Mataayo 26

Ësëëmyö iya ukwita Yëësu

(Maariko 14:1-2; Ruuka 22:1-2; Yohana 11:45-53)

Hano Yëësu yaamarrë ukwëghya amangʼana ghayö ghonswe igho, akatëëbhya abheegha abhaaye igha, 2 “Kya bhono bhëënyu bhonswe momanyirë igha, syaatighaayë sinsikö ibhërë igho, inyangi iya Epasaka ebhe. Ho bhoono öni Omoona uwa Ömöntö, ndaatoorwe mu-bhitaano ibhya abhabhisa abhaane, mbarinnyeera inikö, okore nhanekwe ko-mosarabha.”

3 Mbe, ko-nkaagha iyö, abhanene abha abhasëngëri na abhaghaaka abha Ikiyahudi, bhakaikomania mu-nyumba iya omonene uwa abhasëngëri, ono yaabherekerwanga igha Kayafa. 4 Bhakashumaashera bhono bharaaghoote Yëësu këngʼaini, bhamwite. 5 Ku bhuyö bhakaghamba igha, “Totakaasha okomoghoota urusikö urwa inyangi iya Epasaka, ko bhoora, abhantö bharatora okokora riihë.”

Omokari ono yaahakirë Yëësu amaghuta

(Maariko 14:3-9; Yohana 12:1-8)

6 Mbe, Yëësu akaghya mu-kishishi ikya Bhetania, akaikara wa Simööni. Simööni uyö kare, m-moghenge yaarë. 7 Mbe, hano Yëësu yaaikaayë ko-meeza haara ararya, akaasha-ho omokari nyabhorebhe aana inshubha iya arabhaasita, eno yaaghëghëëyë-mo amaghuta ghano ghakurumbaasa bhuuya, agha öbhöghöri obhonene. Omokari uyö, akahomerra Yëësu amaghuta ghayö ko-motwe.

8 Hano abheegha abha Yëësu bhaarööshë ghayö, bhakarerra. Bhakaghamba igha, “N-kwakë omokari ono asarri amaghuta agha bhöghöri ghano? 9 Singa amaghuta ghano ngakaaghöriibhwi seehera sinsharu, seno sekaatöörri abhatöbhu.”

10 Yëësu akamanya keno bhaaghambanga, ku bhuyö akabhabhöörya igha, “N-kwakë mukunyankya omokari ono? Engʼana eno ankörëëyë, ni-nshiiya. 11 Ko bhoora abhatöbhu, mmoonabho sinsikö syonswe igho, kasi öni tëngëndërri okobha na bhëënyu nsikö syonswe igho hë. 12 Omokari ono keno akörrë, nö-kösëëmya ömöbhërë ughwane ko okoghohaka amaghuta agha ikirumba ikiiya ntaraabha kobheekwa. 13 No-bhoheene nkobhatëëbhya igha, ahasë honswe igho hano Amangʼana Amaiya ghararaarekwenga ko-kebhara kono, engʼana eno omokari ono ankörëëyë, yonswe neraghambwenga, ko okomoheetoka.”

Yuuda Isikariyote araikërrya ukunyeera Yëësu inikö

(Maariko 14:10-11; Ruuka 22:3-6)

14 Mbe, Yuuda Isikariyote ömwë mo-bheegha abha Yëësu ikömi na abhabhërë bhaara, akaghya ko-bhanene abha abhasëngëri. 15 Hano yaahikirë, akabhabhöörya igha, “N-kë moraangʼaane hano ndaabhaghööti Yëësu?” Bhakamohaana seehera merongo etatö. 16 Ukusimirya hayö, Yuuda akatuna enshera iya okobhaghöötya Yëësu.

Yëësu ararya ibhyakorya ibhya Epasaka//hamwë na abheegha abhaaye

(Maariko 14:12-26; Ruuka 22:7-23; Yohana 13:21-30; 1 Abhakörintö 11:23-25)

17 Urusikö urwa mbere urwa inyangi iya emekaate gheno ghetatöörrwë-mo ehamiira, abheegha abha Yëësu bhakaasha, bhakabhöörya Yëësu igha, “Hai ukutuna toghende kökösëëmërya ibhyakorya ibhya Epasaka?”

18 Yëësu akabhahonshora igha, “Moghende mu-mughi ghuyö, mötëëbhi rebhe igha, ‘Umwëghya atötömirë. Araghamba igha, “Enkaagha iyaane haangʼë ërë. Öni ndatuna nnyeere ibhyakorya ibhya Epasaka mu-nyumba iyaaho hamwë na abheegha abhaane.”’” 19 Abheegha bhayö bhakaghya, bhakakora kya bhoora Yëësu yaabharaghërrëëyi, bhakasëëmya ibhyakorya ibhya Epasaka.

20 Hano yaahikirë omoghoroobha, Yëësu na abheegha abhaaye ikömi na abhabhërë, bhakaikara okorya ibhyakorya ibhya Epasaka. 21 Enkaagha eno bhaaryanga, Yëësu akabhatëëbhya igha, “No-bhoheene nkobhatëëbhya igha, ömwë uwëënyu naraannyeere inikö.”

22 Abheegha abhaaye bhakabhaabhayera bhököngʼu, kera ömwë uwaabho akabhöörya Yëësu igha, “M-maheene Omonene igha nö-öni?”

23 Yëësu akabhahonshora igha, “Nu-uyö atöngëëyi hamwë na öni mo-kebhaköri, uyö we araashe annyeere inikö. 24 Öni Omoona uwa Ömöntö, nendaaitwe kya igho yandëkirwë mo-Maandeko Amahörëëru. Kasi haahö, ömöntö ono araannyeere inikö. Ömöntö uyö, nyakara atakaaibhööywë.”

25 Mbe, Yuuda oora yaanyëërëëyë Yëësu inikö wonswe akaghamba igha, “M-maheene Raabhi igha nö-öni?”

Yëësu akamohonshora igha, “Oghamarrë.”

26 Yëësu akaghegha omokaate, akakumya Waryobha, akaghobhotora, akahaana abheegha abhaaye. Akabhatëëbhya igha, “Mogheghe moraaghere, ghono ngo ömöbhërë ughwane.” 27 Akaghegha ghwiki ekekombe keno kyaarë na idivai. Akakumya Waryobha, akahaana abheegha abhaaye. Akabhatëëbhya igha, “Mogheghe idivai eno, munywe bhonswe igho. 28 Ko bhoora ghano ngo amaanyinga aghaane agha Imuuma, ghano ghareeteke ko okoghera iya ukwabhera abhantö ëbhëbhë ibhyabho. 29 Keno nkobhatëëbhya ni-igha, tindinywa ghwiki idivai okohekera urusikö rono ndinywa idivai eehya hamwë na bhëënyu ko-Bhokama ubhwa Taata.”

30 Ho bhaamarrë, bhakarëëtya rirëëtyö irya ukukumya Waryobha. Bhakeemoka ukurwa hayö, bhakaghya mu-nguku iya Ëmëzëituuni.

Yëësu ararootera Peetero igha naraamwikaane

(Maariko 14:27-31; Ruuka 22:31-34; Yohana 13:36-38)

31 Mbe, ho Yëësu yaamarrë, akatëëbhya abheegha abhaaye igha, “Bhëënyu bhonswe igho, moraashe mongʼose muntighe öni umwene ubhutikö ubhwa reero. Neraabhe kya bhoora Waryobha yaaghambirë mo-Maandeko Amahörëëru igha,

‘Nendaateme omonaghya,

amangʼöndi ghanyaraghane.’”

32 Yëësu akaghëndërrya okoghamba igha, “Kasi hano ndiryoka, nendebhatangatera ukughya mo-mokowa ughwa Ghariraaya.”

33 Amangʼana ghayö ghakaghera Peetero akatëëbhya Yëësu igha, “Mbakaangʼosa bhonswe igho, kasi öni tinkutighe hë.”

34 Yëësu akamohonshora igha, “No-bhoheene nkökötëëbhya igha, noraashe unyikaane katatö setaraaraghora.”

35 Peetero akamohonshora igha, “Nokaanyoora nkukwa, tigha nkwe hamwë na uwe, kasi tinkwikaane hë.” Abheegha abhandë bhaara bhonswe bhakaghamba ighoigho.

Yëësu arasaasaama Waryobha Ghetisemane

(Maariko 14:32-42; Ruuka 22:39-46)

36 Ho Yëësu yaamarrë, akaghya ahasë hano haabherekerwanga igha, Ghetisemane. Akatëëbhya abheegha abhaaye igha, “Mwikare hano, öni nsuntare haara nsaasaame Waryobha.” 37 Akahinana na Peetero na abhamura abhabhërë bhaara abha Zebhedaayo. Akabhaabhayera, akanyanka bhököngʼu mo-nkoro iyaaye. 38 Ho yaamarrë, akabhatëëbhya igha, “Enkoro iyaane ebhaabhayëëyë bhököngʼu, kya hano nkaakwa. Mwikare hano, mwiraarerre hamwë na öni.”

39 Akasuntara mbere hake igho, akairekera hansë bhubhuumaayë, akasaasaama Waryobha igha, “Taata, hano oraanyoore obhotoro bhooho, unduusiri-ho engʼana eno, kasi otakaakora kya bhono öni nkutuna, okore bhono uwe ukutuna.”

40 Mbe, hano Yëësu yaakyörrë, akanyoora abheegha abhaaye bharaayë. Akabhöörya Peetero igha, “Mökërrwë ukwiraarerra kora esa ëmwë iyeene igho? 41 Mwiyangarre, na mosaasaame Waryobha, okore motakaashe mushaashwe. Enkoro eratora ököghömërrya ukushaashwa, kasi inyanko, nö-möbhërë.”

42 Mbe, ghwiki Yëësu akabhatigha hayö, akaghya-yo ghwiki urwa kabhërë, akasaasaama Waryobha igha, “Taata, nyoore n-këköngʼu ukunduusirya-ho engʼana eno, kora bhono ukutuna.”

43 Mbe, hano yaakyörrë ko-bheegha abhaaye bhaara, akanyoora ghwiki bharaayë, ko bhoora seetero ni-nsharu bhaarë nasyo. 44 Yëësu ghwiki akabhatigha hayö, akaghya okosaasaama urwa katatö, arakyorra amangʼana ghaaraghaara.

45 Mbe, ho yaamarrë, akakyora ko-bheegha abhaaye, akabhabhöörya igha, “Nanyabhoono mokeraayë moramuunya? Bhoono haisirë. Enkaagha iya inyaanyi iyaane n-haangʼë ërë. Bhoono mwitegherre mbatëëbhi, öni Omoona uwa Ömöntö nendaaghootwe ntoorwe mu-bhitaano ibhya abha ëbhëbhë. 46 Mobhooke toghende. Tamaaha, ömöntö ono anyërëëyë inikö haangʼë arë.”

Yëësu araghootwa

(Maariko 14:43-50; Ruuka 22:47-53; Yohana 18:3-12)

47 Enkaagha eno waanyöörrë Yëësu akishumaasha, tamaaha, Yuuda ömwë uwa bheegha abhaaye ikömi na bhabhërë bhaara, akatora aana rikomo rinene irya abhantö. Rikomo riyö, ryaaruurë ko-bhanene abha abhasëngëri na abhaghaaka abha Ikiyahudi, bhamanööyë imishonge na sirungu. 48 Yuuda ono yaanyëërëëyë Yëësu inikö, we yaarenga atangatirë, okore abhakorre ekemanyërryö. Waanyöörrë amarrë okobhatëëbhya igha, “Ömöntö ono ndaakëëri ku ukumwibhaara, momanye igha we. Muushe momoghoote.” 49 Hake igho, Yuuda akaghya ku-Yëësu akamobherekera igha, “Raabhi!” Akamwibhaara.

50 Kasi Yëësu akamohonshora igha, “Mosaani uwaane, kora ghano ghakörëëtirë.”

Mbe, abhantö bhayö bhakaghoota Yëësu. 51 Tamaaha, ömwë mo-bhaara bhaarenga na Yëësu, akasomora umushonge ughwaye, akagheesha omoghorwa uwa omonene uwa abhasëngëri, akamobhotora ökötwë ukwa bhoryo.

52 Kasi Yëësu akamötëëbhya igha, “Kyörya umushonge ghuyö mu-kishööghö, ko bhoora abhantö bhonswe igho bhano bhakokenyerra imishonge, ni-mishonge gherebhaita. 53 Kasi tomanyirë igha, ndatora okosabha Taata andetere kamwë igho, abhamaraika abhasirikare okoheteera amajeeshi ikömi na abhërë? 54 Bhoono hano ndaakore igho, ghaara ghaandekwa mo-Maandeko Amahörëëru, iyakë gharaahekerane?”

55 Mbe, Yëësu akatëëbhya rikomo irya abhantö riyö igha, “Bhoono mwishirë okongoota moona imishonge na sirungu okanya igha m-mogharanshöri uwa eserekaare ndë? Ndarra sinsikö syonswe igho naaikaranga hamwë na bhëënyu, ndëëghya abhantö mo-bhogho ubhwa risengerro irya Waryobha temwakaangöötirë hë. 56 Kasi bhoono ghano ghonswe igho ghabhaayë, okore amangʼana agha ömörööti ghaara gharëngë mo-Maandeko Amahörëëru ghahekerane.” Mbe, abheegha abhaaye bhonswe igho bhakangʼosa.

Yëësu araimërribhwa mo-bharasa

(Maariko 14:53-65; Ruuka 22:54-55, 22:63-71; Yohana 18:13-14, 18:19-24)

57 Mbe, abhantö bhaara bhaaghöötirë Yëësu, bhakamuhira ko-Kayafa omonene uwa abhasëngëri. Bhakaikomania-ho abhëëghya abha amaraghërryö agha Mosa na abhaghaaka abha Ikiyahudi. 58 Peetero yaarwanga nyuma Yëësu kwa hare, okohekera mu-righari irya omonene uwa abhasëngëri. Akasoha mu-righari muyö, akaikara kö-bhööri hamwë na abharëndi, okore amaahe keno keraabhe.

59 Abhanene abha abhasëngëri na ribharasa ryonswe igho irya Abhayahudi, bhaatunanga ubhwimërërri ubhwa obhorongo, okore bhanyoore enshera iya ukwita Yëësu. 60 Kasi tebhaanyöörrë ubhwimërërri ubhwa obhorongo ubhwa okobhatöörrya, nokaanyoora bhaaishirë abhaimërërri abhaaru abha obhorongo. Mbe, abhantö abhabhërë bhakaimerra, 61 bhakaghamba igha, “Ömöntö ono yaaghambirë igha, ‘Ndatora okotemora inyumba iya Waryobha mmare ngehaghaashe ku-sinsikö isatö igho.’”

62 Mbe, omonene uwa abhasëngëri akemerra, akabhöörya Yëësu igha, “Kanaa, tokohonshora engʼana yoyonswe eera ko ghano bhano bhakukushongera hë?” 63 Yëësu tiyaamumurri hë.

Mbe, omonene uwa abhasëngëri uyö akatëëbhya ghwiki Yëësu igha, “Ndakötëëbhya ku iriina irya Waryobha ömöhöru igha, tutyanere nyoore nu-uwe Kiristo, Omoona uwa Waryobha.”

64 Yëësu akamohonshora igha, “Nu-uwe oghambirë igho. Kasi nkobhatëëbhya ndë bhonswe igho igha, ukusimirya reero, moraamaahe öni Omoona uwa Ömöntö nikaayë bhoryo ubhwa Waryobha uwa obhotoro. Ghwiki moreemmaaha ndaasha ndëngë ko-masaarö.” 65 Mbe, hano omonene uwa abhasëngëri yaaighuurë amangʼana ghayö, akatandora singibho isyaye. Akaghamba igha, “Mwighuurë bhëënyu abheene kya bhono atökirë Waryobha, m-bwimërërri öbhöndë kë ghwiki tukutuna? 66 Bhoono bhëënyu bho iyakë mokoghamba?”

Bhakamohonshora igha, “Ni-igha aitwe.”

67 Mbe, bhakasimya ukutwera Yëësu amate mu-bhusyö, bhakamotema sinkundi, abhandë bhakamotema amakööfi. 68 Bhakamötëëbhya igha, “Uwe Kiristo, rëngërrya, nawë akötëmirë?”

Peetero araikaana Yëësu

(Maariko 14:66-72; Ruuka 22:56-62; Yohana 18:15-18, 18:25-27)

69 Mbe, ko-nkaagha iyöiyö, waanyöörrë Peetero aikaayë kö-bhööri kebhara hayö, akaasha ömököri uwa emeremo uwa ekekari, akasuntarra Peetero, akamötëëbhya igha, “Na uwe wonswe hamwë waarë na Yëësu Omoghariraaya.”

70 Peetero akaikaana mbere ya abhantö bhonswe igho igha, “Temanyirë kora kiyö okoghamba hë.”

71 Mbe, Peetero akarwa hayö, akaghya ku-kihiita. Ömököri uwöndë uwa emeremo uwa ekekari akamaaha Peetero, akatëëbhya abhantö bhano bhaarë hayö igha “Ömöntö ono hamwë yaarë na Yëësu uwa Nazarëëti.”

72 Ghwiki Peetero akaikaana ku ukutyana igha, “Ömöntö uyö temomanyirë hë bhamurë mbe.”

73 Hake igho abhantö bhano bhaarenga bhaimërëëyë hayö, bhakaghya haangʼë na Peetero. Bhakamötëëbhya igha, “M-maheene igha uwe wonswe, nö-ömwë uwa abhantö bhayö, ko bhoora obhoghambi ubhwaho umwene nkwörökya bhörë bhuuya igha, m-Moghariraaya örë.”

74 Peetero akaanga bhörrö, akaihiimirrya na ukutyana igha, “M-maheene ömöntö uyö temomanyirë hë.” Hake igho, sekaraghora.

75 Mbe, Peetero akahiita amangʼana ghaara Yëësu yaamötëëbhëri igha, “Noraashe unyikaane katatö setaraaraghora.” Akarishoka kebhara, akakuura bhököngʼu.