Abhantö abha Waryobha bharatoorrwa imihuri
7
Hano ghayö ghaahööyë,
nkamaaha abhamaraika abhane,
kera ömwë aimërëëyë ko-robhareka örömwë urwa sembaara inye seera isya ekebhara.
Abhamaraika bhayö bhaarebherranga rikama ukurwa sembaara syonswe igho inye isya ekebhara,
okore rikama retakaaherra ukuusha ko-kebhara handë ukughya ku-nyansha handë ukusingisya ömötë ghwoghwonswe ghoora.
2 Abhamaraika bhayö,
bhaarenga bhahaaywë obhotoro ubhwa okosarya ikyaro na inyansha.
Mbe,
nkamaaha maraika uwöndë aratiira ighörö ukurwa röghörö,
aghëghirë umuhuri ughwa Waryobha ömöhöru.
Akakongera abhamaraika abhane bhaara
3 araghamba igha,
“Moghanye!
Motakaasarya ikyaro,
inyansha handë ëmëtë,
moghanye okohekera hano toremara okotoora imihuri ku-bhusyö ubhwa kera ömököri uwa emeremo uwa Waryobha uwëëtö.”
4 Mbe,
nkatëëbhibhwa ekerengere ikya abhantö bhano bhaarenga bhatöörëëywë imihuri ighya Waryobha ku-bhusyö.
Bhaarenga abhantö eraaki ëmwë,
ëbhëkwë merongo ene na bhine (144,000),
ukurwa mo-bhesaku bhyonswe igho ikömi na bhibhërë ibhya Abhaisiraëri.
5 Ukurwa mo-kesaku ikya Yuuda,
abhantö ëbhëkwë ikömi na bhibhërë,
ikya Ruubhëëni abhantö ëbhëkwë ikömi na bhibhërë,
ikya Ghaadi abhantö ëbhëkwë ikömi na bhibhërë.
6 Ekesaku ikya Asheeri abhantö ëbhëkwë ikömi na bhibhërë,
ikya Nafutaari abhantö ëbhëkwë ikömi na bhibhërë,
ikya Manase abhantö ëbhëkwë ikömi na bhibhërë.
7 Ekesaku ikya Simeoni abhantö ëbhëkwë ikömi na bhibhërë,
ikya Raawi abhantö ëbhëkwë ikömi na bhibhërë,
ikya Isakaari abhantö ëbhëkwë ikömi na bhibhërë.
8 Ikya Zabhurööni abhantö ëbhëkwë ikömi na bhibhërë,
ikya Yusufu abhantö ëbhëkwë ikömi na bhibhërë,
na ikya Bhenjamini abhantö ëbhëkwë ikömi na bhibhërë.
Rikomo rinene irya abhantö abha amakabhira aghandë
9 Hano ghayö ghaahööyë,
nkamaaha rikomo rinene irya abhantö bhano otaatore okobhara.
Abhantö bhayö,
bhaarë abha ibhyaro bhyonswe igho,
abha amakabhira ghonswe igho,
abha sihiiri na abha ebheghambo bhyonswe igho.
Bhaimërëëyë mbere iya ikitumbë ikya ekekama na mbere iya Omoona Ringʼöndi.
Bhaatöörrë sengansho sendabhu kora bhaarenga na amasagharya agha emetende mo-mabhoko aghaabho,
ukwörökya igha bhashömëëywë.
10 Bhaakonganga bhököngʼu bharaghamba igha,
“Öbhöhönia nku-Waryobha uwëëtö
ono aikaayë ku-kitumbë ikya ekekama bhukurwa,
na ko Omoona Ringʼöndi.”
11 Abhamaraika bhonswe igho bhayö,
bhaarenga bhaimërëëyë bhainaarrë ikitumbë ikya ekekama,
abhaghaaka bhaara na ëbhëntö ibhine bheera bhekoheeshera.
Bhakaighwësya hansë bhubhuumaayë mbere iya ikitumbë ikya ekekama kiyö,
bharasaasaama Waryobha,
12 bharaghamba igha,
“Amina!
Waryobha uwëëtö aana ubhuhika,
na obhongʼaini,
naana singuru na obhotoro bhwonswe igho,
tumukumi
na okomosooka
amakora na amakora.
Amina!”
13 Mbe,
ömwë mo-bhaghaaka bhaara,
akamböörya igha,
“Kasi,
okaamanya abhantö bhayö bhatöörrë sengansho sendabhu m-baabho wë?
Omanyirë hano bharwërëëyë?”
14 Nkamohonshora igha,
“Omonene,
uwe nu-uwe omanyirë.”
Akantëëbhya igha,
“Abhantö bhayö,
m-baara bhaaghömërrëëyi inyanko enene eera.
Bhaafura sengansho isyabho ko amaanyinga agha Omoona Ringʼöndi,
sekarabha shaa.
15 Nkyo kekoghera bharëngë mbere iya ikitumbë ikya ekekama ikya Waryobha,
bharasaasaama ubhutikö na omobhasö mu-nyumba iya Waryobha.
Waryobha ono akwikara ku-kitumbë ikya ekekama,
naraabhe hamwë nabho,
abharende.
16 Tebharebha na inshara handë inyonta ghwiki hë.
Kora tebharebharrwa omobhasö ghwiki hë,
handë ukunyahaarwa na orooha rworwonswe roora.
17 Ko bhoora Omoona Ringʼöndi ono arëngë haangʼë na ikitumbë ikya ekekama,
narebha omokaraabhërri uwaabho.
Narebhatangata ukughya mo-seseeka isya amanshë agha öbhöhöru,
na Waryobha narebheeya amaisöri.”