Okohonyora ukwa Yohana
Yohana arashumaashera amangʼana agha eketabho keno
1
Kono no-kohonyora ukwa Yëësu Kiristo.
Waryobha yaahaayë Yëësu Kiristo okore ööröki abhaköri abha emeremo abhaaye amangʼana ghano heene ghakaangöhirë ukwikora.
Yëësu wonswe akatëëbhya maraika uwaaye ahonyorre Yohana,
ömököri uwaaye uwa emeremo.
2 Yohana akaimererra amangʼana ghonswe igho ghano yaarööshë.
Amangʼana ghayö yaarööshë,
na-agha obhoheene bhono bhwahönyööywë na Yëësu Kiristo.
Obhoheene bhuyö,
mbo engʼana iya Waryobha.
3 Nyakara abhantö bhonswe igho bhano bhakosomera bharikyabho amangʼana ghayö,
agha öbhörööti.
Nyakara bhano bhakwitegherra na ököröndërrya ghano ghandëkirwë muyö,
ko bhoora enkaagha iya ukwebhoka kwagho,
haangʼë ërë.
Amakëërërryö
4 Öni Yohana,
ritashandighi reno,
m-bëënyu nkwandekera abhasoorani abha Yëësu abha amakanisa muhungatë ghano gharëngë ikyaro ikya Asia Enke.
a
Munyoore örööbhö na omorembe ukurwa ku-Waryobha ono aaho,
ho yaarë ukurwa okosemoka,
nanyabhoono ho arë, na ukurwa ku-Miika muhungatë bhano bharëngë bhöröngë ubhwa ikitumbë ikya ekekama,
5 na ukurwa ku-Yëësu Kiristo umwimërërri uwa heene.
Uyö we yaaryökiibhwi mbere,
okore abhe omokama uwa abhakama bhonswe igho ko-kebhara.
Yëësu Kiristo natohanshirë,
kora yatotashora ukurwa mö-bhëbhë ibhyëtö ku ukutukwera.
6 Atökörrë tobhe obhokama na abhasëngëri,
okore tutighinkanere Waryobha.
Waryobha uyö,
n-Suwaabho.
Ubhuhika na obhotoro,
bhebhe ku-Yëësu amakora na amakora!
Amina.
7 Motamaaha!
Nariisha arëngë ko-masaarö!
b
Kera ömöntö naremomaaha,
kora abhantö bhaara bhaamöbhëtirë ritimö,
bhayö bhonswe mbaremomaaha.
Amakabhira ghonswe igho ko-kebhara ngarikuura ko okoghera iya Yëësu.
c
Yëë. Amina.
8 Omonene Waryobha araghamba igha,
“Öni nö-öni Esemoko na Umuhiko.
d Öni ho ndë,
ho naarë ukurwa okosemoka,
nanyabhoono ho ndë.
Nö-öni neena obhotoro bhwonswe igho.”
Yohana aramaaha Omoona uwa Ömöntö
9 Öni nö-öni Yohana umukumya murikyënyu.
Nkötöörrania ndë hamwë na bhëënyu ököghömërrya inyanko ko okoghera iya Yëësu na Obhokama ubhwaye.
Öni naarëbhërrëëywë kwi-ghinga reno rekobherekerwa igha Paatimo.
Naarëbhërrëëywë iyö,
okore igha,
ntakaaraareka engʼana iya Waryobha na ntakaimererra amangʼana agha Yëësu.
10 Mbe,
Umwika Ömöhörëëru akanyitoomera urusikö nyabhorebhe urwa Omonene Yëësu.
e Kamwë igho,
nkaighwa nyuma iyaane iyö,
engamba enene kya iya orotera.
11 Engamba iyö yaaghambirë igha,
“Andeka mo-ketabho amangʼana ghonswe igho ghano oraamaahe.
Omare otomane eketabho kiyö mo-makanisa muhungatë agha Ëfësö,
Simirina,
Perighamo,
Tiyatira,
Saridi,
Firadërifia,
na Raodikia.”
12 Nkaisyörya mmaahe uyö yaashumaashirë na öni,
nkamaaha ebhetangora muhungatë ibhya esahaabhu ibhya okotoora-ko setara.
13 Ghatëghatë iya setara siyö,
nkamaaha-ho ömöntö anga kya Omoona uwa Ömöntö.
f Aibhöhirë engansho entambë,
na mu-kikubha,
yaaibhöhirë umushibhi omoghare ughwa esahaabhu.
14 Situukya isyaye ne-ndabhu shaa syaarë kya simbushe,
ghwiki nsyaatuubhaini kya righörö rirabhu shaa.
Amaiso aghaaye,
ghaamekamekanga kya ëbhëmörë ibhya omorro.
15 Amaghörö aghaaye ghaamekamekanga bhököngʼu kya ishabha eno ighuutirwë na omorro.
Engamba iyaaye,
yaarenga kya amanshë amaaru ghano ghakoghera mö-sënkörömöri.
16 Ömöntö uyö,
yaarë na sinyota muhungatë mo-kobhoko ukwa bhoryo.
Umushonge umwöghë nyambagha ibhërë,
ghwaarwanga mu-munywa ughwaye.
Ubhusyö ubhwaye,
bhwaamekamekanga kya omobhasö ömörörö kai.
17 Hano naamörööshë,
nkaghwa hansë bhubhuumaayë ko-maghörö aghaaye,
ukwörökya igha,
nëmösöökirë,
nkabha kya ono nkuurë.
Kasi akantoorra okobhoko ukwaye ukwa bhoryo eno arantëëbhya igha,
“Otakoobhoha!
Öni nö-öni uwa mbere na nö-öni embotorra.
18 Nö-öni öbhöhöru!
Naarenga nkuurë,
kasi bhoono tamaaha,
möhöru ndë,
amakora ghonswe igho.
Nö-öni neena sefongoro isya uruku na isya mu-kyaro ikya abhaku.g
19 Bhoono andeka amangʼana ghayö örööshë,
ghayö ghakwebhoka bhoono igho,
na amangʼana ghaara gharyebhoka mbere iyö.
20 Mo-kobhoko ukwane ukwa bhoryo,
waarööshë-mo sinyota muhungatë,
ghwiki okamaaha ebhetangora muhungatë ibhya esahaabhu ibhya okotoora-ko setara,
ensonga iya ikibhisirë kiyö ni-igha,
sinyota muhungatë seera,
na-bhamaraika abha makanisa muhungatë.
Ebhetangora muhungatë ibhya esahaabhu ibhya okotoora-ko setara,
bhiyö na-makanisa muhungatë.”