Yohana 9

Yëësu arahwënia umuhukuru

Mbe, urusikö urwöndë hano Yëësu yaahetanga ko-nshera, akamaaha ömöntö ono yaaibhööywë m-muhukuru. 2 Abheegha abhaaye bhakamöbhöörya igha, “Raabhi, ömöntö ono yaaibhööywë igho umuhukuru ko okoghera iya ëbhëbhë ibhya wë? Ibhya ömöntö ono, kasi ni-ibhya abhaibhöri abhaaye?” 3 Yëësu akabhahonshora igha, “Ono ti-muhukuru ko okoghera iya ëbhëbhë ibhyaye, handë ëbhëbhë ibhya abhaibhöri abhaaye. Kasi yaaibhööywë umuhukuru, okore obhotoro ubhwa Waryobha bhomaahekane ko-bhantö kö-bhöhöru ubhwaye. 4 Ni-igha tokore emeremo ighya Waryobha ono yaantoma, enkaagha eno iryobha rekeeho. Ko bhoora ubhutikö nkuusha bhörë, hano totaretora okokora emeremo gheno. 5 Hano nkeeho ko-kebhara kono, öni no-bhorabhu ndë ko-bhantö bhonswe igho.” 6 Hano Yëësu yaamarrë okoghamba amangʼana ghayö, akatwa amate hansë ko-marobha, akakonya amatoto, akahaka amatoto ko-maiso agha umuhukuru uyö. 7 Akatëëbhya umuhukuru uyö igha, “Kaghi wisaabhe ubhusyö mwi-ribha irya Sirowamu.” Ensonga iya engʼana iyö igha Sirowamu, ni-igha, ono atömirwë. Mbe umuhukuru uyö akaghya, akaisaabha ubhusyö, akahwena, akakyora yeeka waaye aramaaha bhuuya igho.

8 Mbe, abhamenyani abhaaye na abhandë bhano bhaamomaahanga enkaagha eno yaasabhaerranga, bhakabhoorania igha, “Kasi, ömöntö ono to-ora yaaikaranga na arasabherra?” 9 Abhandë bhakaghamba igha, “We.” Abhandë bhakaghamba igha, “Te-we hë, kasi mbatuubhaini bhököngʼu.” Kasi we akabhatëëbhya igha, “No-bhoheene igha nö-öni.” 10 Mbe, bhakamöbhöörya igha, “Nyoore nu-uwe, iyakë ökörrë wamaaha?” 11 Akabhahonshora igha, “Ömöntö ono akobherekerwa igha Yëësu, yaatuurë amate ko-marobha, akakonya amatoto, akanhaka ko-maiso. Akantëëbhya igha, ‘Kaghi wisaabhe ubhusyö mwi-ribha irya Sirowamu.’ Mbe nkaghya, nkaisaabha, nkasimya okomaaha.” 12 Bhakamöbhöörya igha, “Bhoono ömöntö uyö hai arëngë?” We akabhahonshora igha, “Öni temanyirë hë.”

Abhafarisaayo bharabhöörya ömöntö ono yaarenga umuhukuru

13 Mbe, abhantö bhayö bhakahira umuhukuru uyö ko-Bhafarisaayo. 14 Urusikö rono Yëësu yaakönyirë amatoto na ukuhwënia umuhukuru uyö, nu-rusikö urwa Obhotooro rwaarë. 15 Mbe, Abhafarisaayo bhonswe bhakabhöörya ghwiki ömöntö uyö igha, iyakë yaakörrë akamaaha. Akabhahonshora igha, “Ömöntö uwöndë yaanhakirë amatoto ko-maiso, nkaisaabha, bhoono nkomaaha ndë.” 16 Mbe Abhafarisaayo nyabhorebhe bhakaghamba igha, “Ömöntö ono akörrë igho, tiku-Waryobha akurwa hë, ko bhoora atakoghoota amaraghërryö agha rusikö urwa Obhotooro.” Kasi Abhafarisaayo abhandë bhakaghamba igha, “Iyakë ömököri uwa ëbhëbhë araatore okokora ebhemanyërryö ibhya amakono kya bhiyö?” Mbe bhakaanga korengerrania abheene ko abheene. 17 Mbe, Abhafarisaayo bhakamöbhöörya ghwiki igha, “Ömöntö ono akuhwënëri amaiso aghaaho, iyakë okoghamba ko amangʼana agha ömöntö uyö?” We akabhahonshora igha, “Öni ndamaaha igha ömöntö uyö, nö-mörööti uwa Waryobha.”

18 Kasi abhatangati abha Abhayahudi tebhaakumiri igha ömöntö uyö, yaaibhööywë umuhukuru. Mbe bhakabherekera abhaibhöri abhaaye. 19 Bhakabhabhöörya igha, “Kasi, ömöntö ono m-moona uwëënyu? Nyoore ni-igho ërë, moraikërrya igha yaaibhööywë umuhukuru? Nyoore ni-igho, bhoono iyakë yaakora akamaaha?” 20 Mbe, abhaibhöri abhaaye bhakabhahonshora igha, “Bhëëtö ntomanyirë obhoheene igha, ono no-moona uwëëtö, ntwaamwibhööyë arëngë umuhukuru. 21 Kasi tetomanyirë keno kyaaghera akamaaha, ghwiki tetomomanyirë ömöntö ono yaamuhwënëri amaiso. Mömöbhööri umwene, ko bhoora m-möntö ömökörö, aratora okoghamba.” 22 Abhaibhöri abhaaye bhaaghambirë igho, ko bhoora bhoobhohanga abhatangati bhayö. Abhatangati bhaarenga bhaaikererraini igha, ömöntö wowonswe igho ono akwikërrya igha Yëësu n-Kiristo, mbaraamughire mu-nyumba iya esango iya Abhayahudi. 23 Nkyo ikibhuno keno kyaaghërrë abhaibhöri bhakaghamba igha “Mömöbhööri umwene, ko bhoora m-möntö ömökörö.”

24 Mbe, urwa kabhërë abhatangati abha Abhayahudi bhakabherekera ömöntö uyö yaarenga umuhukuru, bhakamötëëbhya igha, “Utyane ku-Waryobha igha, nkoghamba örë obhoheene! Bhëëtö ntomanyirë igha, ömöntö uyö yaakuhwënëri, m-mököri uwa ëbhëbhë.” 25 Mbe, akabhahonshora igha, “Öni ghayö tengamanyirë hë, nyoore ömöntö uyö m-mököri uwa ëbhëbhë, kasi keno mmanyirë n-këntö ëkëmwë igho igha, m-muhukuru naarenga, kasi bhoono nkomaaha ndë.” 26 Mbe, bhakamöbhöörya igha, “Ömöntö uyö n-kë yaakökörëëyë? Iyakë yaakuhwënëri amaiso aghaaho?” 27 We akabhahonshora igha, “Öni marrë okobhatëëbhya amangʼana ghayö, kasi timwighuurë hë. N-kwakë mukutuna mbatëëbhi ghwiki? Kasi, na bhëënyu nkutuna mörë mobhe abheegha abhaaye?” 28 Mbe bho bhakamotoka igha, “Uwe nu-uwe umwegha uwaaye! Kasi bhëëtö na abheegha abha Mosa törë. 29 Ntomanyirë igha Waryobha yaashumaashirë na Mosa, kasi ömöntö uyö tetomanyirë hano yaarwa hë.” 30 Akabhahonshora igha, “Öni nkoroghoora ndë bhököngʼu igha, temomomanyirë ahasë arwërëëyë, kasi uyö, we anhwënëri amaiso! 31 Ntomanyirë igha Waryobha takwighwera amasabhi agha abhantö abha ëbhëbhë hë, kasi nkwighwera arë ömöntö wowonswe igho ono akomosooka na okokora bhono akutuna. 32 Ukurwa kare, tetwakaighuurë kora kamwë igho igha, ömöntö ahwënëri ömöntö ono yaaibhorwa umuhukuru. 33 Singa ömöntö uyö ataarwa ku-Waryobha, takaatörrë okokora ghayö hë.” 34 Bho bhakamohonshora igha, “Uwe weebhorwa na okorerwa kya ömököri uwa ëbhëbhë. Bhoono m-bwera kë onabho ubhwa ukutwëghya?” Mbe, bhakamurughya.

Ubhuhukuru ubhwa mo-nkoro

35 Hano Yëësu yaaighuurë igha ömöntö uyö arughiibhwi, akaghya ukumutuna. Hano yaamunyöörrë, akamöbhöörya igha, “Kasi, orakumya Omoona uwa Ömöntö?” 36 Ömöntö uyö akamohonshora igha, “Ëë Omonene, otantëëbhya mmanye Omoona uwa Ömöntö okore mbenga ndamukumya.” 37 Yëësu akamohonshora igha, “Wamomaaha, kora we ukushumaasha nawe.” 38 Ömöntö uyö akaghamba igha, “Omonene, nkukumya ndë.” Akasengerra Yëësu.

39 Mbe, Yëësu akaghamba igha, “Öni naasha ko-kebhara kono okobhotora ibhiina, okore abhahukuru bhamaahe, na bhano bhakomaaha, bhahukure.” 40 Mbe, Abhafarisaayo abhandë bhano bhaarë hayö, hano bhaaighuurë amangʼana ghayö, bhakamöbhöörya igha, “Nkoghamba örë igha na bhëëtö bhonswe m-bahukuru törë?” 41 Yëësu akabhahonshora igha, “Singa naasha nyoore igha m-bahukuru mörë, temokaabhaayë na isoro irya öbhököri ubhwa ëbhëbhë hë. Kasi bhëënyu nkoghamba mörë igha, nkomaaha mörë, ku bhuyö nköghëndërrya mörë okobha na risoro iryënyu, irya öbhököri ubhwa ëbhëbhë.”