghuyö,
ghokahorotora ikitweno ikya katatö ikya sinyota ukurwa mu-ryobha ghokaserekera hansë.
Ughushoka ghuyö ghokaimerra mbere iya omokari uyö yaatunanga ukwebhora,
okore hano omoona areebhorwe,
ghomomere.
5 Mbe,
omokari uyö akeebhora omoona uwa ikishaasha.
“Omoona uyö,
naretonga ibhyaro bhyonswe igho na inyimbo iya ekekama iya ikyoma.”
a Omoona uyö,
akasaköribhwa,
akahirwa ku-Waryobha,
ku-kitumbë ikya Waryobha ikya ekekama.
6 Omokari uyö,
akangʼosera ku-riköngö,
ahasë hano waanyöörrë Waryobha yaamösëëmërya-yo igha,
amutughe iyö ku-sinsikö ëkëkwë ëkëmwë amaghana abhërë,
na merongo esansabha.
7 Mbe,
riihë rekeebhoka mu-ryobha iyö.
Mikaëri maraika omonene,
hamwë na abhamaraika abha orobhareka urwaye,
bhakaitana na ughushoka ghuyö,
na abhamaraika abhaagho.
8 Kasi ughushoka na abhamaraika abhaagho bhakakerwa.
Ku bhuyö bhakarughibhwa ukurwa mu-ryobha iyö.
9 Ughushoka oghonene ghuyö,
ghokarekerwa ko-kebhara hamwë na abhamaraika abhaagho.
Ghuyö,
ngwo ughushoka ughwa kare ghoora ghokobherekerwa igha,
Nyangasheka handë igha Oghosambwa.
Ghuyö,
ngo ghwaangʼainirë abhantö bhonswe igho ko-kebhara kono,
okore bhakore ëbhëbhë.
10 Mbe,
nkaighwa engamba ukurwa mu-ryobha eraghamba bhököngʼu igha,
“Bhoono,
Waryobha uwëëtö ahönëri abhantö abhaaye.
Aimërëëyi-ho Obhokama ubhwaye ko obhotoro ubhwaye!
Kiristo wonswe öörökëri ubhwera ubhwaye,
ko bhoora umushöngëri uwa abhakumya bharikyëtö,
ono akobhashongera mbere iya Waryobha ubhutikö na omobhasö,
arëkëëywë hansë.
11 Abhakumya bharikyëtö,
bhaanyöörrë singuru isya okobhaaha Oghosambwa
okohetera ko amaanyinga agha Omoona Ringʼöndi,
na ko okoghera iya ubhwimërërri bhono bhaamwimërërrëëyë,
ko bhoora tebhaatöniibhwi na öbhöhöru ubhwabho hë.
Mbaaikërëëyi ukukwa,
ko okoghera iya ukukumya Omoona Ringʼöndi.
12 Ku bhuyö ni-igha mushomerwe,
bhonswe igho bhano mömënyirë ighörö mu-ryobha!
Kasi haahö,
ekebhara na inyansha,
ko bhoora Oghosambwa ghörëkëëywë kö-bhëënyu iyö
na eno ghörërëëyë bhököngʼu,
ko bhoora ngomanyirë igha,
sinsikö isyagho,
ne-nke sitighaayë.”
13 Hano ughushoka ghuyö ghwaarööshë igha ghörëkëëywë ko-kebhara,
ghokaseeta omokari oora yaarenga aitooraini omoona uwa ikishaasha.
14 Kasi Waryobha yaahaayë omokari uyö amabhabha abhërë,
kya agha öghötöönyi oghonene,
okore aibhurruke aghende ku-riköngö iyö ko okongʼosa ughushoka ghuyö.
Hayö ho ahasë hano araatughwe na okorendwa ku-sinsikö ëkëkwë ëkëmwë amaghana abhërë,
na merongo esansabha,
15 Mbe,
ughushoka ghuyö,
ghokaruusya amanshë amaaru kya omoghera mu-munywa ughwaryo,
okore omokari uyö,
ahete na engera.
16 Kasi rirobha rekatöörrya omokari uyö.
Rirobha rekaasama kya umunywa,
rekamera amanshë ghayö ghonswe igho,
ghano ghaaruurë mu-munywa ughwa ughushoka ghuyö.
17 Ughushoka ghuyö,
ghokarererra bhököngʼu omokari uyö.
Ghokaghya ukwitana na abhaana abha omokari uyö bhano bhaatighaayë.
Abhaana bhayö,
na-bhantö bhano bhakoghoota amaraghërryö agha Waryobha,
na ukwimererra Yëësu.
18 Mbe,
ughushoka ghuyö,
ghokaimerra mbareka iya inyansha.