Ritashandighi ko-bhantö abha ekanisa iya Saridi
3
Mbe,
ömöntö uyö arëngë kya m-Moona uwa Ömöntö akaghëndërrya okoghamba igha,
“Andekera maraika uwa ekanisa iya Saridi,
ömötëëbhi igha,
Öni nö-öni nkotongera Imiika muhungatë abha Waryobha,
na nö-öni neena sinyota muhungatë seera.
Mwitegherre ghano nkobhatëëbhya!
Nemanyirë amangʼana aghëënyu ghonswe igho,
monga kya abhahöru,
kasi mwamara ukukwa.
2 Mobhooke!
Motogheke amangʼana amaiya amake ghayö ghakeeho,
ko bhoora kora ghonswe n-haangʼë gharë ghakwe.
Ndööshë igha,
amangʼana aghëënyu teghanga kya bhono Waryobha uwaane akutuna hë.
3 Muhiite ghano mwëëghiibhwi,
moghakumi na moghanaghi.
Mbe,
mogharöndërri bhuuya,
kora mohongore ëbhëbhë ibhyënyu.
Hano motaabhe maiso,
nindiisha kya umwibhi,
kora temoremanya enkaagha eno ndiisha hë.
4 Kasi bhaaho abhasoorani abhake igho Saridi hayö,
bhano bhataraakönia singibho isyabho ko okokora ëbhëbhë.
Mbe,
mbarebha hamwë na öni,
bhaibhöhiibhwi singibho sendabhu,
ko bhoora abhantö bhayö,
mbaingʼarëëyë okokorrwa ghayö.
5 Ömöntö wowonswe ono arekera amangʼana ghayö,
nindimwibhöhya singibho sendabhu kya bhayö.
Tindiruusya iriina iryaye mo-Ketabho ikya Öbhöhöru.
a Kasi nindimwikërrya mbere iya Taata Waryobha na abhamaraika abhaaye igha,
ono nu-uwaane.
6 Ono aana amatwë,
aitegherre amangʼana ghano Umwika Ömöhörëëru akötëëbhya amakanisa. ”
Ritashandighi ko-bhantö abha ekanisa iya Firadërifia
7 Mbe,
ömöntö uyö anga kya Omoona uwa Ömöntö,
akaghëndërrya okoghamba igha,
“Andekera maraika uwa ekanisa iya Firadërifia,
ömötëëbhi igha,
Öni m-Möhörëëru ndë uwa obhoheene,
ghwiki nö-öni neena orofongoro urwa omokama Daudi.
b
Hano nsiikirë ekesaku,
taaho ömöntö ono araatore ukukyeghora hë.
Hano nighööyë ekesaku,
taaho ömöntö ono araatore ukukisiika.c
Mwitegherre ghano nkobhatëëbhya!
8 Nemanyirë amangʼana aghëënyu ghonswe igho.
Motamaaha!
Öni nabheeghorra-ho ekesaku,
kasi taaho ömöntö ono akotora ukukisiika.
Nokaanyoora singuru isyënyu ne-nke,
kasi mwaikërrya amëëghyö aghaane,
kora temwanyangirë hë.
9 Motamaaha!
Nendaakohaane abhasoorani abha inyumba iya esango iya Oghosambwa,
bhano bhakwibherekera igha m-Bayahudi nabho te-Bhayahudi hë,
kora m-barongo.
Mbe,
nendaabhakore bhaashe bhabhatemere hansë ibhiru.
Ho bhayö bhonswe igho bhareemanya igha,
öni nembahanshirë.
10 Enkaagha iya inyanko niriisha ko-kebhara kyonswe igho,
na abhantö bhonswe igho mbarishaashwa.
Kasi bhëënyu,
nendebharenda ko-nkaagha iyö,
ko bhoora mwaaghömërrya inyaanyi kya bhoora naabharaghërrëëyi.
11 M-böngö ndaashe!
Monaghi bhuuya amangʼana amaiya ghayö moonagho,
okore ömöntö atakaabharuusya ibhirighi ibhyënyu ibhya obhobhaahi.
12 Ömöntö wowonswe ono arekera amangʼana ghayö,
nendemokora abhe umutimö ughwa Inyumba iya Waryobhad uwaane,
na tarirwa-mo röndë hë.
Kora nindimwandeka iriina irya Waryobha na iriina irya umughi ughwa Waryobha.
Umughi ghuyö ngo Yërusarëëmu omohya,
ghono ghuriika ukurwa mu-ryobha ku-Waryobha.
Kora nindimwandeka iriina iryane reehya.
13 Ono aana amatwë,
aitegherre amangʼana ghano Umwika Ömöhörëëru akötëëbhya amakanisa. ”
Ritashandighi ko-bhantö abha ekanisa iya Raodikia
14 Mbe,
ömöntö uyö anga kya Omoona uwa Ömöntö,
akaghëndërrya okoghamba igha,
“Andekera maraika uwa ekanisa iya Raodikia,
ömötëëbhi igha,
Öni nö-öni nkobherekerwa igha,
Amina,
umwimërërri uwa heene.
Nö-öni ömösëmöri uwa ëbhëntö bhyonswe igho bheno bhyaabhombwa na Waryobha.
Mwitegherre ghano nkobhatëëbhya!
15 Öni nemanyirë amangʼana aghëënyu ghano mokokora.
Nemanyirë igha,
m-bahyöku mörë.
Nyakara mokaabhaayë omorro handë ekemeesha!
16 Kasi ko bhono mörëngë abhahyöku,
temoona omorro handë ekemeesha hë,
nendaabhahongore murwe mu-munywa ughwane.
17 Moraghamba igha,
‘M-baamë törë.
Twaniibha bhököngʼu.
Ëbhëntö bhyonswe igho ntoonabhyo,
tetokobhorwa ëkëntö hë!’
Kasi temomanyirë igha m-batëntëëru mörë,
m-bakwabherwa mörë,
öbhötöbhu na ubhuhukuru nu-bhwënyu,
kora n-kengʼaabhi mörë.
18 Ku bhuyö nkobharaghërrya ndë igha,
moghore ku-öni esahaabhu eno yaghuutwa mo-morro,
okore mwamehe.
Ghwiki moghore singibho sendabhu,
okore mubhisi ekengʼaabhi ikyënyu motakaashe mosooke.
Moghore iryogho irya okohaka mo-maiso,
okore momaahe.
19 Nkokaania ndë na ukuhiinya bhano nhanshirë.
Mbe,
mokore omotono ughwa okohongora ëbhëbhë ibhyënyu.
20 Motamaaha!
Mo-kesaku ndë nimërëëyë ndabherekera.
Ömöntö ono araaighwe engamba iyaane na anyeghorre-ho ekesaku,
nendaasohe mu-nyumba iyaaye,
nsange nawe ibhyakorya.
21 Ömöntö wowonswe ono arekera amangʼana ghayö,
nindimwikërrya aikare hamwë na öni ku-kitumbë ikyane ikya ekekama,
kya bhono öni wonswe naakërrë,
nkaikara na Taata ku-kitumbë ikyaye ikya ekekama.
22 Ono aana amatwë,
aitegherre amangʼana ghano Umwika Ömöhörëëru akötëëbhya amakanisa. ”