Yohana 11

Uruku urwa Raazaaro

Yaare-ho ömöntö ono yaabherekerwanga igha Raazaaro, m-mörööyë yaarë. Yaamënyirë Bhetania hamwë na Maryamu bhaana Maarita, bhaisëkë bhaabho. 2 Maryamu umwisëkë uwaabho Raazaaro ömörööyë, we yaahakirë Omonene Yëësu amaghuta agha ikirumba ikiiya, kora akamweyera situukya isyaye ko-maghörö. 3 Mbe, Maryamu bhaana Maarita bhakatomana amangʼana ko-Monene Yëësu igha, “Omonene, mosaani uwaaho, m-mörööyë.” 4 Hano Yëësu yaaighuurë amangʼana ghayö, akaghamba igha, “Öbhörööyë bhuyö tibhumwite hë, kasi öbhörööyë bhuyö, nu-bhwa ukwörökya ubhuhika ubhwa Waryobha. Naröörrë, okore abhantö bhansooke öni Omoona uwa Waryobha, ko okohetera öbhörööyë bhuyö.” 5 Yëësu yaahanshirë Maarita mohara uwaabho Maryamu, na Raazaaro mura uwaabho. 6 Mbe, nokaanyoora yaaighuurë igha Raazaaro m-mörööyë yaarë, kasi yaaghëndërrëëyi ukwikara sinsikö ibhërë, ahasë hayö yaarë.

7 Mbe, hano sinsikö ibhërë siyö syaahööyë, Yëësu akatëëbhya abheegha abhaaye igha, “Tukyore Yudea.” 8 Abheegha abhaaye bhakamohonshora igha, “Raabhi, m-böngö hano Abhayahudi bhaatunanga okokotema na amaghena, ghwiki oratuna igha ukyore-yo?” 9 Yëësu akabhahonshora igha, “Kanaa, omobhasö teghoona seesa ikömi na ibhërë? Hano ömöntö yaghenda omobhasö, n-këköngʼu ukwituuratuura, ko bhoora obhorabhu ubhwa ko-kebhara kono nkömömörëkërya bhörë. 10 Kasi ono akoghenda ubhutikö, nkwituuratuura arë, ko bhoora obhorabhu ubhwa ökömömörëkërya tebhooho hë.”

11 Hano Yëësu yaamarrë okoghamba amangʼana ghayö, akaghëndërrya ökötëëbhya abheegha abhaaye igha, “Omosaani uwëëtö Raazaaro araayë, kasi nkutuna ndë ngende ukumutura.” 12 Abheegha abhaaye bhakamohonshora igha, “Omonene, hano oraanyoore igha naraayë, naraahwene.” 13 Keno Yëësu yaashumaasheranga, nu-ruku urwa Raazaaro, kasi abheene bhaakanyanga igha, na-mangʼana agha seetero akushumaashera. 14 Mbe, Yëësu akabhatëëbhya harabhurabhu igho igha, “Raazaaro akuurë. 15 Kasi öni nkushomerwa ndë igha, amangʼana ghayö ghaikörrë öni ntaa-yo, okore bhëënyu mobhe na umukumo. Mbe, bhoono ni-igha toghende waaye.” 16 Toomasi ono yaabherekerwanga igha, Ekesare, akatëëbhya abheegha bharikyaye igha, “Bhëëtö bhonswe toghende, okore tukwe nawe iyö.”

17 Mbe, hano Yëësu yaahikirë iyö, akanyoora Raazaaro amarrë sinsikö inye mo-mbeehera. 18 Ikishishi ikya Bhetania kiyö, kyaarenga sikiromiita isatö igho, ukurwa Yërusarëëmu. 19 Abhayahudi abhaaru bhaaishirë Bhetania hayö ökötërëmya Maarita bhaana Maryamu, ko okoghera iya uruku urwa Raazaaro, ono yaarë mura uwaabho.

20 Mbe, hano Maarita yaaighuurë igha Yëësu nkuusha arë, akarishoka kebhara, akaghya ukumuturungʼana, kasi Maryamu umwene mu-nyumba yaatighaayë aikaayë. 21 Maarita akatëëbhya Yëësu igha, “Omonene, singa n-hano waarë, mura uwëëtö takaakuurë hë. 22 Kasi kora bhoono nemanyirë igha, kyokyonswe keno oraasabhe Waryobha, naraakohaane.” 23 Yëësu akamohonshora igha, “Mura uwëënyu naraaryoke.” 24 Maarita akamohonshora igha, “Öni nemanyirë igha, nariryoka ko-nkaagha iya ukuryoka ukwa abhantö ku-rusikö urwa umuhiko.” 25 Yëësu akamohonshora igha, “Öni nö-öni ukuryoka kuyö, ghwiki nö-öni öbhöhöru. Ömöntö ono akunkumya, nakaakwa, naraaghëndërri okobha ömöhöru. 26 Na ömöntö wowonswe igho ömöhöru ono akunkumya, tarikwa röndë hë. Orakumya amangʼana ghayö ngambirë?” 27 Maarita akamohonshora igha, “Obhoheene Omonene, nkukumya ndë igha, nu-uwe Kiristo, Omoona uwa Waryobha, ono akuusha ko-kebhara kono.”

Yëësu arakuura

28 Hano Maarita yaamarrë okoghamba ghayö, akaghya okobherekera Maryamu mohara uwaabho, akakora nawe righara, akamötëëbhya igha, “Umwëghya aishirë n-hano arë, arakobherekera.” 29 Hano Maryamu yaaighuurë ghayö, akeemoka bhöngöbhöngö, akaghya ku-Yëësu. 30 Enkaagha iyö, tuwanyöörrë Yëësu araasoha mu-kishishi kiyö hë, kasi waanyöörrë akërëngë haara Maarita yaamuturungʼanëëyë. 31 Mbe, Abhayahudi bhano bhaatërëmyanga Maryamu ka hayö, hano bhaarööshë areemoka na okotanora bhöngöbhöngö, bhakamurwa nyuma, ko bhoora bhaakanyanga igha, nkughya arë ukukuura ko-mbeehera.

32 Mbe, hano Maryamu yaahikirë ku-Yëësu, akamomaaha, akamughwera ko-maghörö, akatëëbhya Yëësu igha, “Omonene, singa n-hano waarë, mura uwëëtö takaakuurë hë.” 33 Hano Yëësu yaarööshë Maryamu arakuura, na Abhayahudi bhano bhahinaini nawe bhonswe bharakuura, akabhaabhayera, kora akaighwa bhoghogho bhököngʼu mo-nkoro iyaaye. 34 Mbe, akabhabhöörya igha, “Hai mömötöörrë?” Bhakamohonshora igha, “Omonene, otaasha tukwöröki.” 35 Yëësu akakuura. 36 Mbe, Abhayahudi bhano bhaare-ho bhakaghamba igha, “Momaahe bhono yaahanshirë Raazaaro!” 37 Kasi abhandë mo-bhayö bhakaghamba igha, “Ömöntö ono we yaahwënëri umuhukuru oora, n-kwakë atatörrë okokora Raazaaro atakaakwa?”

Yëësu araryökya Raazaaro

38 Hano ghwiki Yëësu yaaighwanga öbhörrö mo-nkoro iyaaye, akahika ko-mbeehera haara. Embeehera iyö, n-disana ryaarë, reno bhaaribhirë-ko reghena rinene. 39 Yëësu akabhatëëbhya igha, “Muruusi-ho reghena riyö.” Kasi Maarita, umusubhaati uwaabho umuku oora, akahonshora Yëësu igha, “Omonene, bhoono nkunyunka arë, ko bhoora reero nu-urwa kane kerenga yaabheekwa.” 40 Yëësu akamohonshora igha, “Kasi, tënkötëëbhëri igha, hano oraankumi, noraamaahe ubhuhika ubhwa Waryobha?”

41 Mbe, bhakaruusya-ho reghena reera. Yëësu akagharamera mu-ryobha, akasaasaama ku-Waryobha igha, “Taata, ndakukumya ko bhoora wighuurë amasabhi aghaane. 42 Nemanyirë igha nkunyighwa örë nkaagha syonswe igho, kasi nengambirë amangʼana ghayö, ko okoghera iya rikomo irya abhantö bhano, okore bhakumi igha, nu-uwe waantoma.” 43 Hano Yëësu yaamarrë okoghamba amangʼana ghayö, akabherekera bhököngʼu igha, “Raazaaro, rishoka kebhara eno!” 44 Mbe, umuku oora, akarishoka kebhara. Amaghörö na amabhoko aghaaye ghananëërrëywë na esanda, kora na ubhusyö ubhwaye bhwaarenga bhonanërrëywë na eketati ikya ingibho. Yëësu akabhatëëbhya igha, “Momonoore singibho siyö, mumutighe aghende.”

Ësëëmyö iya ukwita Yëësu

(Mataayo 26:3-5; Maariko 14:1-2; Ruuka 22:1-2)

45 Mbe, Abhayahudi abhaaru bhano bhaaishirë okomaaha Maryamu, hano bhaarööshë ghayö Yëësu yaakörrë, bhakamukumya. 46 Kasi Abhayahudi abhandë bhakaghya ko-Bhafarisaayo, bhakabhatëëbhya ghano Yëësu yaakörrë. 47 Mbe, abhanene abha abhasëngëri na Abhafarisaayo, bhakakora esango iya ribharasa rinene, bhakabhoorania igha, “Iyakë tokaakora bhamurë? Ko bhoora ömöntö ono ebhemanyërryö ibhya amakono m-byaaru akokora. 48 Hano toraamutighe aghëndërri, abhantö bhonswe igho mbaraamukumi, na hayö bhoono ho Abharuumi bharaashe na okosarya ikyaro ikyëtö na risengerro iryëtö.”

49 Mbe, ömwë mo-bhanene bhaara ono yaabherekerwanga igha Kayafa, m-monene uwa abhasëngëri yaarë ko-mooka ghuyö, akabhatëëbhya igha, “Bhëënyu temomanyirë ngʼana hë!” 50 Kasi temomanyirë igha, nyakara ömöntö ömwë akwe ko okoghera iya abhantö bhonswe igho, okore ikyaro ketakaasikibhwa? 51 Kayafa tiyaaghambirë amangʼana ghayö ko okohansha ukwaye umwene hë, kasi n-ko bhoora yaarë omonene uwa abhasëngëri uwa omooka ghuyö. Ku bhuyö, bhuyö nö-bhörööti yaaruusyanga igha, Yëësu nakaakuurë ko okoghera iya Abhayahudi. 52 Te-ko okoghera iya Abhayahudi abheene igho, kasi n-ko okoghera iya okokomania abhaana abha Waryobha bhano bhaanyaraghana okore, bhabhe hamwë.

53 Ukurwa urusikö ruyö, abhatangati abha Abhayahudi bhakakora ikiina ikya ukwita Yëësu. 54 Ko bhuyö, Yëësu akatigha okoghenda harabhurabhu igho mo-Bhayahudi. Akatanora ukurwa hayö, akaghya haangʼë na ku-riköngö, mu-mughi ghono ghwaabherekerwanga igha Efraimu, akaikara iyö hamwë na abheegha abhaaye.

55 Mbe, inyangi iya Abhayahudi iya Epasaka n-haangʼë yaarë. Ku bhuyö abhantö abhaaru bhaarwanga mu-mighi ighyabho bharaghya Yërusarëëmu Epasaka etaraabha, okore bhaisaabhuure. 56 Abhantö bhakaghëndërrya ukutuna Yëësu. Enkaagha eno bhaarenga bhaimërëëyë mu-risengerro haara, bhakabhoorania igha, “Bhëënyu iyakë mokomaaha? Nataashe ku-nyangi eno?” 57 Abhanene abha abhasëngëri na Abhafarisaayo bhaarenga bharaghërrëëyi igha, ömöntö wowonswe igho ono araamanye hano Yëësu arë, abharome ökötwë, okore bhamoghoote.