Omoona Ringʼöndi aranaanora ubhurimbo//ku-muhuri ughwa muhungatë
8
Mbe,
Omoona Ringʼöndi uyö,
akanaanora ubhurimbo ku-muhuri ughwa muhungatë,
mu-ryobha hakakerrana kiri,
ku-ribhagha irya ritënë irya esa.
2 Ho naamarrë,
nkamaaha abhamaraika muhungatë bhaara bhaaimërëëyë mbere iya Waryobha,
kera ömwë uwaabho akahaanwa orotera.
3 Maraika uwöndë akaasha,
akaimerra mbere iya riighyö.
Yaarenga aghöötërrëëyë ribhaköri irya esahaabhu,
irya okosambera-mo ëkörösö.
Akahaanwa ëkörösö insharu,
okore aghishooghani na amasaasaamo agha abhantö bhonswe igho abha Waryobha,
amare abhiruusi ikimwenso bhyonswe igho ku-riighyö irya esahaabhu reno rërëngë mbere iya ikitumbë ikya ekekama.
4 Iryöki irya ëkörösö hamwë na amasaasaamo agha abhantö abha Waryobha,
bhitiirrë kighörö mbere iya Waryobha,
ukurwa mo-kobhoko ukwa maraika uyö.
5 Mbe,
maraika uyö akaghegha ribhaköri iryaye,
akariishörya amakara agha omorro ukurwa ku-riighyö,
akagharekera ko-kebhara.
Ikirumo ikya enkobha,
kekaruma,
kekabha-ho ëkëmësyö,
ekebhara kekarighita.
Abhamaraika abhane bharahuuta sentera
6 Mbe,
abhamaraika muhungatë bhano bhaarenga na sentera muhungatë,
bhakaisëëmya ukuhuuta sentera isyabho.
7 Maraika uwa mbere,
akahuuta orotera urwaye.
Hayö mbe ho imbura iya righörö,
na omorro ghono ghwishooghaini amaanyinga bhekarekerwa ko-kebhara.
Omorro ghuyö,
ghokasamba ikitweno ikya katatö ikya ekebhara,
ghokasikya ëmëtë na amanyanki orobhaara ruyö.
8 Maraika uwa kabhërë,
akahuuta orotera urwaye.
Hayö ho ëkëntö kenga inguku enene bhököngʼu,
eno ekooka omorro,
kekarekerwa mu-nyansha.
Hano kyaaitëmirë ku-nyansha,
ikitweno ikya katatö ikya inyansha,
kekaisyörya,
kekabha amaanyinga.
9 Ëbhëntö bheno bhyaarë orobhareka ruyö urwa inyansha,
bhekakwa,
na amaato ghonswe igho ghano ghaarë orobhareka ruyö,
ghakasareka.
10 Maraika uwa katatö wonswe akahuuta orotera urwaye.
Mbe,
inyota enene bhököngʼu ekaghwa ukurwa mu-ryobha.
Yaarenga engʼangʼirë kya ëkëmörë,
ekaghwera ikitweno ikya katatö ikya imyoro na ikya ebheseekaani.
11 Inyota iyö yaabherekerwanga igha,
Nyabhörrö.
Ekasyörya ikitweno ikya katatö ikya amanshë,
ghakarora kai.
Mbe,
abhantö bhakakwa abhaaru,
ko bhoora amanshë ghayö,
m-marörö ghaarë.
12 Maraika uwa kane,
wonswe akahuuta orotera urwaye.
Ho orobhaara urwa iryobha na urwa umwëri na urwa sinyota rokatemwa,
kekabha ikisuntë.
Ikitweno ikya katatö ikya omobhasö kekabhorwa obhorabhu ubhwako na ikya ubhutikö kyonswe kekabhorwa obhorabhu.
13 Mbe,
nkamaaha ritöönyi rinene rerabhurruka ighörö.
Ryaakoranga ikituri reraghamba igha,
“Haahö!
Haahö!
Haahö bhëënyu abhamënyi abha ko-kebhara kono,
hano sirihuutwa sentera isatö siyö sitighaayë.
Abhamaraika bhayö,
haangʼë bharë bhahuute sentera siyö!”