Omoona Ringʼöndi na eketabho
5
Mbe,
nkamaaha eketabho mo-kobhoko ukwa bhoryo ukwa oora yaaikaayë ku-kitumbë ikya ekekama.
Eketabho kiyö kyaarenga kyaandëkirwë sembaara syonswe igho ibhërë,
ghwiki kyaarenga kenantërrëëywë imihuri muhungatë ighya ubhurimbo.
2 Ghwiki nkamaaha maraika uwa obhotoro araraareka bhököngʼu,
akabhöörya igha,
“Nawë aingʼarëëyi okonaanora imihuri ghiyö,
akondokore eketabho keno?”
3 Kasi tiyatöökirë-ho ömöntö kora ömwë mu-ryobha iyö,
handë ko-kebhara,
kora mu-kyaro ikya abhaku ono yaingʼarëëyë okokehonyora akesome.
4 Mbe,
nkasimya ukukuura bhököngʼu ko bhoora tiyaatöökirë ömöntö wowonswe igho,
ono yaaingʼarëëyi okokondokora handë okosoma eketabho kiyö.
5 Ho ömwë uwa abhaghaaka bhaara akantëëbhya igha,
“Otakaakuura!
Maaha!
Ëndwë iya Ekesaku ikya Yuuda,
a umwebhorwa uwa omokama Daudi,
akërrë.
Aingʼarëëyi okonaanora ubhurimbo ku-mihuri muhungatë ko-ketabho kiyö na okokehonyora.”
6 Mbe,
nkamaaha ghatëghatë haara haarenga na ikitumbë ikya ekekama,
Omoona Ringʼöndib aimërëëyë.
Yaarenga ainaarwë na ëbhëntö ibhine bheera na abhaghaaka merongo ëbhërë na abhane bhaara.
Hano wamaaha Omoona Ringʼöndi uyö,
yaarenga kya ono ashinshirwë.
Yaarenga na amatera muhungatë na amaiso muhungatë.
Amaiso ghayö,
ni-Miika muhungatë abha Waryobha bhano bhaarenga bhatömirwë kera ahasë ko-kebhara kyonswe igho.
7 Omoona Ringʼöndi uyö akaghya,
akaghegha eketabho kiyö,
ukurwa mo-kobhoko ukwa bhoryo ukwa ono yaarenga aikaayë ku-kitumbë ikya ekekama.
8 Hano yaamarrë okoghegha eketabho kiyö,
ëbhëntö ibhine bhiyö bhekoheeshera na abhaghaaka merongo ëbhërë na abhane bhaara,
bhakaghwa bhubhuumaayë bhöröngë ubhwa Omoona Ringʼöndi.
Kera ömwë uwaabho yaarenga na ritungu na amabhaköri agha esahaabhu ghaishööyë ëkörösö.
Ëkörösö iyö yo amasabhi agha abhantö abha Waryobha.
9 Bhakarëëtërya Omoona Ringʼöndi rirëëtyö reehya igha,
“Uwe wingʼarëëyi okoghegha eketabho kiyö
na okonaanora-ko ubhurimbo ubhwa ku-mihuri ighya-ko,
ko bhoora uwe waashinshirwë.
Okaghorra Waryobha ko amaanyinga aghaaho,
abhantö abha amakabhira ghonswe igho,
ebheghambo bhyonswe igho,
sihiiri syonswe igho na ibhyaro bhyonswe igho.
10 Uwe waakörrë abhantö bhano bhabhe abha Obhokama ubhwa Waryobha uwëëtö,
bhabhe abhasëngëri abha okomokorra emeremo,
mbaraatonge ekebhara keno.”
11 Mbe,
nkaighwa na nkamaaha abhamaraika abhaaru,
ëbhëkwë na ëbhëkwë,
kora tootore okobhabhara hë.
Abhamaraika bhayö bhaarenga bhainaarrë ikitumbë ikya ekekama keera,
ëbhëntö ibhine bheno bhekoheeshera bheera na abhaghaaka bhaara.
12 Nkabhaitegherra bhararëëtya bhököngʼu igha,
“Omoona Ringʼöndi ono yaashinshwa,
aingʼarëëyi okohaanwa obhotoro,
ubhwamë na obhongʼaini.
Singuru,
okosookwa,
ubhuhika na sinkuma ni-bhyaye!”
13 Mbe,
nkaighwa ëbhëntö bhyonswe igho mu-ryobha iyö,
ko-kebhara,
mu-kyaro ikya abhaku na mu-nyansha bherarëëtya kwa korengerrania igha,
“Uyö aikaayë ku-kitumbë ikya ekekama,
na Omoona Ringʼöndi uyö,
bhakumibhwi,
bhasookwe,
bhahaanwe ubhuhika na obhotoro amakora na amakora!”
14 Na ëbhëntö ibhine bheno bhekoheeshera bheera,
bhekaikërrya bharaghamba igha,
“Amina!”
Abhaghaaka bhaara bhakaghwa hansë bhubhuumaayë,
bhakasaasaama Waryobha na Omoona Ringʼöndi.