Maraika na eketabho ekeke
10
Hano ghayö ghaahööyë,
nkamaaha maraika uwöndë uwa obhotoro,
araika ukurwa mu-ryobha.
Maraika uyö,
yaarenga aibhöhiibhwi amasaarö,
na ko-motwe ughwaye,
riitë irya abhaasi ryaarenga riköönyirë-ko.
Ubhusyö ubhwaye,
bhwaamësyamësyanga kya iryobha,
na amaghörö aghaaye ngaarë kya imitimö gheno gheekoka omorro.
2 Yaarenga na eketabho ekeke mo-kobhoko ukwaye,
keno kyaarenga këhönyööywë.
Maraika uyö yaarenga aimërëëyë,
ököghörö ukwa bhoryo,
kotashirë ku-nyansha kighörö,
na ukwa bhömösi,
kotashirë ku-rirobha.
3 Akabherekera,
emberekera iyaaye,
yaarë kya ëndwë eno ikuruma.
Hano maraika uyö yaabhërëkëëyë,
ikirumo kekamohonshora ku ukuruma mara muhungatë.
4 Hano ibhirumo muhungatë bhiyö bhyaarumirë,
nkatuna igha nandeke amangʼana agha ibhirumo bhiyö,
kasi nkaighwa engamba erarwa mu-ryobha eraghamba igha,
“Otakaandeka amangʼana agha ikirumo kiyö!
Kiyö ni-kibhisirë!”
5 Ho maraika uyö naarööshë aimërëëyë atashirë ku-nyansha kighörö na ku-rirobha,
akainyökya okobhoko ukwaye ukwa bhoryo ighörö mu-ryobha.
6 Akatyana iriina irya Waryobha ono aaho amakora ghonswe igho,
ono yaabhömbirë mu-ryobha,
ekebhara,
inyansha na ëbhëntö bhyonswe igho bheno bheemo.
Akaghamba igha,
“Enkaagha iya okoghanyerra ëhööyë.
7 Hano maraika uwa muhungatë araahuute orotera urwaye,
ho Waryobha yakamarërri ësëëmyö iyaaye iya ikibhisirë.
Nkeraahekeranibhwi kya bhoora yaarenga araarëkëëyë abhaköri abha emeremo abhaaye,
abharööti.”
8 Mbe,
engamba eera yaarwërëëyë mu-ryobha,
ekamberekera ghwiki,
ekantëëbhya igha,
“Kaghi ko maraika oora aimërëëyë atashirë ku-rirobha na ku-nyansha kighörö,
ogheghe eketabho ekeke keera kerambööywë mo-kobhoko ukwaye.”
9 Mbe,
nkaghya,
nkamötëëbhya igha angʼaane eketabho ekeke keera,
akantëëbhya igha,
“N-keno hano!
Kegheghe okeraaghere.
‘Nkeraashomerre mu-munywa ughwaho kya öbhöökë,’
a kasi nkeraakokebherre mo-nda.”
10 Nkaghegha eketabho ekeke keera ukurwa mo-kobhoko ukwa maraika uyö,
nkakerya.
Kyaashomerranga mu-munywa ughwane kya öbhöökë,
kasi hano naakëmërrë,
kekankebherra mo-nda.
11 Nkatëëbhibhwa igha,
“Ni-igha ghwiki okore öbhörööti ko amangʼana agha abhantö abhaaru,
ibhyaro ibhyaru,
ebheghambo ibhyaru,
na abhakama abhaaru.”