Yoona arasaasaama mo-nda iya ughuswë
2
Mbe,
hano Yoona yaarë mo-nda iya ughuswë ghuyö,
akasaasaama YEHOBHA,
Waryobha uwaaye,
igha,
2 “Nkakoorra YEHOBHA Waryobha hano naarë na
ëhëghërë,
akanyighwera.
Nokaanyoora n-kyaro ikya abhaku naarë,
kasi nkaakosaasaama igha öntööri,
okantöörya.
3 Waandëkëëyë mu-bhuribha ghatë ubhwa inyansha,
ëhöörö iya amanshë ekanyinaara
mbaara syonswe igho,
amayengo na rikama bhyonswe igho
bhekaheta-ko kighörö.
4 Naakanyanga igha ndëkëëywë ukughya
ahare na uwe,
kasi ghwiki nendaagharamere
risengerro iryaho rihörëëru.
5 Ubhuribha bhwankundikiiyi,
amanshë ghakanyinaara,
nkoobhoha.
Amasinki na amanete ghakankundikirya.
6 Naashukirë nkahika hansë aha amarengo,
mu-kyaro keno kyakerrana amakora na amakora.
Kasi uwe YEHOBHA,
Waryobha uwaane,
okaahyora-yo ndëngë ömöhöru.
7 Hano naatunanga ukukwa,
ho naakuhiitirë YEHOBHA,
Waryobha uwaane,
nkankorekerra amangʼana agha okosaasaama
ukwane ghakakohekeera mu-risengerro iryaho rihörëëru.
8 Abhantö bhano bhakosaasaama amasambwa,
bhayö nkötabhuta bharë örööbhö rono bhakaanyöörrë.
9 Kasi nendaakörëëtëri nkötööni bhököngʼu,
nkokorre ikimwenso ikya amaihiimirryö aghaane.
Öbhötöörya n-ku YEHOBHA Waryobha bhukurwa.”
10 Mbe,
YEHOBHA Waryobha akatëëbhya ughuswë ghuyö igha,
ghoghende ghohongore Yoona ko-morambo.
Ughuswë ghuyö ghokakora igho.