Ritashandighi ko abhantö abha ekanisa iya Ëfësö
2
Ömöntö uyö arëngë kya m-Moona uwa Ömöntö akaghëndërrya ököntëëbhya igha,
“Andekera maraika uwa ekanisa iya Ëfësö,
ömötëëbhi igha,
Ghano ngo nkoghamba öni ono ngötërrëëyë sinyota muhungatë mo-kobhoko ukwane ukwa bhoryo.
Öni nö-öni nkoghenda ghatëghatë iya ebhetangora muhungatë ibhya esahaabhu bheera ibhya okotoora-ko setara.
Mwitegherre ghano nkobhatëëbhya.
2 Nemanyirë amangʼana aghëënyu ghano mokokora,
na omotono ughwënyu,
na ököghömërrya ukwënyu.
Kora timukwikererrania na abhantö abhaghogho,
ko bhoora mwaashaashiri bhaara bhakwibherekera igha m-batomwa,
mokamaaha igha,
te-bhatomwa hë,
m-barongo.
3 Kora nemanyirë igha,
mworeka bhököngʼu na amangʼana aghaane,
kasi mwaaghömërrya nanyabhoono temoraarosa hë.
Mwitegherre ghano nkobhatëëbhya!
4 Kasi moona engʼana eno ikunnyankya.
Ni-igha,
mwatigha righonshe iryënyu reno mwaarë naryo ekembere.
5 Muhiite ghano mwaakoranga haara mwaankumiri.
Mohongore ëbhëbhë ibhyënyu,
mokore kya ghaara mwaakörrë ko-nkaagha eera.
Hano motaahongore ëbhëbhë ibhyënyu,
nindiisha nduusi-ho eketangora ikyënyu ikya okotoora-ko setara.
6 Kasi eeho engʼana eno mokokora bhuuya.
Mwaregha amangʼana amaghogho ghano Abhanikoraia bhakokora.
Ghayö ngo kora öni wonswe nkoregha bhököngʼu.
7 Ono aana amatwë,
aitegherre amangʼana ghano Umwika Ömöhörëëru akötëëbhya amakanisa.
Ömöntö wowonswe ono arekera amangʼana ghayö na aghömërri righonshe irya mbere reera,
nindimwikërrya araaghere sehagho isya ömötë ghono ghokohaana abhantö öbhöhöru.
Ömötë ghuyö,
mu-ryobha iyö ghörë mu-bhusitaani iya Waryobha.”b
Ritashandighi ko abhantö abha ekanisa iya Simirina
8 Ömöntö uyö akaghëndërrya okoghamba igha,
“Andekera maraika uwa ekanisa iya Simirina,
ömötëëbhi igha,
Öni nö-öni uwa mbere na nö-öni embotorra.
Naakuurë,
nkaryoka,
na bhoono igho m-möhöru ndë!
Mwitegherre ghano nkobhatëëbhya!
9 Nemanyirë inyanko iyëënyu,
na öbhötöbhu ubhwënyu.
Kasi obhoheene,
bhëënyu m-baamë mörë!
Kora nemanyirë kya bhono bhakobhatoka bhayö bhakwibherekera igha m-Bayahudi,
kasi te-bho hë.
Bhayö na-bhasoorani abha Oghosambwa.c
10 Motakoobhoha inyanko iyö murinyoora.
Motamaaha!
Oghosambwa ngorebhashaashya,
kora ghotoore bharikyënyu mo-kebhohe,
na bhëënyu murinyankibhwa sinsikö ikömi.
Kasi mobhe abhantö abha heene ku-öni,
nokaanyoora igha nkukwa,
mukwe.
Ko bhoora öni,
nendebhatuha ibhirighi ibhya öbhöhöru ubhwa amakora ghonswe igho.
11 Ono aana amatwë,
aitegherre amangʼana ghano Umwika Ömöhörëëru akötëëbhya amakanisa.
Ömöntö wowonswe ono arekera amangʼana ghayö,
tarikunibhwa na omorro ughwa amakora ghonswe igho kora hake hë.
Omorro ghuyö,
ngwo uruku urwa kabhërë.”d
Ritashandighi ko abhantö abha ekanisa iya Perighamo
12 Ömöntö uyö akaghëndërrya okoghamba igha,
“Andekera maraika uwa ekanisa iya Perighamo,
ömötëëbhi igha,
Neena umushonge umwöghë nyambagha ibhërë.
Mwitegherre ghano nkobhatëëbhya!
13 Öni nemanyirë ahasë hayö mömënyirë,
hayö,
ho Oghosambwa ghokotonga.
Nokaanyoora ni-igho amangʼana gharë,
kasi nkunkumya mökërë.
Kora enkaagha eno umwimërërri uwaane uwa heene Antipa yaaitirwë mu-mughi ughwënyu muyö Oghosambwa ghömënyirë,
temwanyikaanirë hë.
Antipa uyö,
nu-mwimërërri uwaane uwa heene yaarë.
14 Kasi amangʼana gharëngë kö-bhëënyu amake igho,
ghano ghakunnyankya.
Bhaaho abhantö bhano bhakosoorana amëëghyö agha Bharaamu,
mö-bhëënyu muyö.
Bharaamu uyö,
yëëghëri Bharaaki okotegha Abhaisiraëri,
okore bhakore ëbhëbhë ibhya okorya ibhyakorya bheno bhimwënsëywë ëbhëtöndö,
na okokora obhosooraare.e
15 Ghwiki abhandë ni-ighoigho bhakokora ko okosoorana amëëghyö amaghogho agha Abhanikorai.
16 Mbe,
mohongore ëbhëbhë ibhyënyu!
Hano moraange okobhehongora,
m-böngöbhöngö ndaashe na umushonge,
ghono ghukurwa mu-munywa ughwane,
okore nkore riihë na abhantö bhayö.
17 Ono aana amatwë,
aitegherre amangʼana ghano Umwika Ömöhörëëru akötëëbhya amakanisa.
Ömöntö wowonswe ono arekera amangʼana ghayö,
ndimutuha ituho ekerengere ikya ibhyakorya ibhya emanaf eno yaabhiswa.
Ghwiki nendemohaana reghena rirabhu.
Reghena riyö,
nurinyoora ryandëkirwë-ko iriina reehya.
Taaho ömöntö ono aremanya iriina riyö hë.
Kasi ono arehaanwa reghena riyö,
we aremanya.”
Ritashandighi ko abhantö abha ekanisa iya Tiyatira
18 Ömöntö uyö akaghëndërrya okoghamba igha,
“Andekera maraika uwa ekanisa iya Tiyatira,
ömötëëbhi igha,
Öni nö-öni Omoona uwa Waryobha.
g Neena amaiso kya ëbhëmörë ibhya omorro,
na amaghörö agha okomekameka kya ishabha eno yaaghuutwa mo-morro.
Mwitegherre ghano nkobhatëëbhya!
19 Nemanyirë righonshe iryënyu,
amangʼana ghano mokokora,
umukumo ughwënyu,
öbhököri ubhwënyu ubhwa emeremo,
na ököghömërrya ukwënyu.
Ghwiki nkomaaha ndë igha,
bhoono,
m-buuya mokokora,
ko bhoora möhëtërëëyë ghaara mwaakoranga kare.
20 Kasi moona engʼana eno ikunnyankya.
Bhëënyu nkwikererrania mörë na amangʼana agha omokari oora Yëzëbhëëri.
Uyö akwibherekera igha m-mörööti,
kasi të-mörööti hë.
Nkwikërrya mörë igha angʼaine abhaköri abha emeremo abhaane,
ko ököbhëëghya bhakore obhosooraare,
na okorya ibhyakorya bheno bhimwënsëywë ëbhëtöndö.
21 Öni namohaana umweya,
okore ahongore ëbhëbhë ibhyaye,
kasi takutuna ukutigha obhosooraare ubhwaye hë.
22 Motamaaha!
Ku ikibhuno kiyö,
nendaamohaane inyanko iya öbhörööyë bhono bhoraaghire ange ukurwa kö-bhörrë.
Na abhantö bhonswe igho bhano bhakokora nawe obhosooraare,
nendaabhanyanki bhököngʼu,
hano bhatahöngööyë amangʼana aghaabho amaghogho.
23 Ghwiki obhoheene ni-igha,
nendaaite abhasoorani abhaaye.
Hayö ho abhantö abha ekanisa bhareemanya igha,
öni nkwitaaha ndë enkoro na amaitegherro agha ömöntö.
Nendehaka kera ömöntö mö-bhëënyu,
ko okorengʼaana na ghano yaakora.
24 Kasi bhaaho abhantö abhandë abha heene mö-bhëënyu Tiyatira hayö.
Abhantö bhayö tebhakosoorana amëëghyö agha Yëzëbhëëri hë,
kora tebhamanyirë ëbhëntö bhiyö abhandë bhakoghamba igha ni-bhibhisirë ibhya mönsë.
Kasi obhoheene ni-igha,
ibhibhisirë bhiyö,
na-mëëghyö agha Oghosambwa.
Bhëënyu keno nkobhatëëbhya ni-igha,
tëmbëngëri umurigho ughwöndë hë,
25 kasi moghoterre bhuuya amaiya ghayö moonagho,
okohekera hano ndiisha.
26 Ömöntö wowonswe ono arekera amangʼana ghayö na aghëndërri okokora bhono nkutuna okohekera umuhiko,
“Nendemohaane ubhwera ubhwa okotonga ibhyaro bhyonswe igho.
27 Areetonga kö öbhöbhë ko okobhatemera inyimbo iya ikyoma,
narebhabhondora kya sinyöngö.”
h
Narehaanwa ubhwera kya bhoora öni naahaaywë na Taata.
28 Ömöntö wowonswe ono arekera inyanko iyö,
nendemohaana inyota iya nyinkyo.i
29 Ono aana amatwë,
aitegherre amangʼana ghano Umwika Ömöhörëëru akötëëbhya amakanisa. ”