Maraika uwa kataano arahuuta orotera urwaye
9
Mbe,
maraika uwa kataano oora,
akahuuta orotera urwaye.
Nkamaaha inyota erarwa ku-risaarö ekaghwa ko-kebhara.
Ekahaanwa orofongoro urwa mu-bhwina ubhwa mu-kyaro ikya abhaku.
2 Ekeeghora-ho ubhwina ubhwa mu-kyaro ikya abhaku.
Rekarwa-mo iryöki iryaru,
kya irya öghöbhëri oghonene.
Kora,
ko okoghera iya iryöki riyö,
iryobha na amasaarö bhekaghubhwa tibhyamaahekaini hë.
3 Mbe,
singighë sekarwera mu-ryöki muyö,
sekaroomaana ko-kebhara.
Sekahaanwa obhotoro ubhwa okoroma kya ëbhëtörömööni.
4 Singighë siyö,
sekaraghërribhwa igha,
setakaasarya ubhunyanki handë ëmëtë ghyoghyonswe gheera.
Kasi sinyahaare abhantö bhano bhataarenga na imihuri ighya Waryobha ku-bhusyö.a
5 Singighë siyö,
syaahaaywë obhotoro ubhwa okoteesa abhantö ku-ribhagha irya imyëri etaano igho,
kasi setakaabhaita.
Na öbhörrö ubhwasyo,
mbwaarë kya hano ömöntö yaromwa na ëkëtörömööni.
6 Sinsikö siyö abhantö mbareghambanga igha,
nyakara ukukwa,
kasi tebharikwa hë.
Mbarighombanga ukukwa,
kasi uruku ndorebhangʼosanga.
7 Singighë siyö,
syaarë kya sefaraasi seno syaasëëmiibhwi ukughya ku-riihë.
Ko-metwe ighaasyo,
syaatöörrë ëbhëntö kya ibhirighi ibhya ekekama ibhya esahaabhu,
na ubhusyö ubhwasyo mbwatuubhaini kya ubhusyö ubhwa ömöntö.
8 Nsyaarë na situukya sentambë,
kya isya abhakari.
Syaarë na amaino kya agha ëndwë.
9 Syaarenga sëtöörrë ëbhëntö kya sidirii isya ibhyoma mu-bhikubha.
Hano syaabhurrukanga,
amabhabha aghaasyo ghaaherranga,
kya okoherra ukwa ëmëkökötëëni imyaru ighya sefaraasi seno sekokenya ukughya ku-riihë.
10 Na hano emekera ighyasyo ghëkörömirë,
öbhörrö ubhwako n-kya ubhwa ëkëtörömööni.
Emekera ghiyö,
ghyaarenga na öbhösöngö ubhwa ukunyankya abhantö imyëri etaano.
11 Syaarë na omokama.
Omokama uwaasyo,
we yaarë maraika omonene uwa mu-bhwina ubhwa mu-kyaro ikya abhaku.
Maraika uyö ku-Kiëbhuraania yaabherekerwanga igha,
Abhadoni na ku-Kiyunaani igha,
Aporioni.
Ensonga iyaamo ni-igha,
“Umusikya.”
12 Ikyateko ikya mbere këhööyë,
kasi momanye igha bhekeeho ibhyateko bhibhërë bheno bhikuusha.
Maraika uwa kasansabha arahuuta orotera urwaye
13 Mbe,
maraika uwa kasansabha,
wonswe akahuuta orotera urwaye.
Nkaighwa engamba erarwera ko-matera ane agha riighyö irya esahaabhu reno rërëngë mbere iya Waryobha.
14 Engamba iyö,
ekatëëbhya maraika uwa kasansabha ono yaaghöötërrëëyë orotera urwaye mo-kobhoko,
ekamötëëbhya igha,
“Tashora abhamaraika abhane bhano bhaabhöhirwë ko-mooro omonene ughwa Yufurati.”
15 Abhamaraika abhane bhayö,
bhakatashorwa,
okore bhaite ikitweno ikya katatö ikya abhantö bhonswe igho ko-kebhara.
Bhaarenga bhasëëmiibhwi ko-esa iyöiyö,
iya urusikö ruyöruyö,
urwa umwëri ghuyöghuyö,
ughwa omooka ghuyöghuyö.
16 Ghakaasha amakomo agha abhasirikare ghano ghaarë ko-sefaraasi.
Nkaighwa igha,
ngaarë ekerengere ikya abhasirikare simiriöni amaghana abhërë.
17 Nkamaaha abhantö bhano bhaarë ko-sefaraasi bhaarenga bhatöörrë ëbhëntö kya sidiriib isya omorro mu-bhikubha ibhyabho,
nsyaarë na erangë enkangaaru kaa,
iya ubhurru na iya mayaai.
Nkamaaha emetwe ighya sefaraasi siyö,
ngyaarë kya emetwe ighya sëndwë.
Mu-minywa ighyabho,
syaarwanga-mo sensasë isya omorro,
iryöki na ubhurutu ubhwa ikibhiriiti.
18 Bhakaitwa abhantö ikitweno ikya katatö ikya ku-bhyateko ibhitatö bhiyö.
Ibhyateko ibhitatö bheera n-sensasë isya omorro,
iryöki na ubhurutu ubhwa ikibhiriiti ukurwa mu-minywa ighyasyo.
19 Obhotoro ubhwa sefaraasi seera mbwaarë mu-minywa na ko-mekera.
Ko bhoora emekera ighyasyo ngyaarë kya sinshoka isya emetwe ighya ukunyahaara abhantö.
20 Abhantö bhano bhataakuurë ku-bhyateko bheno bhyanyöörrë bharikyabho,
tebhaahöngööyë obhoghogho ubhwabho hë.
Mbaaghëndërrëëyi okosaasaama amasambwa na ëbhëtöndö,
bheno bhaakörrë abheene ko esahaabhu,
seehera,
sishabha,
amaghena na ëmëtë.
Ëbhëtöndö bhiyö tebhekomaaha hë,
tibhikwighwa hë,
kora tebhekoghenda hë.
21 Tebhaahöngööyë ëbhëbhë ibhyabho ibhya ubhwiti ubhwa abhantö,
öbhöröghi,
kora obhosooraare na ubhwibhi.