Yoona araghya Ninaawi
3
Mbe,
ghwiki YEHOBHA Waryobha akaherra Yoona amangʼana urwa kabhërë igha,
2 “Tanora oghende Ninaawi,
umughi omonene ghoora,
oraarekere abhantö abha muyö bhono nkoraghërrëëyi.”
3 Yoona akaikërrya amangʼana agha YEHOBHA Waryobha,
akatanora,
akaghya Ninaawi.
Ninaawi ghuyö nu-mughi omonene bhököngʼu ghwaarë,
ömöntö yaaghoromaanianga ko-roghendo urwa sinsikö isatö.
4 Hano Yoona yaasöhirë mu-mughi ghuyö akaghenda urusikö urughima,
akasimya okobharaarekera igha,
“Hano seraahwe sinsikö merongo ene,
Ninaawi noraasikibhwi.”
Abhantö abha Ninaawi bharahongora ëbhëbhë ibhyaho
5 Mbe,
abhantö abha Ninaawi bhakaikërrya amangʼana agha Waryobha.
Bhakaraarekerana igha,
abhantö bhonswe igho,
abhake ko abhanene,
bhaisase ibhyakorya.
Bhonswe igho bhakaibhoha amaghonera ghabhe ekemanyërryö ikya ukwihonshorra Waryobha.
6 Ekabha igha,
hano omokama uwa Ninaawi yaaighuurë amaraghërryö agha Yoona ghayö,
akaimoka ukurwa ku-kitumbë ikyaye ikya ekekama.
Akaruusya singibho isyaye isya ekekama,
akaibhoha amaghonera.
Akaibhuta mu-riibhu ku ukwörökya igha abhaabhayëëyë na ahöngööyë ëbhëbhë ibhyaye.
7 Omokama uyö uwa Ninaawi akahuuta orotera.
Akaraarekera abhamënyi abha Ninaawi bhonswe igho igha,
“Öni hamwë na abhatangati abha ko-bhokama ubhwane toraraghërrya igha,
ömöntö wowonswe atakaameena ëkëntö.
Kora situgho syonswe igho,
ndekaabha rihisho irya sengʼombe handë amangʼöndi,
bhetakaarëësya handë ukunywa amanshë.
8 Abhantö bhaibhohe amaghonera na situgho syonswe sibhisibhwi amaghonera.
Kera ömöntö akore omotono ughwa okosaasaama Waryobha.
Abhantö bhatighe obhoghogho bhonswe igho bhono bhakokora.
9 Waryobha hanga akaatigha okobha na enkoro,
atwabhere okore totakaasika.”
10 Hano Waryobha yaarööshë igha bhatighirë obhoghogho bhono bhaakoranga,
akakubhya.
Tiyaabhasikiri hë kya bhoora yaarenga aghambirë.