Yohana 10

Ëkërëngyö ikya omokaraabhërri uwa heene

Yëësu akaghëndërrya ukushumaasha igha, “No-bhoheene nkobhatëëbhya igha, ömöntö wowonswe igho ono atakohetera mu-kihiita ikya riigho irya amangʼöndi, kasi n-handë igho akohetera, uyö nu-mwibhi, kora m-mosaki. 2 Kasi ono akohetera mu-kihiita ikya riigho, uyö no-mokaraabhërri uwa amangʼöndi. 3 Ömörëndi uwa riigho nkumweghorra arë ikihiita, na amangʼöndi nkwighwa gharë engamba iyaaye. Omokaraabhërri nkobherekera arë kera ringʼöndi iriina iryaryo, aghatangata ukughya kebhara. 4 Hano yaamara ukurishökya amangʼöndi aghaaye kebhara, nkotangata arë mbere, amangʼöndi ghamosoorana, ko bhoora ngamanyirë engamba iyaaye. 5 Amangʼöndi teghakosoorana ömöghëni hë, kasi nkomongʼosa gharë, ko bhoora ghatamanyirë engamba iyaaye.” 6 Yëësu yaatëëbhëri Abhafarisaayo ëkërëngyö kiyö, kasi bho tebhaamanyërrëëyi ghano yaabhatëëbhyanga hë.

7 Mbe, Yëësu akabhatëëbhya ghwiki igha, “No-bhoheene nkobhatëëbhya igha, öni nö-öni ikihiita kiyö amangʼöndi ghakoheta-mo gharasoha mu-righo. 8 Abhakaraabhërri abha amangʼöndi bhonswe igho bhano bhaantangatera, m-baibhi bhaarë kora ghwiki m-basaki bhaarë, kasi amangʼöndi, teghabhaighwërëëyë hë. 9 Öni, nö-öni ikihiita. Ömöntö ono okohetera ku-öni, naraatööribhwi, naraasohenga na ukurishoka, araghya mö-kërëësyö. 10 Umwibhi nkuusha arë mu-righo, okore aibhe amangʼöndi, aite na okosarya. Kasi öni, naasha okore bhabhe na öbhöhöru, öbhöhöru ubhwaru këmwëkëmwë.

11 “Öni nö-öni omokaraabhërri uwa heene. Omokaraabhërri uwa heene, nkwiruusya arë öbhöhöru ubhwaye, okore amangʼöndi aghaaye ghatakaasira. 12 Ömököri uwa emeremo ono atarëngë omokaraabhërri uwa amangʼöndi, ono amangʼöndi ghatarëngë aghaaye, hano yamaaha ishuushë eraasha, nkongʼosa arë, atigha hayö amangʼöndi agheene igho. Mbe ityënyi nkoghoota ërë amangʼöndi aghandë, ghaara ghatamirë, ghanyaraghana. 13 Ömököri uwa emeremo nkongʼosa arë ko bhoora tatöniibhwi na amangʼöndi ghayö hë.

14 “Öni nö-öni omokaraabhërri uwa heene. Nemanyirë bhuuya amangʼöndi aghaane, nagho ghonswe ngaamayirë, 15 kya bhono Taata ammanyirë, na öni nemomanyirë. Nö-öni nkwiruusya öbhöhöru ubhwane, okore amangʼöndi aghaane ghatakaasira. 16 Öni neena amangʼöndi aghandë ghano ghatarëngë agha mu-riigho mono, ghonswe ghayö ni-igha ngareete. Amangʼöndi ghayö ghonswe ngaraamanye engamba iyaane. Ku bhuyö nderaabha rihisho imwë, na omokaraabhërri ömwë igho.

17 “Taata nanhanshirë ko bhoora igha, nkuruusya ndë öbhöhöru ubhwane, okore mbogheghe ghwiki. 18 Taaho ömöntö ono akotora ukunduusya öbhöhöru ubhwane. Nö-öni umwene nkwiruusya öbhöhöru ubhwane. Öni neena obhotoro ubhwa ukwiruusya öbhöhöru ubhwane, ghwiki neena obhotoro ubhwa okobhoghegha. N-Taata umwene ono yaantoma we yaandaghërrya okokora igho.”

19 Hano Abhayahudi bhaaighuurë amangʼana ghayö, ghwiki bhakaanga korengerrania abheene ko bheene. 20 Abhantö abhaaru mo-bhayö, bhakaghamba igha, “Ono n-disambwa aanaryo, kora m-mushuuru, bhoono n-kwakë mukumwitegherra?” 21 Kasi abhandë, bhakarya senkaani igha, “Amangʼana ghayö, teghakurwa kö-möntö ono aana risambwa. Risambwa ndetora kokora umuhukuru amaahe?”

Abhantö abhaaru bharanga Yëësu

22 Mbe, ekahika enkaagha iya inyangi iya Abhayahudi iya eheetoko iya okosaabhuura risengerro irya Yërusarëëmu. Enkaagha iyö, ni-iya embeho yaarë. 23 Yëësu yaaghendanga kö-bhööri ubhwa risengerro, ahasë hano haabherekerwanga igha, Ëghösöryö iya Seremaani. 24 Abhayahudi nyabhorebhe bhakamwinaara, bhakamöbhöörya igha, “Bhoono n-kwakë ukutunyankyanyankya igho? Nyoore nu-uwe Kiristo, tötëëbhi harabhurabhu igho.” 25 Kasi Yëësu akabhahonshora igha, “Öni mbatëëbhëri igha nö-öni wë, kasi bhëënyu timukukumya hë. Amakono ghano nkokora ko obhotoro ubhwa Taata, ngo ghakunyimererra. 26 Kasi bhëënyu nkwanga mörë ukunkumya ko bhoora motarëngë amangʼöndi aghaane. 27 Amangʼöndi aghaane nkwighwa gharë engamba iyaane. Öni nengamanyirë bhuuya, na agheene ghonswe nkonsoorana gharë. 28 Öni nkoghahaana ndë öbhöhöru ubhwa amakora ghonswe igho, tegharisira kora hake hë. Ghwiki taaho ömöntö ono akotora okoghasakörya ukurwa mo-mabhoko aghaane. 29 Taata ono yaangʼaana bhayö, m-Monene okokera bhonswe igho, ku bhuyö, taaho ömöntö ono akotora okobhasakörya ukurwa mo-mabhoko aghaaye. 30 Öni na Taata, n-këntö këmwë törë.”

31 Mbe, Abhayahudi abhandë hano bhaaighuurë amangʼana ghayö, bhakabhoosha ghwiki amaghena, okore bhamoteme bhamwite. 32 Kasi Yëësu akabhatëëbhya igha, “Naabhöörökya amakono amaiya amaaru ghano naakora ko obhotoro ubhwa Taata. Ne-ngʼana kë eno ekoghera moratuna monteme na amaghena?” 33 Abhayahudi bhakahonshora igha, “Titukutuna okokotema na amaghena ko okoghera iya okokora amangʼana amaiya hë, kasi n-ko bhono okotoka Waryobha. Kora oraighamba igha n-Waryobha örë, na mbe m-möntö örë kya abhandë!” 34 Yëësu akabhahonshora igha, “Kasi, netaandekwa mo-bhetabho ibhyënyu igha Waryobha yaaghambirë igha, ‘Bhëënyu m-bawaryobha mörë?’ 35 Yandëkirwë mo-Maandeko Amahörëëru igha, abhantö bhano bhaana engʼana iya Waryobha, Waryobha yaabhashumaashera igha, bhayö mbo bhawaryobha. Bhëëtö ntomanyirë igha, ghano ghaandekwa mo-Maandeko Amahörëëru no-bhoheene ubhwenebhwene. 36 Taata we yaanyaahora, akantoma ko-kebhara, bhoono n-kwakë mokoghamba igha öni nkotoka ndë Waryobha hano naghamba igha, ‘Öni m-moona uwa Waryobha ndë?’ 37 Nyoore ntakokora emeremo gheno Taata akokora, motakaankumya. 38 Kasi oraanyoore ndakora emeremo gheno Taata akokora, nokaanyoora öni timukunkumya hë, kasi mukumi emeremo ghiyö. Okohetera ko-meremo ghiyö, ho moraamanye igha, Taata naana öbhömwë na öni, na öni wonswe, nneena öbhömwë na Taata.” 39 Mbe, hano Abhayahudi bhayö bhaaighuurë amangʼana ghayö, ghwiki bhakatuna igha bhamoghoote, kasi Yëësu akaterroka mo-mabhoko aghaabho.

40 Mbe, Yëësu akaghya ghwiki humbu iya omooro ughwa Yorodani, akahika hano Yohana yaabhatiisiryanga abhantö ekembere, akaikara iyö sinsikö nke igho. 41 Abhantö abhaaru bhakaasha ku-Yëësu, bhakamötëëbhya igha, “Nokaanyoora Yohana tiyaakörrë ekemanyërryö ikya rikono kora ëkëmwë hë, kasi amangʼana ghonswe igho agha Yëësu ghano yaaghambanga, n-ga obhoheene ghaarë.” 42 Mbe, abhantö abhaaru bhano bhaarenga hayö, bhakakumya Yëësu.