Omoona Ringʼöndi aranaanora ubhurimbo ku-mihuri muhungatë
6
Mbe,
nkamaaha Omoona Ringʼöndi uyö,
aranaanora ubhurimbo ku-muhuri ughwa mbere,
mu-mihuri muhungatë gheera.
Nkaighwa ëkëmwë ikya ibhine bheera bhekoheeshera,
kerabhaghatya kya enkobha,
kekaghamba igha,
“Nshö!”
2 Mbe,
nkamaaha efaraasi endabhu na ömöntö aikaayë-ko.
Ömöntö uyö,
yaarenga aghöötërrëëyë obhota,
kora okanyoora ahaaywë ikirighi ikya ekekama.
Akarwa mu-ryobha abhaahirë,
okore aghëndërri okobhaaha.
3 Mbe,
Omoona Ringʼöndi uyö,
akanaanora ubhurimbo ku-muhuri ughwa kabhërë.
Nkaighwa ëkëntö ikya kabhërë keera kekoheeshera keraghamba igha,
“Nshö!”
4 Mbe,
ekatora efaraasi iyëndë enkangaaru.
Na ömöntö ono yaaikaayë-ko araghëghëndya,
akahaanwa umushonge omonene na obhotoro ubhwa okoreeta riihë ko-kebhara,
okore kera ömöntö aite murikyaye.
5 Mbe,
Omoona Ringʼöndi,
akanaanora ubhurimbo ku-muhuri ughwa katatö,
nkaighwa ëkëntö ikya katatö keera kekoheeshera keraghamba igha,
“Nshö!”
Nkarekera-yo amaiso,
nkamaaha efaraasi imwamu.
Ömöntö ono yaaikaayë-ko araghëghëndya yaarenga na ebherengero bhibhërë mo-kobhoko ukwaye.
6 Nkaighwa ëkëntö kya engamba,
erarwera ghatëghatë iya ëbhëntö ibhine bheera bhekoheeshera,
eraghamba igha,
“Ehoorohooro iya urusikö urughima,
neraaghore rikopo irya engano reno rekoreengʼaana na ikiiro ëmwë igho,
handë rikopo rinene irya ishairia reno rekoreengʼaana na sikiiro isatö isyene igho.
Kasi otakaasarya amaghuta,
handë idivai.”b
7 Mbe,
Omoona Ringʼöndi akanaanora ubhurimbo ku-muhuri ughwa kane,
nkaighwa ëkëntö ikya kane keera kekoheeshera keraghamba igha,
“Nshö!”
8 Mbe,
nkarekera-yo amaiso,
nkamaaha efaraasi iya erangë endabhöku.
Na ömöntö ono yaaikaayë-ko araghëghëndya yaabherekerwanga igha,
Uruku,
ono yaaghendanianga hamwë na ikyaro ikya abhaku.
Bhonswe igho bhakahaanwa ubhwera ubhwa ukwita ritabhë irya kane irya abhantö ko-kebhara,
ku-riihë,
inshara,
amarööyë na ku sityënyi sëmbë isya mwi-sisi.
9 Mbe,
Omoona Ringʼöndi akanaanora ubhurimbo ku-muhuri ughwa kataano,
nkamaaha senkoro isya abhantö mö-ngönköörë iya riighyö.
Abhantö bhayö mbaaitirwë,
ko bhoora bhaakumiri na ukwimererra engʼana iya Waryobha.
10 Mbe,
imiika ghiyö ghekakora ikituri gheraghamba igha,
“Ë Omonene Waryobha ömötöngi uwa bhyonswe igho,
ono örëngë Ömöhörëëru na uwa heene,
n-kwakë okotegheta?
N-dööhë orebhotorra ikiina abhantö abha ko-kebhara na okomara ikisiiyomba ikya ukutwita?”
11 Mbe,
bhonswe igho bhayö bhaaitirwë,
bhakahaanwa sengansho sendabhu.
Bhakatëëbhibhwa igha,
bhaghanye hake igho okohekera hano abhakumya bharikyabho,
abhaköri abha emeremo bharikyabho,
bhaitwe kya bho,
okore ekerengere ikyabho kehekerane.
12 Mbe,
nkamaaha Omoona Ringʼöndi aranaanora ubhurimbo ku-muhuri ughwa kasansabha ghoora.
Hano yaanaanööyë-ko,
ikirighiti ekenene bhököngʼu kekeebhoka.
Iryobha rekaisyörya erangë,
rekamwama twi kya amakara,
umwëri ghokakangaara bhököngʼu kya amaanyinga.
13 Sinyota sekaghwa ko-kebhara bhoghoghoghogho igho,
okanya igha n-sehagho sendere seharatökirë ukurwa kö-mötë hano ghwasingisibhwa na rikama rirörö.
14 Ighörö iyö,
hakaihëënia kya ekarataasi,
kya hano ömöntö yaaringa risenke.
Singuku na amaghinga bhyonswe igho bhekaruusibhwa-ho.
15 Ho abhakama abha ko-kebhara,
abhatöngi,
abhatangati abha riihë,
abhaamë,
abhantö abha ibhyeo,
hamwë na abhantö bhonswe igho,
mbakaabha abhaghorwa handë abhatöönööni,
bhonswe igho bhayö,
bhakaibhisa mo-masana na mo-marengo agha mu-singuku.
16 Bhakatëëbhya singuku siyö na amarengo ghayö igha,
“Mutughwere!
Mutubhise,
okore oora ikaayë ku-kitumbë ikya ekekama,
atakaatörëghërrya.
Mutubhise,
totakaasha okomaaha amangʼana ghayö agha okorerra ukwa Omoona Ringʼöndi.
17 Ko bhoora urusikö oronene urwa okorerra okonene ukurwa ku-Waryobha na Omoona Ringʼöndi,
ruhikirë!
M-maheene,
taaho ömöntö wowonswe ono akotora ököghömërrya hë.”