Yohana 8

[ 1 Mbe, kera omotangati uwa Abhayahudi ono yaarë hayö, akatanora akaghya waaye ka. Yëësu wonswe akarwa kö-bhööri ubhwa risengerro hayö, akaghya ku-nguku iya Ëmëzëituuni.

Omokari ono yaaghöötirwë arakora obhosooraare

2 Hano bhwaakëëyë, Yëësu akaghya ghwiki akasoha kö-bhööri ubhwa risengerro. Abhantö bhonswe igho bhakaghya ko-we, mbe akaikara, akasimya ököbhëëghya. 3 Abhëëghya abha amaraghërryö agha Mosa na Abhafarisaayo, bhakamoherra omokari ono yaaghöötirwë arakora obhosooraare, bhakamotoora ghatëghatë iya rikomo irya abhantö. 4 Mbe bhakabhöörya Yëësu igha, “Umwëghya, omokari ono aghöötirwë arakora obhosooraare. 5 Mosa, okorengʼaana na amaraghërryö aghaaye, yaatötëëbhëri ukwita omokari uwa eteemo eno, ko okomotema na amaghena. Mbe, uwe iyakë okoghamba?” 6 Bho mbaamöbhöörri igho ku ukumushaashya, okore bhanyoore ikibhuno ikya ukumushongera. Kasi Yëësu akaihiinya akasimya ukwandeka hansë ko-marobha na ikyara ikyaye. 7 Hano bhaaghëndërrëëyi ökömöbhööryabhöörya, Yëësu akaghorroka, akabhahonshora igha, “Hano oraanyoore aaho mö-bhëënyu muyö ono ataana ëkëbhë, abhe uwa mbere okotema omokari ono na reghena.” 8 Mbe, Yëësu akaihiinya ghwiki hansë, akaandeka ko-marobha. 9 Hano bhaaighuurë ghayö, bhakashuutwa mo-senkoro isyabho, bhakasimya okotanora ömwë ömwë igho, ukusimirya abhaghaaka okohekera abhamura. Yaahëkëëyë-ho Yëësu akatighara umwene igho na omokari uyö yaaimërëëyë mbere iyaaye. 10 Mbe, Yëësu akaghorroka, akamöbhöörya igha, “Nyakörö, hai bhaghëëyë bhano bhaarë kukushongera? Kora, taaho wowonswe igho ono atighaayë akobhotorre ikiina hë?” 11 Akamohonshora igha, “Ore Omonene, ömöntö wowonswe igho taaho hë.” Mbe, Yëësu akamötëëbhya igha, “Öni wonswe tenkobhotorre ikiina hë. Kaghi, kasi ukurwa reero, otakaakora ghwiki ëbhëbhë.”]

Yëësu we obhorabhu ubhwa ekebhara

12 Mbe, Yëësu akaghëndërrya okoghamba ghwiki na rikomo reera igha, “Öni nö-öni obhorabhu ubhwa ekebhara. Ömöntö wowonswe igho ono akonsoorana, takoghenda mu-kisuntë kora hake hë, kasi naraabhe na obhorabhu bhono bhokomotangata mö-bhöhöru ubhwa amakora ghonswe igho.” 13 Abhafarisaayo bhakatëëbhya Yëësu igha, “Uwe nu-uwe umwene okoghamba amangʼana agha ukuyimererra uwe umwene, ghayö okoghamba tegharëngë agha obhoheene hë.” 14 Yëësu akabhahonshora igha, “Nokaanyoora ndayimererra umwene, kasi ghano nkoghamba, n-ga obhoheene, ko bhoora nemanyirë hano naarwa, ghwiki nemanyirë eno nkughya. Kasi bhëënyu temomanyirë hano naarwa na eno nkughya hë. 15 Bhëënyu nkombotorra mörë ikiina, okorengʼaana na amangʼana ghano ghakomaahekana, kasi öni tenkobhotorra ikiina ömöntö wowonswe igho hë. 16 Kasi hano nabhotorra ömöntö ikiina, nkomobhotorra ndë ikiina ko obhoheene ko bhoora tëndëngë öni umwene igho hë, kasi hamwë ndë na Taata ono yaantoma. 17 Mo-maraghërryö aghëënyu yandëkirwë igha, ubhwimërërri ubhwa abhantö bhabhërë bhoraitengʼerwa okobha ubhwa heene. 18 Öni nkwiruusirya ndë ubhwimërërri öni umwene, na Taata ono yaantoma wonswe kunyimererra arë.”

19 Mbe, Abhafarisaayo bhakabhöörya Yëësu igha, “Kasi, Suwëënyu hai arëngë?” Yëësu akabhahonshora igha, “Öni temommanyirë hë, kora Taata temomomanyirë hë. Mokaammanyirë öni, Taata wonswe mokaamomanyirë.” 20 Yëësu yaaghambirë ghayö ghonswe igho enkaagha eno yëëghyanga mu-risengerro, ahasë hano bhaatooranga amasandeko agha seehera. Kasi tiyaare-ho ömöntö ono yaamöghöötirë ko bhoora waanyöörrë enkaagha iyaaye etaraahika.

Yëësu arashumaashera amangʼana agha uruku urwaye

21 Mbe, ghwiki Yëësu akatëëbhya Abhafarisaayo bhayö igha, “Öni nkughya ndë, murintuna, kasi timuriinnyoora hë. Bhëënyu moraakwe ko okoghera iya ëbhëbhë bhyënyu. Ahasë hano nkughya, bhëënyu temotore ukuhika-yo hë.” 22 Mbe, abhatangati abha Abhayahudi bhakabhoorania igha, kanaa, engamba eno akoghamba igha, “Iyö nkughya, bhëënyu timuhikë-yo hë,” nkutuna arë kwingʼenta? 23 Yëësu akaghëndërrya okobhatëëbhya igha, “Bhëënyu n-hansë hano mwaarwa, kasi öni mu-ryobha naarwa. Bhëënyu na-abha ko-kebhara kono, kasi öni tu uwa ko-kebhara kono ndë hë. 24 Kiyö nkyo këghërrë mbatëëbhëri igha moraakwe ko okoghera iya ëbhëbhë ibhyënyu. Mbe hano motaakumi igha ‘Öni Nö-öni,’ moraakwe ko okoghera iya ëbhëbhë ibhyënyu.” 25 Mbe bhakabhöörya Yëësu igha, “Tötëëbhi uwe nu-uwe wë?” Yëësu akabhahonshora igha, “Ukurwa okosemoka hano naasimiri ukwëghya, naabhatëëbhëri igha, nö-öni wë. 26 Neena amangʼana amaaru ghano nkaaghambirë, na agha okobhabhotorra ibhiina bhëënyu, kasi tenkore igho hë. Ko bhoora öni nkötëëbhya ndë abhantö bhonswe igho amangʼana ghano nighuurë ukurwa ko-ono yaantoma. Uyö yaantoma, nu-uwa obhoheene.”

27 Bho tebhaamanyirë igha, amangʼana ghayö yaashumaashanga nabho, na-agha Suwaabho uwa mu-ryobha. 28 Mbe Yëësu akakangʼasërrya igha, “Hano muririinia Omoona uwa Ömöntö okore mumwite, hayö bhoono ho moremanya igha ‘Öni nö-öni Omoona uwa ömöntö.’ Ghwiki ho moremanya igha ghonswe igho ghano nkokora, tenkokora kya bhono öni umwene nkutuna hë, kasi nkoghamba ndë ghano Taata yaanyëghya. 29 Ono yaantoma hamwë arë na öni. Taraantigha öni umwene igho hë, ko bhoora nkokora ndë ghano ghakumushomera nkaagha syonswe igho.”

30 Enkaagha eno Yëësu yaashumaashanga amangʼana ghayö, abhantö abhaaru bhakamukumya.

Waryobha arahaana abhantö öbhötöönööni

31 Mbe, Yëësu akatëëbhya Abhayahudi bhaara bhaamukumiri igha, “Hano moraaghëndërri okoghoota amëëghyö aghaane, hayö moraabhe abheegha abhaane abha heene. 32 Kora moraamanye obhoheene, obhoheene bhuyö, mboraabhahaane öbhötöönööni.” 33 Bho bhakamöbhöörya igha, “Bhëëtö na-abha urwebhoro urwa Ibhurahimu törë. Tetwakabhaayë abhaghorwa abha ömöntö wowonswe oora hë. N-kwakë okoghamba igha bhëëtö ntoraabhe abhatöönööni?” 34 Yëësu akabhahonshora igha, “No-bhoheene nkobhatëëbhya igha, ömöntö wowonswe igho ono araaghëndërri okokora ëbhëbhë, uyö nkobha arë omoghorwa uwa ëbhëbhë. 35 Omoghorwa takwikara ku-mughi ughwa omonene uwaaye sinsikö syonswe igho, kasi omoona we akutighara ku-mughi sinsikö syonswe igho. 36 Mbe nyoore öni Omoona uwa Waryobha ndë, mbatashööyë ukurwa kö-bhëbhë ibhyënyu, temoobhe abhaghorwa ghwiki hë, kasi moraabhe abhatöönööni heeneheene. 37 Nemanyirë igha, bhëënyu na-abha urwebhoro urwa Ibhurahimu mörë, kasi moratuna ukunyita ko bhono mukwanga ukukumya ghano nköbhëëghya. 38 Öni nkobhatëëbhya ndë ghano naamaaha ko-Taata, kasi bhëënyu nkokora mörë ghano suwëënyu aköbhëëghya.” 39 Bhakahonshora Yëësu igha, “Ibhurahimu we taata!” Yëësu akabhatëëbhya igha, “Okaanyöörrë nu-rwebhoro urwa Ibhurahimu mörë, mokaakörrë ghano Ibhurahimu yaakoranga. 40 Kasi bhoono nkutuna mörë enshera iya ukunyita, nokaanyoora mbatëëbhëri obhoheene bhono naaighuurë ukurwa ku-Waryobha. Ibhurahimu tiyaakörrë kya bhono mukutuna okonkorra hë. 41 Amangʼana ghano mokokora n-gano ghakurwa ku-suwëënyu.” Abhayahudi bhayö bhakahonshora Yëësu igha, “Bhëëtö temabhereke törë hë, kasi Waryobha umwene igho we Taata uwëëtö.” 42 Yëësu akabhahonshora igha, “Okaanyöörrë Waryobha we Suwëënyu, mokaanhanshirë, ko bhoora nku-Waryobha naarwa, na bhoono n-hano ndë. Öni tenaasha ku ubhwera ubhwane umwene hë, kasi Waryobha we yaantoma. 43 N-kwakë motakomanya ghano nkoghamba? N-ko bhoora mukwanga amangʼana aghaane. 44 Bhëënyu na-abha Oghosambwa mörë, ghuyö ngwo suwëënyu. Oronamba urwa suwëënyu urwa okokora ghano akutuna, ndwo monaro. Oghosambwa ukurwa bhosemoka n-ghwiti, ghwiki teghohanshirë obhoheene hë, ko bhoora teghoona obhoheene hë. Hano Oghosambwa ghwaghamba obhorongo, iyö ne-teemo iyaaghwo ko bhoora n-gorongo, ghwiki ngwo suwaabho obhorongo bhwonswe igho. 45 Kasi ko bhoora öni no-bhoheene nkobhatëëbhya, kiyö nkyo okoghera motakunkumya. 46 N-nawë mö-bhëënyu ono akotora ukwemererra mo-bhantö igha, öni m-mokora ëbhëbhë ndë? Hano oraanyoore igha na-mangʼana agha obhoheene nkobhatëëbhya, n-kwakë bhoono motakunkumya? 47 Ono arëngë uwa Waryobha nkwighwa arë amangʼana aghaaye. Ensonga iya bhëënyu ukwanga koghoota ghano Waryobha akoghamba n-ko bhoora igha bhëënyu, tëmörëngë abhantö abhaaye hë.”

Yëësu m-monene okokera Ibhurahimu

48 Abhayahudi bhakabhöörya Yëësu igha, “Kasi to-bhoheene tokoghamba igha, uwe m-Mosamaaria örë, kora noona risambwa?” 49 Yëësu akabhahonshora igha, “Öni ntaana risambwa. Öni nkosooka ndë Taata, kasi bhëënyu temokonsooka hë. 50 Tinkutuna igha bhëënyu möntööni hë, kasi aaho ono akutuna ukunkumya, ghwiki we naraabhe umwahokania uwa heene. 51 No-bhoheene nkobhatëëbhya igha, ömöntö wowonswe igho ono okosoorana amëëghyö aghaane, tarikwa röndë hë.” 52 Mbe, Abhayahudi bhakatëëbhya Yëësu igha, “Bhoono tomarrë ukungʼura igha, uwe noona risambwa! Ibhurahimu yaakwa. Abharööti bhonswe bhaakwa. Kasi uwe oraghamba igha, ‘Ömöntö wowonswe igho ono okosoorana amëëghyö aghaane, tarikwa röndë hë.’ 53 Kasi, nkwikora örë okobha omonene okokera ghuuka uwëëtö Ibhurahimu? Ibhurahimu yaakwa. Abharööti bhonswe bhaakwa. Bhoono, uwe oraikora igha nu-uwe wë?” 54 Yëësu akabhahonshora igha, “Hano ndaaikumi öni umwene, ukwikumya ukwane tekoona ubhwera bhwobhwonswe igho hë. Kasi Taata, ono bhëënyu mokoghamba n-Waryobha uwëënyu, we akunkumya. 55 Bhëënyu temomanyirë Waryobha hë, kasi öni nemomanyirë. Hano ndaaghambe igha temomanyirë hë, hayö nendaabhe omorongo kya bhëënyu. Kasi öni nemanyirë Waryobha, ghwiki ghano akoghamba, nkoghaghoota ndë. 56 Ghuuka uwëënyu Ibhurahimu yaashömëëywë bhököngʼu, okomanya igha öni nenkaaishirë. Yaabhaayë kya ono andööshë, ku bhuyö akashomerwa bhököngʼu.”

57 Mbe, Abhayahudi bhakabhöörya Yëësu igha, “Uwe ono otaraahikya kora imyoka merongo etaano, hai waamaaha Ibhurahimu?” 58 Yëësu akabhahonshora igha, “No-bhoheene nkobhatëëbhya igha, kora Ibhurahimu hano yaarenga atareebhorwa, öni ho naarenga.” 59 Hano Abhayahudi bhaaighuurë ghayö, bhakabhoosha amaghena, okore bhamoteme bhamwite, kasi Yëësu akaibhisa, akatanora ukurwa kö-bhööri ubhwa risengerro.